Enn Kritik kont Minis Ledikasyon lor Extended Stream
22.08.2023
Mo pe partaz enn kont-randi enn sesyon brifying lor "Extended Stream", ki ti ena Vandredi 18 Ut 2023. Minister Ledikasyon ti konvok profeser ki anseyn "Social & Modern Studies" (SMS) dan Grad 9 kote "extended+". Tem ti “Accommodate Students of Extended Stream” pu lexamin National Certificate of Education (NCE) pu Grad 9 an 2023.
Rankont la ti fer dan World Hindi Secretariat dan Phoenix.
Ti ena plis ki enn sinkantenn edikater prezan depi diferan rezyon Moris. Responsab Minister, Sarvesh Hurry, ti anim sesyon. Li enn lekcherer MIE. Li finn introdwir rankont par dir ki bi se pu ed zelev pu gayn meyer pwin e li finn azute ki nu pa la pu diskit filozofi NCE, ni remet an kestyon desizyon polisi. Apre 3-4 slayd show lor model kestyoner lexamin pu size "SMS" an 2022, li finn apre uver diskision par dimande si nu ena kestyon e dimande ki nu, antan ki edikater, nu panse. An 2018 ti ena enn total 12,273 zelev ki ti anrezistre pu rant dan klas "Extennded" dan diferan kolez.
Mo finn intervenir par rapel tu kamarad profeser prezan ki, swit-a Kestyon Parlmanter Lider Lopozisyon, nu ti aprann ki, lor 1,956 zelev ki finn konpoz pu premye fwa, lexamin NCE an 2022, zis 71 zelev finn pase. Ena 9,849 zelev ki finn kite, 468 ki finn refiz konpoz NCE.
Buku dant nu ti ena lespwar ki dan sa workshop la pu ena propozisyon konkre lor kuma truv solisyon pu rezud problem 62% esek dan Social and Modern Studies, ubyen pu dimann nu fer propozisyon konkre lor ki kapav fer pu met enn meyer sistem anplas, etan done ki se nu ki travay avek bann adolesan ant 12 a 16 an tulezur. Nu ti usi panse ki, etan done ki Minis Ledikasyon ti dir dan Parlman ki ena enn platform profeser lor "best practices", meyer metod, ki nu pu kapav fer propozisyon pu azut dan sa platform la. Sirtu apre ki Vis Premye Minis ti deklare ki zot pe etidye enn nuvo sistem evalyasyon. Me responsab Minister finn dir nu, tu doleans ki zot ena pe rikord. Nu finn dimande eski Minis Ledikasyon pu ekut seki nu pe dir. Li finn reponn ki li pu fer zefor pu ki rikordying ariv ziska Minister.
Li enn problem grav ki lor 649 zelev ki finn opte pu Social Studies dan G9 Ext+, 403 zelev finn gayn mwins ki 35 pwin lor 100. Omwin responsab Minister finn montre enn sinserite par dir ki li rekonet ki avek rezilta 2021-2022, ena enn zafer pa bon.
Me preske nu tu finn santi enn revolt, enn desepsyon ek enn lakoler kan solisyon li finn propoze se zis pu met pli buku foto dan bann kestyoner. M. Hurry ki enn pedagog ki form profeser dan Repiblik Moris dir ki kan zelev pu “Look at pictures, they can understand what to do” (Get foto dan kestyoner, lerla zot pu konpran ki bizin fer). Eski se sa ki nu pe aprann pu anseynye? Antan ki reprezantan MIE li pe popilariz lide ki nu bizin fer zelev adapte par rekonet ubyin dekod sertin mo dan enn fraz konplet pu zot sey konpran ki ena dan kestyoner. Se kumsa li dir zot panse ki zelev pu kapav reponn sertin kestyon bazik, mem pa tu? Nu truv sa kalite solisyon la abetisan. Li inportan nu fer rapel ki dan enn lartik lagazet Le Mauricien 15 Ut, Minis Ledikasyon finn donn instriksyon pu ki bann korekter mwin sever. Me responsab Minister pa finn donn detay kivedir mwins sever kan korize.
Li pu interes buku paran ki ena zanfan dan "extended stream" kone ki ena progre dan lapros profeser "extennded", setadir okenn profeser pa finn kont lide itiliz langaz maternel kuma medyom lanseynnman. Dayer, laplipar edikater deza konsyan ki, si poz zelev kestyon oral an Kreol Morisyin, zot byin suvan kapav reponn byen.
Ena 2 rezon pu sa;
Premyerman se parski preske tu profeser deza explik nu size an Kreol dan klas.
Dezyem rezon seki zelev ki reysi metriz lekritir langaz maternel kapav donn bon repons an Kreol.
