Zenosid Kontiyne dan Gaza, Zeo-politik sanze, Moris ena Insidan Sitadel

07.11.2023

Anba ena enn lartik baze lor Tur Dorizon enn nu manb, divan Lasanble Manb le 5 Novam. Li tret sityasyon politik Moris osi byin ki zeo-politik. Li osi dekod seki ti arive Sitadel. Ala seki ti resorti dan nu Lasanble:

Kan nu ti fixe nu Lasanble Manb nu pa ti kone nu pu zwenn dan enn moman kan ena enn zenosid Leta Israel kont Palestinyin. Nu ti deside le 1 Oktob pu fer sa Lasanble manb. Enn semenn apre, setadir 7 Oktob, Hamas finn kree 24 bres dan miray ki Israel inn konstrir otur Gaza, e inn met so sistem elektronik dan so 11 baz militer tutolong KO. E kuma tu dimunn kone, finn ena tuyeri buku sivil dan Israel. Tusala pu dir ki, kan nu ti pran desizyon, nu pa ti kone ki nu pu dan enn tel katastrof kuma sa zenosid ki Israel pe inflize lor Gaza. 

Kan nu ti pran desizyon, nu ti fixe sa Lasanble akoz ti ena posibilite ki, apre Zizman Privy Council, Pravind Jugnauth pu santi telman re-kinke ki li ti pu tante pu larg enn eleksyon antisipe dan mem fule ki so selebrasyon viktwar. Li ti enn posibilite. Me, mem si Privy Council inn donn MSM enn viktwar politik inportan – akoz febles total ka Travayis so kandida bati Suren Dayal – Jugnauth pa paret pe pran sa sime la. Okontrer, li pe dir li pu atann so prosenn Bidze lane prosenn, sirtu pu ogmant pansyon. Nu sipoze li ti pu kontan kup riban lor nuvo pon spektakiler ki liye simenef ar ansyin larut santral, e petet mem klarifye sityasyon Diego, enn kote, ek Agalega, lot kote, avan eleksyon zeneral. 

Antuka, lefet ki nu ena Lasanble Manb, li tom byin. Nu pu kapav partaz inpe analiz lor sityasyon politik lokal ek internasyonal, mem si nu pe viv anba sa nyaz nwar zenosid ki Israel pe perpetre. 

Nu pu osi kapav fer travay deza lor nu azanda anterm planifye pu partaz nu travay lor premye 2 vole nu Program Politik 2023. Enn kamarad pu gid nu kan nu get vole popilarizasyon nu program, otur nu nuvo liv filozofi LALIT ek fey volan lor stratezi LALIT taler ansam. Li enn travay ki pu bizin akselere kan eleksyon large – ki li pre ubyin plito dan enn an par la. Alor, nu pu get nu Program taler. E sa pu prepar nu pu tu evantyalite, e li pu osi prepar nu pu nu Bilan lafin lane dan 5-6 semenn.

E natirelman nu ena enn “tur dorizon” politik. 

Antretan, politik lokal finn determine par buku zafer santral dan nu program:

1. Lalit Palestinyin – enn parmi pwin kle nu program. Palestinn enn pwin santral dan kad lalit pu dekolonizasyon, e kont inperyalism, lalit kont politik idantiter, kont baz militer, kont lager. Nu finn met li kuma enn tem santral nu bann kanpayn, setadir li inportan kuma enn stratezi pu tu parti degos pu sutenir lepep Palestinn. E, nu konn sa size la byin, pa zis par lektir e swiv onn-layn, me osi akoz 2 nu manb finn al donn kudme Palestinyin dan Wesbank ki pe fer fas enn larme lokipasyon. 

2. Lalit pu Ferm Baz Diego e Ferm tu Larad Repiblik Moris kont Bato Deger – ankor enn parmi pwin kle nu program, li osi li lor azanda politik tulezur. LALIT tusel ena enn program koeran lor e Diego e Agalega – ferm tu baz! Ferm tu larad a bato deger! Rann tu negosyasyon e lakor piblik.

3. Lalit pu langaz Kreol – otur Kolok Oktob LPT, otur desizyon lor eski Kreol pu anseyne pu HSC e introdir dan Parlman, sa li enn lot “nu” tem ki finn vinn santral.         

