Dev Virahsawmy Finn Desede – Enn gran kontribiter pu literatir ek langaz finn ale

08.11.2023

Ledikasyon pu Travayer finn rann enn omaz a Dev Virahsawmy. Li finn dimann LALIT pibliye li. LALIT rezwenn LPT pu exprim kondoleans ar Loga, Anushka, Saskia, ek tu dan lafami apre lamor Dev, ki finn mark listwar politik post-Lindepandans, osi byin ki literatir ek langaz. Ziska so dernye semenn, li ti pe promuvwar pa zis langaz Kreol, me osi dekriminalizasyon kanabis medikal. 

LPT dir: “Dev Virahsawmy so kontribisyon prodiksyon literer dan langaz Kreol, li kolosal. Pandan pre 60 an li finn kontinyelman prodir enn panopli tex orizinal: poem, zistwar zanfan, short-stori, komedi mizikal, e sirtu pyes teat. Li finn osi ekrir ese an Kreol – lor enn gran varyete size -- e finn tradir pa mal pyes teat Shakespeare. So tit pu Shakespeare so Much Ado About Nothing li pli zoli ki orizinal: “Enn Ta Senn Dan Vid”. Li finn tradir exakteman, e osi azut enn zedmo ar “senn”, ki an Kreol osi vedir enn seksyon dan enn pyes teat! Li finn osi tradir poet kuma Shelley – pa enn ti travay sa! 

“An paralel, Dev finn kontribiye dan stenndardizasyon langaz Kreol ekrit. Li ti ena enn zorey pu tann manyer dimunn koz Kreol byin, e integre li dan lekritir. Li ti osi enn militan langaz, parmi bann premye-premye, ki zame pa finn flanse dan promuvwar langaz maternel. 

“LPT ti pibliye plizir Dev so tex, e fer lansman so liv. E anplis, LPT ti gard enn kontak konstan e kordyal pandan dernye trwa deseni, sirtu lor kestyon pedagozi, e ki taktik ubyin stratezi. Dan bann lane 1990, kan Dev ti invite e ti deside pu pa ale, dan Festival Kreol dan Sesel, li ti propoze ki LPT ranplas li. Tu dernyeman, kan so lasante ti deza enn gran problem, li ti tuzur pe propoz fer enn sesyon treyning pu manb LPT lor lanseynman bileng Kreol-Angle. Alor, li finn amenn lalit ziska lafin.

“Manb LPT exprim sinpati avek tu so fami.”