Mo finn dimann enn eklersisman lor sa laspe la. Radyo Plus semenn dernye finn raporte ki dan enn sa bann sesyon briefying la inn dir ki, si aprenan met bon repons an Kreol Morisyen, donn zot zot pwin. Kan mo finn dimann konfirmasyon sa deklarasyon la e dimande ki MES met li an ekri, responsab MIE pa finn konfirm sa linformasyon la. Li finn dir etan done ki ena buku korekter NCE prezan dan lasal, eski zot kapav dir nu ki zot fer dan enn tel sityasyon. Sertin profeser inn dir nu donn pwin pu bon repons mem repons la an Kreol. Enn lot profeser inn dir ki dan enn workshop onnlaynn lane dernye, M. Armoogum, ki ti responsab, inn dir non pa bizin donn pwin. Sa finn fer nu realize ki pena lakorite ant ofisye Minister Ledikasyon ek MES si zelev bizin gayn pwin ubyin non, kan zot met repons an Kreol Morisyen dan zot kestyoner lexamin.
Lor sa pwin la li finn azute ki fode, sirtu pa, nu ankuraz zelev ekrir an Kreol. Mo finn intervenir par dir kuma u kapav dir sa, kan pursantaz reysit dan filyer extennded li pli ot pu size Kreol Morisyin ki pu tu lezot size, setadir 61.3%. Tandi ki, par exanp, an Angle ena zis 13.5% reysit. Kuma enn aprenan ki pa konpran kestyon an Angle pu kapav met bon repons an Kreol? Se pu sa rezon la ki mo finn sulev demand ki ena kestyoner lexamin bi-ling (Angle ek Kreol Morisyen) kuma Ledikasyon Pu Travayer finn propoze. Pu sa, evidaman, nu pu bizin sutyen pedagog MIE dan enn letap tranzisyon ziska ki langaz maternel vinn medyom lanseynnman pu ed edikater tu size pu tradwir konsep ki ena dan liv depi Angle ziska Kreol e ki sa travay la bizin kumanse vit. Kuma statistik MES montre zis 264 zelev inn pase lor enn total 1,950 an Angle. Savedir ki zelev pa pe konpran kestyon an Angle e pa pe kapav ekrir repons. Ni pa pe kapav reponn kestyon Matematik (zis 9.8% inn pase), Syans (zis 19.9% inn pase), ICT (zis 35.9% inn pase), Technology studies (zis 16.6% inn pase), Bizness & Antreprenership (zis 18.4% inn pase) parski tu kestyon an Angle. Tu sa size la konsidere kuma form parti seki apel ledikasyon debaz. Pu reysi gayn plas dan MITD aprenan bizin pase dan 3 core subject ek 3 lezot size opsyonel.
Malgre tu zefor ki profeser pe fer ansam avek zelev, apre 4an dan segonder, sistem ledikasyon pe re-kraz konfyans zelev dan zot mem apre esek dan PSAC, re-kraz konfyans profeser dan zot mem apre esek dan PSAC. Nu bizin salye zefor imans ki buku profeser, ek osi lezot fasilitater pe fer kan zot pe sey donn enn ankadreman alafwa kuma paran, psiklog, ners, speech terapis. Par fwa, nu truv nu rol byin vast. Depi rod manze pu zanfan ki pena ziska redonn tu sa zenn la konfyans dan zot mem. An 2018, kan li ti travay Minister, Menon Munien ti dir ki Minister pu donn tu sa ankadreman a tu sa nivo la pu inklir tu zelev dan ledikasyon kan pe fez-awt Prevok. Sete enn mezir ki ti valab pu ankandre etidyan e ki zelev onivo meynstrem usi ti bizin benefisye. Me sa kalite sutyen pa finn vini dan enn fason sistematik ek dan kantite ki bizin. Li inportan ki MIE re-get tu sa travay imans ki Prevok-BEC ti deza fer alepok, avek sikse, anterm medyom Kreol pu zanfan. MIE pa bizin re-invant laru net depi kumansman. Travay la fini kumanse alepok. Ena zis pu re-pran kot ti deza arive. Mem si plizir dant nu finn montre nu dezakor, ofisye Minister Ledikasyon S. Hurry finn zis kapav reponn, tu doleans ki zot ena pe rikord e li pu raporte a MES ek Minister Ledikasyon. Me li li pa pu kapav fer nanyen ladan. Enn koleg depi kolez BPS finn dir sak fwa zot fer nu vini pu workshop nu dir ki sistem aktyel pa adapte a nu zelev. Ena problem onivo medyom instriksyon. Me zot pa pe ekut nu kontestasyon. Li finn dimande kifer eski pe penaliz zanfan kumsa? Li finn azute ki u pe dimann nu propozisyon me pena kordinasyon ant MIE, MES ek Minister Ledikasyon. Enn lot koleg ki travay dan enn Kolez Deta finn dimande me kot sa “decision taker” ete? Kifer li pa la pu reponn nu si u, u pa mandate pu donn nu bann repons? S. Hurry inn dir ofisye ki sipoze prezan pu MES anretar, me ziska lafin nu latelye li pa finn vini. Apre plizir kritik li finn bizin admet ki li rekonet ena enn problem debaz lor literesi ek nimeresi parmi zelev. Enn lot koleg finn dimande si pu ena enn papye lexamin separe spesifik pu extennded. Repons ki nu finn gayne seki Minister inn dir pu ena me pa kone kan. Me M. Hurry rekonet ki anmemtan nu dan enn dilem parski nu finn siynn lakor Konvansyon lor Drwa Imin pu aplik enn politik edikatif ki inklizif. Me kan nu get nomb zelev extennded ki pe exlir par to esek e osi par lefet ki zot pena enn plas asire dan okenn institisyon, mem enn institisyon teknik, nu ankor enn fwa, fer tu dimunn kone ki sistem anseynman extennded ek so lexame aktyel li pa pe reponn a bezwin zenes zordi e li pe kontinye exklir zot.