4. Konsyans deklas – sak size konsernan klas travayer pe bit kont nivo relativman ba konsyans deklas dan klas travayer dan lepok aktyel. Sa vedir, ideolozi klas travayer relativman feb, e li ule dir ki sa rann li difisil pu mobilize pu aksyon de-mas dan klas travayer zordi. Me, difisil pa difisil, li res santral. 

Ala enn indikasyon kot konsyans deklas ete zordi: Pena okenn parti politik ki dibut pu klas travayer. Get rezilta sondaz politik ki fek pibliye: 

Sondaz Syntheses-Maurice komandite par L’Express li baze lor kestyoner par telefonn 20 Septam a 15 Oktob. Anu get enn-de rezilta.

K: Eski u ule emerzans enn nuvo parti politik avek nuvo lider?

R: 68% - WI e 32% - NON. Plis ki 2/3 dimunn ule enn nuvo parti ek nuvo lider. Sa, li pa etonan. Sirtu kan tu parti ki figire dan sondaz avwe ki zot anfaver sistem kapitalist – apar pandan kanpayn elektoral e otur Fet Travay.

K: Ki Lalyans ena plis sans gayne?  

R: 28% - Lalyans PT etc e 24% - Lalyans MSM etc. (46% pa kone)

Vo lapenn note: Kestyon ki finn poze, li spesifikman depann lor propagann ki finn ena lor kisannla pli for e.g. propagann par lapres, inklir par komanditer sondaz, ant-ot. Li pa tro itil kum kestyon, sirtu kan nu panse ki lapres ti predir ki MSM perdi dernye eleksyon e li finn gayne.

K: Ki parti u pli pros?

R: MSM - 20%

     PT – 11%

     MMM – 10%

     PMSD - 6%

     Bhadain - 1.2%

     An Avant Maurice - 0.8%

     Linyon Moris – 0.4%

     Bodha – 0%

     Autres - 1.3%

Vo lapenn note: MSM tuzur pli for anterm dimunn “santi pros” ar li. Me, si li zame li lozik ki kapav “azut alye ansam” dapre aritmetik ordiner, lerla PT ek so alye gayn plis. Zot gayn 27% kont MSM so 20%. Me selman, nu pa kapav bliye ki, an 2014, nu ti aprann ki lalyans ant parti politik pa neseserman “azute” kumsa: PT ti 40% ek MMM 40% e kan zot fer lalyans, kan azut zot ansam, an realite, zot ti gayn mwins ki 40%. Sa, ti enn ka extrem. Me, note, Lalyans PT etc, li tuzur ena mem konpozan prinsipal ki an 2014.

Me, kestyon dan sondaz “Ki parti u pli pros?” li enn bon kestyon. Respons la donn enn indikasyon lor gran parti. Lor “ti parti”, zot pena ase sutyin elektoral pu sondaz sinifikatif. Rezilta tom dan “marz erer”. Kuma u pu truve kan konpar sa kestyon la ar prosenn kestyon, ki pa idantik. (Kestyon anba Linyon Moris gayn 2 fwa plis ki Bhadain, e kestyon lao, Bhadain gayn 3 fwa plis ki Linyon Moris! E zot ti bizin similer.)

Intansyon vot pu ki lalyans?

PT, etc             36%

MSM etc         25%

Linyon Moris   4%

Bhadain             2%

Autres                0.4%

Pa pu al vote     7.4%

Ena enn lot anomali ki rann sondaz inpe kestyonab. Dan sa dernye kestyon la, bann seki dir zot napa pu vote ditu - 7.4%.  Par kont, kumansman sondaz, ti ena enn kestyon direk “Eski u pu al vote, e “non” ti gayn - 12%. Zot ti bizin similer.  

Tusala explike ki kanpayn elektoral pu so. Sa de gran Lalyans, me sirtu Lalyans Lopozisyon, pu rod aneantir lezot “ti” parti. 

Asterla anu get kote internasyonal, sirtu sityasyon zenosid ki Israel pe komet dan Palestinn. Li finn dominn aktyalite lokal, anfet.

