Blog Enn – Kimanyer Res Lisid dan Lepok Zenosid
09.11.2023
Nu ti enn lekip sink ki ti travay lor Blog Lokdawn, res lisid par analize, kordine ek ekrir pu websayt LALIT preske tulezur pandan 2 Lokdawn Kovid – Rada, Ram, Alain, Kisna ek momem, Lindsey. Buku lekter finn ekrir nu pu dir kuma sa blog la finn usi ed zot. Asterla, nu santi nesesite pu gard numem sindespri ankor enn fwa, sa fwa la li akoz enn zenosid planifye ek exekite par Leta Israel lor lepep Palestinyin dan Gaza. Bann Leta inperyalist ki arm ek finans kolonizasyon Israel, leta de syez par Israel, Lokipasyon militer Israel, ek mem kan Israel pe afam dimunn pu mor defen akoz pena manze, asterla sa bann leta la pe kumans perdi zot sanfrwa, kumans tatone e, dan zot deklarasyon, pe gaga lor ki mo pu servi. Sa, pa akoz zot regret sa zenosid ki pe deferle divan nu lizye, mem amezir maladi pe kumans fane avek mutuk lor blesir bonb lor figir bann ti zanfan, me plito akoz zot realize nu tu pe truv zot pe partisip dan tuy ek anpit sa milye-milye zanfan, tibaba, granmer, granper, dimunn malad ek dimunn an bonn sante, mem parey. Zot kone nu pe temwayn sa. Me, zot pa mem kapav pronons sa mo pezib “sese-lefe” san mansyonn lefet zot problem kan zot pe kontinye furni Israel ankor zarm. Li intenab. Kareman depas tu born.
Alor Rada, Ram, Alain ek Kisna pe sonn mwa avek lide, referans, refleksyon. E mo drafte. Apre, Ram prufrid ek mo sumet lartik a Rada ki fakt-chek ek OK lartik e lerla eplord li . Lezot manb sone pu sinyal si ena kit taypo uswa lezot erer ki finn glise. Anmemtan, Alain ek Kisna fer tradiksyon an Kreol, sumet tradiksyon Kreol a Rada pu li fer chek final. Lezot telefone avek nuvo lide pu prosenn blog. E lide seki mwa, kuma drafter, kapav sitye seri Blog la dan mo lavi tulezur, e dan tu seki nu partaze dan nu lavi tulezur. Mem amezir nu pe manifeste, fer veye, avoy kominike, pran pozisyon, ralye sutyin pu azir. E, mem amezir nu pa ule krwar tu sa sufrans ki pe intansyonelman inflize lor enn lepep antye – dan Gaza, dan West Bank [Ciszordani] e dan Les Zerizalem. Kolonizasyon pa mor fasil. Patron konpayni kapitalist fabrikan zarm fer vantar lor kuma zot pu fer profi depi komann zarm pu komet zenosid. Kuma CEO Raytheon (aster li apel RTX) dir, zot “pu rekolte benefis depi sa re-stokaz pu lansanb konglomera miltinasyonal Raytheon”. Zot apel sa komann zarm depi Larme Israel, Israel Defense Forces, “re-stokaz”. Zot fer vantar avek profi depi zenosid, e zot fer li uvertman, san okenn laont.
Alor, les nu kumanse zordi avek sa nuvel etonan ki lalyans Loksidan pe kumans efrondre/dezagreze.
Depyuti Premye Minis Belzik finn fer lapel pu inpoz sanksyon lor Israel. Li finn dir sa “lapli bonb li inimin,”. Minis Drwa Sosyal Lespayn finn fer apel pu ena “sanksyon ekonomik exanpler kont tu seki responsab sa zenosid la”. Sa lapel la pli larz, akoz li sigzer sanksyon kont Lamerik ek lezot leta Lerop. Li finn avek presizyon kalifye aksyon Israel par seki li ete, “enn zenosid planifye”.
