Zurne Aksyon kont PUMA zordi, Samdi 24 Zin
24.06.2023
Kanpayn boykot tu prodwi PUMA pe pran lanpler. Komite Nasyonal BDS Palestinn ti dekret le 24 Zin enn Zurne internasyonal boykot kont PUMA.
Dan Moris, plizir lorganizasyon manb Solidarite Morisyin Avek Lepep Palestinn: Non a Aparteid Israel!(SOMALP), finn sutenir sa kanpayn la e partisip dan sa Zurne la. Parmi ena LALIT, MLC, CTSPP, FPBOU ki finn pran foto zot manb ar bandrol uswa pankart ‘Boykot PUMA’ e sirkil foto la lor zot sitweb.
Kanpayn boykot PUMA ti lanse an 2018 apre let komin ki 200 klib sportif Palestinyin ti avoy ladireksyon konpayni PUMA pu ki zot aret sponnsor Israel Football Association (IFA) akoz dan IFA ena klib ki baze dan koloni ilegal Israel inn instale dan teritwar okipe Palestinn. Sa kanpayn la pe osi atir latansyon lor move tretman ki futborler Palestinyin sibir. Zot regilyerman viktim latak, anprizonnman e mem truv lamor.
Anfet boykot li enn parmi bann metod ki muvman BDS servi ou aret tu sutyin rezim Aparteid Israel resevwar depi linstitisyon sportif, kiltirel ek akademik konplis ar Israel e depi tu konpayni Israelyin ek internasyonal ki pe opere an vyolasyon drwa imin Palestinyin.
Kanpayn BDS viz osi lezot konpayni kuma AXA (konpayni lasirans), Chevron, HP, Sabra hummus, Siemens, Sodastream.