Internasyonal – Zenosid Perpetre par Israel ek USA

Zenosid ki larme Israel pe inflize lor lepep Palestinn – par expre, e layv lor TV – li enn krim kuma zame dan nu lavi nu pa finn temwayne. Li premye fwa – e sa li gras-a Al Jazeera ek dimunn ordiner dan ki pe reysi filme – ki enn Leta napa kapav kasyet so krim kont limanite. E li premye fwa, rol kriminel USA pe devwale divan lizye piblik. Li klerman pe arm e finans Leta Israel e asir so inpinite anmemtan ki ankuraz li “fer seki bizin fer”, pu ki Israel kapav kontinye infliz sa zenosid lor Palestinyin. Enn-de parol manti-manti depi Biden-Blinken zis klerman tantativ pu kumans defann kont sarz zenosid kan tusala fini. USA pa kapav, apre de semenn zenosid, kumans pretann li pe dir Israel bizin fer plis zefor pu evit tuy sivil kan zordi li pe ariv 10,000 tuye, laplipar zanfan, vye dimunn ek fam – anmemtan ki li pe rod deburs ankor 10 milyar dolar pu arm Israel pu kontiyn fer zenosid. USA ek Israel, 2 setler koloni, pe izol zot-mem deplizanpli. Otur zot, deplizanpli ena zis ansyin kolonizater kuma UK, Lafrans, Lalmayn ek setler-koloni kuma Lostrali, Kanada, Nuvel Zeland.  

Sa zenosid la pe sanz sityasyon mondyal totalman. E li pe sanz sityasyon politik alinteryer sak pei, osi. Taler nu re-vinn lor la. Lerla nu get so lefe lor Moris, inklir insidan Sitadel. 

USA ek so bann swiver Oksidantal dan sityasyon kot zot pe arm, finans e piblikman sutenir enn zenosid kont enn lepep okipe militerman. Zot pe persiste sutenir enn Leta Israel ki pe perpetre krim kont limanite. Ala lalis lalwa internasyonal ki Israel, avek sutyin USA, pe vyole:

-- Li pe inplemant depi 17 an enn leta-desyez dan Gaza, ki finn vinn etrangleman total depi enn mwa. Li enn krim kont limanite. 

-- Li pe priv popilasyon total Gaza dilo, manze, elektrisite, ek karbiran. Li enn zenosid.

-- Li pe bombard lepep Gaza depi avyon lao – zot lakaz, zot lopital, zot lanbilans. Li enn zenosid.

-- Li pe derasinn e inpoz deplasman forse lor lamwatye dimunn Gaza (seki res dan Lenor) ver Lesid. Sa li paret enn prelid pu fer zot fwir, rant dan dezer Lezip. Sa osi, li zenosid.

-- Li pe bombard dimunn ki lor sime dan prosesis exekit lord pu fer sa deplasman obligatwar ki Israel pe inpoze, limem.

-- Li pe bombard dimunn kadnase dan Gaza depi lamer Mediterane. Sa li zenosid.

-- Li pe bombard dimunn depi so tink ki pe rant dan Gaza, inkirsyon par inkirsyon. Sa, li zenosid. 

-- Li pe koloniz WesBank e fors Palestinyin fwir zot lakaz. Sa li zenosid. Pena mem Hamas opuvwar laba. Pretex-mem pena.

-- Li pe ferm par milye Palestinyin ki res dan Wesbank dan prizon Israelyin. Enn tyer ladan, ferme san okenn prose lakur. Sa vedir Israel pe kareman kidnap zot, e gard zot otaz. Avek kudme USA.

-- Li pe kokin lakaz dimunn dan Zerizalem Les, tulezur

Tusala finn expoze pu tu dimunn truve lor TV: enn leta arme par USA, setadir Israel, pe infliz enn zenosid lor enn lepep san leta, e ki li finn gradyelman fer fwir (ena 6-7 milyon refizye deza), Gaza li 2/3 refizye depi avan bonbardman Oktob-Novam. Gradyelman Israel finn inpoz lokipasyon militer, gradyelman Israel finn ferm lepep Gaza kuma prizonye dan enn leta-desyez, e aster li pe sey fors zot deplase, lerla kit Palestinn net, sipa li pu tuy zot. Li orib. Li kriyel. Li kolonyal. Li zenosid.