Dan Gran Bretayn, dapre enn konpayni piblik data YouGov, ena 76% dimunn, deza dan enn sondaz trwa semenn desela, dir zot anfaver enn sese-lefe. Tandi ki Guvernman Britanik pe refiz dimann enn sese-lefe. Tandi ki Lopozisyon Labour pe refiz fer apel pu enn sese-lefe.
Zordi, dan The Guardian (enn lagazet ki pena okenn kredibilite lor sa kestyon la) malgre sa finn raporte ki Labour Party dan Gran Bretayn an kriz, akoz so lidership inn vinn pro-Israel kuma zame avan dan so listwar, apre enn konplo orkestre pu evins Jeremy Corbyn ek santenn lezot manb dan lagos Labour Party akoz zot ti sutenir Palestinyin. Nu sit depi lartik la “ena ziska 15 minis dan Shado Kabinet” [“as many as 15 shadow ministers” may be “about to quit”] kapav “lor sime pu kit” Shado Kabinet apre demisyon enn parmi zot Mardi swar. Labour Party Ekose posib pu gayn enn votman dan Parlman UK lor enn mosyon sese-lefe. Dapre lagazet The Guardian, dimunn pe predir ki asa moman vot, pu ena mam Shado Kabinet pu ofer zot let demisyon ki zot deza ena pare“dan zot pos”.
Bolivia finn kas relasyon diplomatik avek Israel. Kolonbi ek Chili finn sispann zot lyin avek Israel. Zordani finn kas lyin. Latirki, enn mam LOTAN, finn rapel so anbasader ek finn kup kontak avek Premye Minis Israel, Netanyahu. Anbasader Israel ti fini deza sove ale, pled rezon sekirite. Bahrain finn friz relasyon ekonomik avek Israel, expilse ek rapel anbasader. Ondiras finn usi rapel so anbasader. Sid Afrik finn rapel so anbasader ek finn akiz Israel de zenosid. Chad, finn rapel so staf diplomatik, li usi …
Tusala pu dir LALIT, ansam avek Solidarite Morisyin Ar Lepep Palestinn (SOMALP), ek Friends of Al Aqsa Mauritius, finn fer apel ar Premye Minis Pravind Jugnauth pu li anons ki Leta Moris pe kup tu lyin diplomatik avek Leta Israel ziska li inplemant enn sese-lefe, li met fen a lokipasyon ek leta de syez, li demantel tu so bann koloni ilegal dan Palestinn, permet drwa retur tu Palestinyin ki finn expilse ek anmemtan kumans travay ver enn veritab demokrasi post-kolonyal. Si Premye Minis Jugnauth omwin fer sa nu kapav refit sa komanter absoliman kriminel fer par Eliav Belotserkovsky, Anbasader Plenipotantyer ek Extraordiner Leta Israel dan Moris, ek raporte dan lagazet Le Defi 2 Novam: “Pena kriz imaniter dan Gaza” [“Il n’y a pas de crise humanitaire à Gaza.”] San okenn laont li invant mansonz kuma “Sak zur, ena par santenn kamyon pe rant dan Gaza avek marsandiz”. Li panse li kapav kuyonn dimunn dan ex-koloni kuma nu. Non li pa kapav.
Li byin inportan ki ena SOMALP.
SOMALP, kuma u devet kone, regrup federasyon sindikal, Confederation of General Trade unions, Confederation des Travailleurs des Secteurs Publique et Prive, Mauritius Labour Congress, All Workers Federation, Federation of Parastatal Bodies and Other unions, usi lorganizasyon fam tel ki Muvman Liberasyon Fam, grup sosyal kuma Sant Dr Idrice Goomany, lorganizasyon konsomater tel ki Consumer Advocacy Group, osi byin ki Grup Refizye Chagos. Parmi so 40 individi manb, enn personalite byin koni kuma Ansyin Prezidan Repiblik Moris Cassam Uteem, ek ansyin Atorne Jeneral Jean-Claude Bibi.
Lindsey Collen
pu LALIT