Depi enn-de edikater prezan, nu finn usi tann enn-de fos demand ki pa pu tir nu dan problem kot nu ete, kan nu byen gete, me pu plito fer nu pyetinn anplas e kontinye konplis avek enn sistem ki viz pu fer par milye zelev eswe. Par egzanp, enn profeser inn dimande eski kapav ena riyder (ki lir kestyon la a ot vwa) pu zelev extennded dan lexamin. Me byen vit buku ant nu finn truve li pa solisyon. Li pa enn solisyon parski enn koz prinsipal esek seki zelev pa konpran kestyon ki pe poze an Angle dan kestyoner, ki li an ekri ubyin oral. Si ena enn dimunn ki lir kestyon la, li pa pu enn led ditu. Okontrer olye nu atenn obzektif pu viz fer zelev vinn otonom dan zot aprantisaz, propozisyon viz pu azut enn nuvo beki ki pa viz ed zelev pu kapav lir, konpran e reponn. Sertin finn usi propoze ki de-lod program e eliminn sertin konsep kuma "taxasyon". Me eski enn zelev ki pu al aprann fer travay mason, elekstrisyen, estetisyenn, kutyeryer, eski li pa bizin aprann ki tax li enn mekanism atraver lekel Guvernman zener bidze pu mintenir sevis Welfer Steyt, kuma ledikasyon gratis ek transport gratis, par egzanp. Nu anseyn Social Studies pu zelev la konpran nu sosyete, pu ki dan lavenir zot kapav kontribye, nu espere, ansam avek nu tu, pu amenn plis lazistis ek egalite e pu asire ki tu dimunn dan klas travayer ena akse a servis esansyel. Li pa zis enn kestyon dan liv. Li afekte realite. Nu usi anseyn Social Studies pu zelev devlop enn lespri kritik, e pu li kapav partisipe aktivman pu sanz sosyete pu ki travay manyel gayn mem valer kuma tu lezot travay profesyonel. Bi anseyn Social Studies li viz pu ki ansam nu kapav revandik egaliz lapey e pa zis promuvwar politik emigrasyon tu nu zanfan, export zot dan enn lot pei kot saler travay manyel pey inpe plis ki saler manyel dan Repiblik Moris.
Pandan sa sesyon la, tu profeser prezan, mo krwar, nu finn vinn konsyan ki nu pa kapav depann lor fonksyoner ki alatet institisyon edikatif pu rezud sa problem la.
Nu finn ariv enn staz kot nu bizin organize, nu-mem, e nu bizin mobilize dan nu sindika e ant nu, pu deside ki pu fer pu ki nu sanz sa sistem la. Si zenerasyon profeser militan avan finn reysi amenn lalit ansam avek etidyan Me 75, pu ki nu tu gayn ledikasyon gratis ek drwa pu profeser sindike, kifer nu pa kapav re-mobilize zordi? Ler inn vini. Bann demand Muvman Me 75 bizin kontinye apiye, kuma fer medyom lanseyman vinn dan langaz Kreol Morisyen.
Personelman, mo finn realize ki bi sa sesyon brifing la, pa ti viz pu re-os nivo kognitif tu aprenan dan Grad 9. O-kontrer, propozisyon servi plis desin ek foto dan kestyoner, li paret viz bes nivo kognitif. Solisyon ki Minister pe propoze se zis pu esey remont nivo reysit enn tigit (ogmant sif) si kapav, kuma enn bon bilan pu servi dan prosin eleksyon. Nu finn mem realize ki Minister Ledikasyon pena okenn lintansyon ni okenn volonte politik pu sanz sistem evalyasyon aktyel, ni sa lane, ni pu lane prosenn, ni zame. Apre 4 an dan enn sistem ledikasyon, reprezantan Minister pa finn mem kapav dir eski sa lane la pe fer provizyon pu ki tu zelev ki pas par "extended stream" gayn enn plas pu aprann enn metye dan MITD, IVTB u lezot institisyon teknik-guvernman e sa apre ki Minister Leela Devi Dookun finn rekonet ki pena ase plas pu tu zelev extended.
Nu pu bizin mobilize -- profeser, zelev, paran -- pu obliz sanzman la vini. Li enn lalit politik inportan divan nu tu zordi.
CC