Pwin pu Analize

* Ki ete enn lorganizasyon “teroris”? Hamas? Guvernman extrem drwat Leta Israel? Kan Palestinyin pe viv su lokipasyon militer, e sa tu dimunn ki pa ti deza kone, pe aprann asterla, zot, kuma tu lepep su lokipasyon militer, gayn drwa amenn lalit arme. Sa pa fer li “teroris” – apar pu seki pe fer dominer la. Lozikman u gayn drwa, enn kote, e dan lalwa internasyonal u gayn drwa, lot kote. Sa vedir lorganizasyon kuma Hamas gayn drwa existe. Pa akoz sipa enn guvernman Amerikin dekret enn lorganizasyon “teroris” ki li vreman “teroris”.  Dayer, dernye eleksyon zeneral dan Gaza, Hamas ti eli. Alor, li pa kuma ISIS ditu. Li enn parti politik avek enn sutyin lamas dimunn. Li enn parti politik, e li ena osi so grup arme, al-Qassam. Li kuma Nelson Mandela so ANC, ki ti ena osi so lel militer, uMkhonto we Sizwe, ki Mandela ti met dibut apre masak lapolis rezim Apartheid Sid Afrik kont manifestan pasifik dan Sharpeville kan dimunn ti pe bril zot kart idantite apel “pas”. Pa akoz Guvernman Amerikin inn dir Nelson Mandela ek ANC “teroris” – ki zot ti fer – ki zot ti teroris. Non. Purtan, ziska 2008, kan Mandela ti pli gran ero internasyonal depi 12 banane, li ti tuzur dekrete “teroris” dan Lamerik! Pli ridikil ki sa tu meurs. Pli ipokrit ki sa, to mor. Alor, tusala pu dir fode pa nu manz bul “teroris” san fer nu analiz, nu-mem.

* Ki ete enn “lager”? An zeneral, dan relasyon internasyonal, enn “lager” se kan enn Leta li deklar lager kont enn lot Leta. Me, Israel li pa kapav vinn “deklar lager” kuma Netanyahu pretann, kont enn lepep Palestinn ki pena okenn de larme, ni erfors, ni lamarinn, ni guvernman, ni servis sivil, naryin, e ki, pli pir ankor, Israel deza gard anba so kontrol dan lokipasyon militer, e dan ka Gaza, Israel gard li dan enn leta-desyez depi 17 banane. E asterla pe rod literalman fini tu Palestinyin – fors zot fwir, deplas zot, kraz zot lakaz, kraz zot lekol ek lopital, zot sime, zot surs dilo ek kuran, e si zot refiz ubyin pa kapav fwir, lerla li tuy zot. E mem si zot rod fwir, la osi, li rod tuy zot. Kimanyer kapav apel sa enn “lager”? Pa li sa.

* Ki ete “Self-Defenns” antan ki swadizan defans Israel plede kan akiz li Zenosid?

Self-defenns, enn leta ena drwa pled li kont ENN LOT LETA. Me, Israel pa aksepte Leta Palestinn. Alor, ki self-defenns Israel pe koze? Israel pena drwa self-defenns kont enn lepep su so kontrol militer. Sa fini statye deza depi 2003 dan enn zizman ICJ dan enn ka kont Israel-mem, dayer. E li lozik elemanter. Kisannla kapav mazinn enn kolonizater pled “self-defenns” kan ena lager liberasyon nasyonal kont li. Li res agreser mem.

Aksyon

Alor, erezman nu dan LALIT, nu dan SOMALP, nu finn reysi pran pozisyon, e mem azir par fer enn veye, tir kominike konzwin, ekrir lartik lor nu sayt ek FB, al lor program radyo, e nu finn ena orater dan Forum Friends of Al Aqsa. Zordi nu bizin kontiyne fer tu seki nu kapav pu amenn enn seselefe permanan e san kondisyon, pu amenn demantelman leta desyez Gaza, demantelman lokipasyon ilegal dan Wesbank, liber tu lakaz ek later kokin depi Palestinyin, amenn lafin Apartheid Israel pe inpoze, organiz retur tu refizye Palestinn ki ule returne, e al ver enn veritab demokrasi kot tu dimunn ena mem drwa. Taler nu diskit sa pandan deba.                   

