Chalennj Konstitisyonel kont Atak lor “Sitwayennte Morisyin par Maryaz

25.07.2023

VANDREDI 28 Ziyet dan Lakur Siprem Nimero 3, lor 9yem letaz, Lari Edith Cavell a 10:30 pil, ka Lindsey Collen pe pran pu “argiman” dekote. Argiman pu lor kestyon “eski Lindsey gayn drwa met sa ka la?” setadir, eski li ena “locus standi” (an Latin) pu met ka. Li staz ki apel “in limine litis” (tuzur Latin), setadir nu bizin kapav travers “linto laport” pu rant dan ka la.

Rapel ki sa ka, ki LALIT pe sutenir, finn mete pu chalennj amandman Guvernman Jugnauth ki fraziliz sitwayennte dimunn ki finn gayn nasyonalite Morisyin atraver maryaz. Enn Premye Minis (aktyel kuma fitir) kapav met sa kalite sitwayin deor san mem dir kifer. Sa vedir li konsantre plis puvwar ankor dan lame Premye Minis. Ka la, akoz li inportan, li pu pase divan 2 ziz Lakur Siprem, Ziz Chan Kan Cheong ek Gunesh-Balaghee.  Ena enn sel ka fixe divan zot sa zur la, alor li pu kumanse 10:30 preske pil. Nu avoka, Me Antoine Domingue ek J-Claude Bibi, ek avwe Ayesha Jeewa, zot tu pe travay pro-bono (tuzur Latin, vedir san pran enn su).

Ka la pu byin interesan. Li konsern preske totalite fami, tu dimunn, dan Moris, Rodrig, Agalega, Chagos. Li enn ka ki konsern preske tu drwa konstitisyonel, osi. Par swiv ka la, nu gayn enn apersi lor lalwa konstitisyonel, ki ete sitwayennte, ki relasyon ant Guvernman, Parlman ek Zidisyer, e ki ete drwa fondamantal.

Ka la finn dan Lakur Siprem pre enn an. Sa pu fer 10yem fwa nu – sak fwa ant 15 ek 35 dimunn – finn prezan dan lakur pu exprim solidarite. Me, la, li pu kumans traverse vit.

Ala detay:
LAKUR SIPREM Nimero 3, 9yem letaz, Vandredi 28 Ziyet a 10:30 am. KA LA PU PRAN.