LALIT akiz Israel ek USA Prosed ar Zenosid Anonse
01.11.2023
Zordi nu lir let demisyon enn top sef Nasyon Zini, Craig Mokhiber, ki direkter Biro Drwa Imin (OHCHR) dan New York. Li dir, avek rezon, ki UN finn sede a pwisans USA e a lobi Israel. Li dir seki Israel, avek sutyin USA, pe fer, li enn “zenosid”. M. Mokhiber finn akiz lapres-TV prive dan Loksidan det konplis, kan li konstaman dezimaniz lepep oprime ek kolonize Palestinyin. Mo pu sit li an Angle, depi so let demisyon: “This is a textbook case of genocide,” li dir, “The European, ethno-nationalist, settler colonial project in Palestine has entered its final phase, toward the expedited destruction of the last remnants of indigenous Palestinian life in Palestine.” U kapav koz pli presi, pli vre, ki sa?
Pei Lamerik Latinn kumans ferm Lanbasad Israel kot zot
Anmemtan, Bolivi finn kareman ferm Lanbasad Israel dan Bolivi. Sili ek Kolonbi finn sispann lyin diplomatik. Tu pei bizin fer kuma sa trwa pei Lamerik Latinn.
Dan Moris, tu kuran politik atak Israel-USA
Dan Moris Lindi dan Forum organize par Friends of Al Aqsa, orater diferan kuran politik ti pran pozisyon ferm, enn apre lot, anfaver seselefe imedya, e anfaver izolasyon total Israel. Jean-Marie Richard, lor nom Friends of Al Aqsa ti prezide, e li finn prezide dan enn fason mazistral, kare-kare denons zenosid par Israel, apel o-e-for pu enn seselefe, exziz Israel met fin leta-desyez ek lopikasyon. Ansyin Prezidan Repiblik Cassam Uteem, li osi, pran enn stenn ferm net. Li ti koz avek presizyon e avek pasyon. Li enn kikenn ki tutolong so lavi finn dibut ar Palestinyin dan zot lager kont kolonizasyon. manb LALIT Alain Ah Vee ki ti pran laparol lor nom SOMALP (Solidarite Morisyin Ar Lepep Palestinn), ti apel, li osi, pu enn seselefe imedya, anbargo zarm kont Israel, demantelman sistem Apartheid Israel, izolasyon total Israel-USA, ki pe perpetre sa zenosid la. Vijay Makhan, li osi, denons Israel, amizir dan so diskur, li met sa zenosid la dan so kontex istorik. Dan sa Forum Minisipalite Port Louis la, parey kuma lor Program Radio Plus, pa ti ena enn sel partisipan ki sutenir seki USA-Israel pe fer dan Palestinn. Ki sa dimunn ki kapav sutenir enn zenosid? Enn zenosid anonse. Enn zenosid kolonyal. Li enn zenosid par enn Leta, Israel, organize e arme par pwisans militer pli for lor later, USA. Li enn zenosid ki nu napa kapav niye. Li pe derule divan nu lizye an-layv.
Izolasyon
Tusala pu dir sa lalyans “Israel-USA” pe truv li izole. Mem Lerop ena pli buku pei manb EU kont li ki pu. Dan Gran Bretayn ena zis 8% popilasyon ki sutenir politik Sunak pu arm e finans Israel. 8% dan enn76%, deza avan 20 Oktob, ti anfaver enn sese-lefe imedya. Prezidan Erdogan ki so pei Latirki manb USA so pak militer, NATO, finn pran laparol dan enn manifestasyon plis ki enn milyon dimunn anfaver Palestinyin, apel Israel so aksyon militer Gaza “fuka” (madness). E li ena rezon.
Israel perpetre enn Zenosid an-direk
Seki kler se Israel-USA pe prosed sistematikman ar enn zenosid anonse kont lepep Palestinn, sirtu dan Gaza, me osi dan Wesbank ek Zerisalem E anmemtan.
