Dan Vakim enn Administrasyon Rezyonal Inexistan …
04.07.2023
Alors ki lapres ek lopozisyon pe, avek rezon, konteste ranvwa eleksyon rezyonal – ki extreman grav – zot pa koz otan lor kimanyer, ofet, Minisipalite ek Distrik Kawnsil pe anmemtan sibir enn pert puvwar, ki sa osi, li byin grav.
Gradyelman, biro PM desid tu. Biro Premye Minis desid tu seki Minisipalite ek Distrik Kawnsil ti pe deside. Non, manti. PMO desid preske tu. Ena enn lot deriv osi, sinon plis, danzere.
Dan vakim kree par enn administrasyon rezyonal redwir net, e dan enn lepok kot privatizasyon e liberalizasyon kapitalist pe donn bal, se sekter prive ki amenn sa rol la a-laplas. E sa, li enn destriksyon demokrasi ki pe fer lor enn nivo pli trakasan ankor. Sirtu dan lakanpayn, kotsa proprieter tablisman ena buku, buku later. E, an-retur, tablisman viz “lezitimiz” so bann proze IRS kot bayant later, uswa Smart City, ki mem kalite destriksyon later. Li servi so “bon ev” kan li sezi puvwar ki Distrik Kawnsel ti ena avan, pu kuver so devastasyon pei, kan li pe bayant later agrikol, betonn li pu milyarder aste, plant gazon pu terin golf pu dimunn ris.
LALIT inn byin denons proze IRS ek Smart City kuma enn form “devlopman” danzere pu pei. Me, ansam ladan ena enn lot “devlopman” ki pe arive, kan proprieter later ki amenn so proze Smart City ek IRS pe isirp puvwar ki Distrik Kawnsil ti ena. Dayer, pu rann sa “devlopman” pli sinist, ena enn lanpir lapres, an-okirans La Sentinelle, ki li anfet dedye enn magazinn pu promuvwar biznes imobilye de lix a milyoner etranze. Alor, u truv proprieter tablisman Medine pran sarz fer planifikasyon pu “Lwes” antye. Enn tablisman li pa enn antite eli, li. E, li finn isirp puvwar planifikasyon teritoryal.
Donk, enn kote, proprieter tablisman pe kree so bann prop ti lavil prive – e lot kote, administrasyon lokal pa futi pran linisyativ, fer enn devlopman kelkonk pu abitan, par li mem.
Dayer, guvernman ena enn Smart Cities Scheme, ki finn swiv so bann IRS – e li donn permi pu tusala. Savedir guvernman dakor ar sa sityasyon ranplas lotel guvernman ar kontrol par konpanyi prive.
Kan, par exanp, konstrir By-pass Verdun – manyer inn aranze, avek so lapist siklab ki byin bon, kan get byin, enn zafer ki ti oredi et inisyativ distrik kawnsil Moka, li ofet enn kolaborasyon ant PMO (a traver RDA) ek proprieter tablisman (atraver ENL). Distrik Kawnsil Moka pena okenn lamin ladan ditu. Omwin antan ki nu pe truve.
Lerla-mem nu gayn enn pli bon konpran kifer ena otan devlopman dan No. 8. Li pa zis akoz se sirkonskripsyon kot Premye Minis Pravind Jugnauth inn eli. Li osi anmemtan parski laba, proprieter tablisman pe kolabor ar PMO pu ranz kiksoz grandyoz (e lerla fer pri later monte, il-va-sandir) ki dan so lintere ekonomik. Se sa ki nu pe temwayne.
Dan lavil, se sekter prive, ankor enn fwa, ki fer demars pu tu kalite devlopman kiltirel ek sosyal. Depi so konser, book launch, exibisyon lar, teat, ziska so deba lor klima, lamars de fyerte, Porlwi by Night, Food festivals, konstriksyon batiman sportif, foot five, klas Zumba, gym, etc, ziska par rul Metro, aranz kartye kuma Caudan, e zer lagar Victoria.
Lot kote, Distrik Kawnsil Moka paret ena enn (1 sel) ivennt dan antye lane 2023 – enn “Clean Up Day”, le 18 Septam. Minisipalite Porlwi lor so websayt, so dernye “ivennt” dat depi 2019. Parkont, fode get lalis tenders! Enn pu sak semest finansye, san fot!
Sa fer nu poz kestyon lor natir nu bann Minisipalite ek Distrik Kawnsil. Ormi et enn bann akseswar politik pu ki rezim o-puvwar sipozeman montre ki li ankor for elektoralman, ki pena valer kan li ranvway eleksyon, a kwa bon ki Biro Premye Minis kastre administrasyon rezyonal a sa pwin la, pu ki, kan retard eleksyon minisipal ek rezyonal, ofet li pena otan lefe akoz Guvernman inn permet sekter prive finn aras tu so veritab puvwar pu fer planning. Tu sa puvwar ki li’nn retire depi minisipalite ek distrik kawnsil la anfet vinn afebli pa zis ladministrasyon rezyonal, me leta, li-mem, vizavi sekter prive.
Enn kleptomani puvwar ki lerla servi seki li reysi anpose pu sey aste faver politik depi elekter dan prosenn eleksyon zeneral. Lerla li sed puvwar ar sa sekter prive ki tini li anplas. Li byin malsin.
Nu bizin lans deba lor ki pu fer pu ki lamas dimunn re-sezi kontrol lor demokrasi rezyonal. Dabor, larg eleksyon minisipal, answit aprofondi so demokrasi.
GH