Lefe lor lemond

Ki lefe sa zenosid la pe amene partu dan lemond? Apar enn sansasyon orer dan lestoma sakenn, apar lannwit ante par zimaz sa zenosid la, e apar enn degu otan for kont USA-Israel pu zot kriote? 

Me, ki lefe zeo-politik? 

Dabor, tu sa Lakor Abraham (pei Arab ki ti pe al marye ar Israel swit-a politik extrem drwat organize ant Trump ek Netanyahu), tu finn tom plot enn sel ku. Li finn diskredite kuma enn tantativ pu pretann Palestinyin fini disparet. 

Israel-USA pe izole net depi lemond. USA inn bizin, li tusel, inpoz so veto lor enn rezolisyon Konsey Sekirite UN. Tusel, li finn donn lotorizasyon Israel al delavan ar so bonbardman avek inpinite, so leta desyez ki viz pu fer dimunn mor defin, so tantativ pu obliter Palestinyin. USA tusel ki konsistaman bar enn seselefe. 

Kan Nasyon Zini pa futi travers veto USA dan Konsey Sekirite UN, Zordani ek enn 50-enn lezot pei ti amenn enn Rezolisyon Lasanble Zeneral. Lasanble Zeneral tu pei, pena veto. Me, li pa baynding, kuma rezolisyon Konsey Sekirite. (Israel pa ekut mem seki baynding, selman.)

Kan vote, viktwar kont Israel ek USA ti imans: 120 vot anfaver rezolisyon pu enn seselefe. Moris parmi. USA, ek Israel inn gayn zis 12 lezot pei ar zot: 4 pei Lerop ase feb selman (Laongri, Lostris, Kroasi ek Repiblik Chek), 2 diktatir Lamerik Latinn, ek 6 pei dan Pasifik, enn parmi avek 10,000 abitan. Ena 45 pei kapon sipa mank kolonn vertebral ki finn abstenir – ondire zot finn vot kont enn seselefe teknikman parski zot pa finn vot anfaver. Me, li osi vedir zot finn de-solidariz ar Israel ek USA. Tuzur …

Kote Lerop, so linite politik li an lanbo. 4 pei Lerop inn vot kont enn seselefe. 12 pei inn vot anfaver. 11 lezot finn abstenir. Bat sa pu dezarwa. Zot pena mem enn mazorite zot manb anfaver seselefe pandan enn zenosid. Bat sa pu “sivilizasyon Oksidantal”.

Lind su Modi an zeneral dibut ar Israel, me mem Lind finn, kanmem, abstenir dan vot pu seselefe, setadir desolidariz ar Israel ek USA. 

Lefe Zenosid Israel lor Gaza

Enn lefe sa zenosid la, se lager dan Ukraine apenn lor azanda. Nepli. Le 4 Novam, Zelensky ti dan nuvel, pe dir 2 zafer ki donn enn lide kler: Li niye, kuma gran tit, ki li “su presyon” (nu devine depi USA ek so bann tutu) pu negosye ar Larisi pu met fin a sa lager la. Sa vedir li su presyon. Alafin USA paret pe kareman aret anpes Ukraine rant dan negosyasyon. Ti ena enn negosyasyon ki ti desid enn seselefe an Mars 2022, apre enn mwa lager, me USA ti met so “veto” lor Ukraine, fer Zelensky kas so prop parol dan negosyasyon. E Zelensky le 4 Novam azute ki fode pa krwar ena enn “steylmet” dan lager, li zis enn “pozman” (lull). Sa vedir li pe konsede ki so lofansiv pa finn reysi.

Dekolonizasyon re lor azanda mondyal. Apre Chagos ek Diego, ki ti lor azanda internasyonal, nu finn gayn enn dezyem lexanp kimanyer bizin kontiyn lalit kont kolonizasyon oksidantal.