Zame dan listwar limanite nu pa finn ena maler pu swiv an-layv enn zenosid. Zame. Limanite finn deza ena enn zenosid anonse, e lerla inplemante: Leta Lalmayn ti anons so zenosid lor lepep Herero ek Nam 100 an desela, e finn exekit so menas. Me, zame dan lepase nu pa finn truv enn Leta swiv so menas ar inplemantasyon an-layv:
- Israel ar kudme USA, dan lespas 3 semenn, finn obliz par santenn-de-mil dimunn fwir zot lakaz. Sa kalite deplasman forse, li enn krim kont limanite. Lamwatye popilasyon Gaza finn terorize par Israel ek USA pu fors zot fwir zot lakaz, al rant dan enn “kan konsantrasyon” vertyel, dan landrwa kot lot lamwatye dimunn Gaza viv. Pel mel. Israel avek konplisite Biden pe mem donn instriksyon ki dimunn Gaza ferm tu lopital dan lenor Gaza, ferm zot an-antye, e buze depi enn lamwatye Gaza ar lot. Sinon Israel pu obliter tu. E li pe fer li, deza. Kan dimunn pe fwir anmas, lerla ki o-nom-de-dye Larme Israel, avek so ami USA, fer? Ki zot fer? Zot bombard zot, tuzur. Seki finn ekute, fwir, bonbarde. Seki reste akoz li pa ule buze, pa kapav buze, tro per pu buze, li osi, li pli bonbarde ankor. Li oblitere. Anmemtan, dan Wesbank, kolon ilegal pe gayn proteksyon larme Israel, finanse par USA, pu tuy Palestinyin ki pe kas zot zoliv dan plantasyon, fizye zot, ubyin menas Palestinyin ki pe al okip zot muton ek kabri lor zot prop laferm. Anmemtan, dan Zerisalem Les, kolon ilegal, avek proteksyon larme Israel ek zarm USA, pe avoy salte lor lakaz Palestinyin, solda pe kareman sel laport zot lakaz ar lasudir, fors zot lev pake, fami la an-antye, ale.
An-Direk
Israel ek USA finn anons sa zenosid avan, e zot pe exekit li. E li pe derule lor Televizyon ek rezo sosyal layv-enn-direk. Li monstriye. Li enn kriyote obsenn. Li enn kolonizasyon Oksidantal kareman barbar perpetre par de leta. Li enn krim kont limanite kuma zame pa finn ena. Li baze lor enn filozofi Apartheid, ki li osi, li enn krim kont limanite. E, li enn zenosid. Li kareman enn zenosid. Dan LALIT, nu donn sa stratezi Israel ek USA so nom: li apel “zenosid”. Li zenosid par enn pwisans kolonyal. Li zenosid par enn Leta, par enn okipan, ki finn inpoz enn leta-de-syez depi 17 an, e ki asterla finn vinn, dan Israel so langaz “total”. E leta-desyez la fer ar sutyin a-ot-vwa Leta Zini. Zot ferm tu dimunn Gaza andan dan Gaza depi 17 an. Si kikenn oblize sorti, ki so sor? Li pa kapav returne kot so lakaz. Asterla, Israel ek USA finn, depi 3 semenn aplik enn leta-de-syez ki Netanyahu apel “total”, pe sey fors tu dimunn Gaza fwir ver Lesid Gaza, lerla Israel ek USA pu fer zot fwir depi Gaza net, sey fors zot rant dan Lezip. Sinon, Israel ar so zarm Amerikin la, li pu prosed ar so plan obliterasyon.