Divizyon andan dan Pei

Dan sertin pei, ena gran divizyon. Par exanp, dan UK, enn sondaz le 20 Oktob montre ki 76% dimunn anfaver enn seselefe imedyat, dan mem moman kan Sunak ti pe veto rezolisyon ki apel pu enn seselefe. Li finn bizin kumans sanz koze, e mem kumans abstenir ar USA. Ena zis 8% popilasyon ki anfaver politik Sunak pu arm ek finans Israel. Li inkrwayab. Dan Lamerik ena de-tyer dimunn anfaver seselefe imedya. Purtan, Biden kontiyne inpoz so veto.

Mobilizasyon anfaver Lepep Palestinyin dan Kominote Zwif

Lamas dimunn kominote Zwif – sirtu dan USA, kot li pli nombre – finn kareman kumans vir kont Leta Israel, kuma zame avan. Sa viraz la li sirtu parmi zenn, e li pe ogmante.

Moris: Ant Sutyin pu Palestinyin e insidan grav Sitadel 

Dan Moris, kan nu ziz par Program Radyo, e anzeneral, lamas dimunn anfaver lepep Palestinyin. Sa li akoz Parti Travayis pandan 75 an finn sutenir Palestinyin, lerla MMM pandan 50 an, lerla LALIT finn amenn kanpayn pandan 45 an san-ses. Tusala finn asir enn gran mazorite dimunn kapav reziste sa propagann Oksidantal dan medya kuma CNN, LCI, RFI, BBC. Ena osi enn ase gran popilasyon Mizelman dan Repiblik Moris, ki santi sa kriote istorik anver Palestinyin kuma enn atak kont zot kominote relizye, mem si zot pa swiv politik anti-kolonyal an-detay. 

Me, isi, finn ena enn evennman ase malere ki finn kal sutyin popiler. Parski dimunn pa finn konpran ki finn arive, e finn inpe sezi. Li enn evennman an-silkan, konfi, kot tu kalite zafer inn melanze.

Evennman la, se ti ena enn atak danzere par enn 30-enn zom maske – dan enn kominote, nu kone apre tu sa arestasyon ki finn swiv – lafin enn Konser ki ti fer Sitadel Samdi 21 Oktob. Sa vedir anplin, omilye zenosid ki Israel pe fer lor Gaza. Sa bann zom la finn rantre, dir dimunn ale, kraz instriman lamizik, kriye, zure, e menase. Klerman, li ilegal. Klerman zot pe fer fas lazistis. Plis ki 20 fini arete, gayn sarz. Ena finn large lor kosyon, ena non.

Anu get tusala.

Sitadel, kuma tu dimunn kone, li enn sinbol byin tanzib dominasyon militer kolonyal. 

Alor, zis sa, vedir tu kumans mal. 

E laba, Sitadel, pa ti pu ena zis enn konser laba le 21. Ti pu osi (e finn osi) ena enn lamars anfaver lepep Palestinyin, organize par Mauritius Muslim Awakening, ki ti pe demare depi Sitadel, so landime, setadir Dimans granmatin mwins ki 12 ertan apre. Organizater, li paret, finn donn randevu volonter pu al prepare aswar, lavey kot Sitadel, setadir, kuma tradisyon Moris ete, al instal bandrol pu manifestasyon, pik pavyon pu manifestasyon (dan sa ka la pavyon Palestinn) otur flan montayn Sitadel. 

Dapre lagazet, ti ena enn dezyem grup, separe, ki zot osi ti pe reyni sa aswar la. E posib ena sertin ki ti truv dan tulde grup. Pa kone ki sa lot grup la so lintansyon. 

Sa lorganizasyon apel MMA ti fini planifye enn lamars, pran Sitadel Dimans gramatin. Sitadel, kuma tu dimunn ki konn Moris profon kone, li prekot Vale Pitot, e dimunn ki res flan montayn. E li enn landrwa kot ena buku abitan kominote Mizilman, laplipar dan klas travayer ek tipti lantrepriz. Alor, Sitadel, li santral. Li paret enn bon plas kumans enn lamars, sirtu enn lamars enn lorganizasyon otur enn kominote relizye. Lerla, u pe inform tu dimunn otur ki lamars inn kumanse. 

Asterla, ankor inpe kontex. 

Sa konser la li ti organize par patron lotel, grup Attitude. Kuma tu patron, zot pa mazinn sinbolism Sitadel. Zot pa kone kisannla res pre. Zot pa kone pu ena enn lamars landime. Zot ti invit enn parter dimunn ki ena ase kas pu pey biye ser, e manze-bwar ser. Patron lotel, nu sipoze, pa mazine ena enn zenosid pe derule. Lerla, patron ti pu pran sa kas zot pu leve ar dimunn eze la, donn sek Rs 40,000 ar 4 diferan ONG. Alor, ena delege sa 4 ONG prezan, zot osi. Zot pa finn kapav pey sa manze-bwar laba, an-pasan. Patron lotel inn osi lwe mizisyin – mizisyin ki abitye depann lor patrona pu gayn kontra. Organizater ti osi fer enn espes “promes” ki pu ena enn “sirpriz” pu lafin konser. E dimunn pa ti kone ki ete sa sirpriz la. Kapav ena dimunn finn devine. Kapav ena finn mal-devine. Nu pa kone. “Sirpriz” pu enn laful dimunn, li tuzur inpe patronizan. E parfwa, li kapav mem danzere. Antuka, sirpriz la, ti anfet enn sante par konpoziter-santer lamizik reggae, enn Zionist, ase notwar komtel, apel Matisyahu – ki revandik sa “Lape” dan sante ki Leta Israel revandike: setadir lape san Palestinyin. Resaman, 2-3 zur apre Hamas so inkirsyon dan Israel Matisyahu finn mem dir, e mo site: “Seki pa ar Zwif, kont Zwif” dan kad sa zenosid ki Israel pe perpetye. Sa, li kareman enn pozisyon Zionist, ki melanz Zwif ar Zionist.

Azut ar sa, le 21 Oktob ti zurne Fet LGTB dan enn moman kot finn kumans, erezman, dekriminaliz omosexyalite dan Moris. Dan lepase finn deza ena konfrontasyon depi inpe fondamantalist anti-LGBT sa zur anyel la. Sa finn provok spekilasyon ki kapav-et ena lyin ant dimunn ki finn kraz konser ek dimunn ki vyolaman opoz drwa LGBT.

Antuka, sa grup la finn kraz enn konser. 

E, li drol, me ena enn etranz leko manyer ki Hamas (ek lezot grup arme dan Gaza) finn atak e mem tuy dimunn ki finn fer enn konser pu lape – e sa osi zot finn fer enn konser pu lape dan enn plas pli pir, sinbolikman parlan, ki Sitadel mem. Zot ti fer li akote sa miray Leta Israel finn batir pu anprizonn 2.3 milyon abitan Gaza lot kote miray la dan enn kan konsantrasyon. Alor, laba “konser lape” ti inapropriye, pu pa dir kriyel, kan li akote miray Apartheid. Isi osi, ena kontex. Me, isi nu pa su lokipasyon militer Israel, alor nu pena drwa – ni par lozik, ni par lalwa – kuma lepep ki okipe militerman, kuma Palestinyin ete par Leta Israel, pu ena rekur a vyolans. (Anfet dan Moris, nu su lokipasyon militer UK-USA, bizin rapel! Me, sa enn lot size – mem li liye.) Alor, kraz konser, li klerman grav. Dan LALIT nu kondann sa aksyon la. Bizin ena ka kont tu sa dimunn inplike ladan. Buku deza finn arete, kuma nu finn dir. 

Tusala pu dir lefe sa atak kont konser la, li finn lev kominalism enn kran dan nu prop pei. Li pu sa rezon la ki nu anmemtan kondann sa akt kraz konser – san rezerv – anmemtan sey konpran so kontex. Aksyon la fode pa enn pretex pu lezot dimunn derape, atribye sa aksyon a dimunn ki pa inplike ladan ditu.

Nu bizin kapav dekod sa kalite evennman la par nu-mem. Kumsa nu kapav vinn pli matchur, pli saz, kuma enn lepep. Nu bizin rod laverite, dan tu so konplexite, pu ki nu ariv seki pli sinp: veritab lape ki pu vini dan Palestinn ek Israel kan klas travayer reysi amenn dekolonizasyon, lazistis, laliberte

[Koreksyon 8 Novam 2023 @ 8:10am: "silo" a "dilo"]