An Detay seki Israel ek USA pe fer
- Israel, arme par USA, finn inpoz enn leta-desyez militer konplet lor Gaza: Israel avek so zarm Amerikin, li kontrol Gaza depi lamer, depi later, e depi lao. Li finn pran lespas aeryin pu so bombardye fer vat-e-vyin, larg bom, inklir bom fosfor, lor ti-baba dan Gaza. Lor vye gran dimunn. Lor fam ki pe akuse. Lor dimunn pe fer dyaliz. Lor pasyan avek kanser. Lor tu seki apel enn Palestinyin. Lor 50 staf UN dan Gaza. Ayropor Palestinyin dan Gaza finn bombarde depi lontan. Lamer finn barikade net depi lontan. Asterla Mediterane antye barikade par port-avyon USA, larme pli menasan dan lemond. Later sa but Palestinn ki apel Gaza li anserkle par militer Israel-USA. Tu krosing pu rantre-sorti depi Gaza finn ferme. Apar, parfwa, kan Israel ek USA ule, zot permet luvertir enn krosing ant Palestinn ek Lezip, ant de lezot pei silvuple – si u kapav mem konpran enn fraz otan absird – pu enn-de kamyon traverse avek dilo pu bwar, manze tibaba, enn-de medikaman pu lopital ki Israel-USA fini bonbarde.
Tusala konstitye “zenosid”.
Definisyon Zenosid
Dan Lalwa internasyonal krim “zenosid” definir kuma “lintansyon detrir, antye ubyin anparti, enn grup nasyonal, etnik, rasyal ubyin relizye” (Konvansyon UN 1948 lor Prevenir e Pini Krim Zenosid). Le 10 Oktob 2023, Minis Defans Israel Yoav Gallant finn dir, “Nu pe inpoz enn leta-desyez total lor Gaza. Okenn elektrisite, manze, dilo, karbiron. Tu pe ferme. Nu pe lager kont zanimo imin, e nu pu azir dapre sa.” Prezidan Biden inn exprim so sutyin total, e finn dekrir Hamas so mert kont dimunn sivil dan Israel – ki efektivman enn krim deger dapre lalwa internasyonal – pa kuma enn krim deger, me kuma “enn aksyon lemal inkarne” – setadir li finn suzantand tu Palestinyin “lemal inkarne” e pa finn dir militan Hamas ki finn fer sa debordman la apre ki zot ti reysi defons miray 24 plas, al sezi sa 11 baz Israelyin ki anserkle Gaza, met zot KO finn komet enn krim deger. Enn sef deta kuma Biden pa kapav koz kumsa. Sa kalite langaz relizye e siperyer, kan li akiz pa-kone-kisannla det “lemal inkarne” (an Angle “sheer evil”), li klerman deziminiz tu dimunn Palestinn. Enn sef deta ena devwar dir Hamas enn muvman rezistans dan kad enn lokipasyon militer kolonyal. Lalwa internasyonal rekonet sa kategori la kuma dimunn ki pe lite kont kolonyalism e anfaver liberasyon nasyonal – kuma Nelson Mandela, ki li osi, USA ti dekret enn “teroris”. Biden pa gayn drwa li, zis dekret dimunn “teroris” e lerla servi sa pu zistifye Israel so krim kont limanite, so Apartheid, so lokipasyon, so Leta desyez, so bonbardman ek tuyri plis ki 8,000 sivil, parmi lekel de-tyer zanfan, fam ek vye grandimunn. Ki pe ariv limanite, nu dimann nu.
Li vo lapenn nu gete ki Konvansyon UN kont Zenosid dir. Li liste 5 aksyon ki konstitye zenosid. Israel ek so USA pe deza perpetre trwa dan Gaza: “1. Tuy dimunn dan enn grup. 2. Fer ditor fizik – ki li fizik ubyin sikolozik – manb sa grup la. 3. Par expre, infliz kondisyon lavi kotidyin lor enn grup ki viz pu amenn destriksyon fizik sa grup la – swa antye ubyin anparti.
Larme Israel finn aret dir komye bom li finn large lor Gaza – telman sif la pu pruve ki zot pe perpetre enn zenosid. Zot prefer gard li sekre.
PS Epdeyt: Le 2 Novam 10:37 am nu finn presize dan 2yem paragraf ki Alain Ah Vee" ti pe pran laparol lor nom SOMALP antye pa zis lor nom LALIT. Eskiz a lekter.
