Konstriksyon – Enn Mesaz pu Zenn ki Rant dan Konstriksyon depi enn Travayer avek Lexperyans
05.06.2023
Nu ena plezir pibliye enn lartik par LM, enn travayer konstriksyon. Li pe partaz so lexperyans kuma enn travayer dan sekter konstriksyon. Sa lartik enn kontribisyon dan seri “transmisyon akselere konsyans deklas”. Mem si konsyans deklas, li enn konsyans ki reflet lansanb klas travayer dan enn moman dan listwar, li osi vre ki li depann lor lexperyans sak travayer – e lor transmisyon sa lexperyans la a tu lezot travayer dan so sekter, e dan tu lezot sekter. Ala seki sa mason finn ekrir kuma temwayaz ek analiz:
Kan mo ti rant travay konstriksyon, mo ti enn travayer parmi plis ki 1,000 travayer dan enn gran konpayni.
Tu ti ase an-ord.
Mwa, kumansman mo ti enn manev (plitar mo ti vinn mason.) Ti osi ena travayer depi lezot seksyon e osi depi lezot konpayni kuma konkasez. Dan konpayni la ti ena so sofer, anfle, sarpantye, menizye, plonbye, elektrisyin, suder, ferayer, ek seki kas zis zetriye, ziska dimunn pu fer netwayaz.
Nu ti travay Lindi a Vandredi 8 ertan par zur, plis Samdi 5 ertan par zur. Nu ti gayn nu konze sik ek lokal, an-ord. Patron ranburs nu transpor ki nu ti’nn peye. Nu ti anplwaye. Nu ti anplwaye par patron.
Gran mazorite travayer ti travay kumsa.
Pandan 10 banane, mo ti travay kumsa. Mo ti travay pu enn gran konpayni pu lafami Dalais (BCE), apre pu General Construction, e lerla pu enn konpayni dan grup Rawat.
Lerla, ep! kumans gayn travay latas. Apre li finn vinn enn sistem kot nu gayn enn but travay pu rande, apel sa “defason”. Pa kone kot sa sorti. Sa vedir travay kumans gate. Travay latas li pa bon, konpare ar travay kuma anplwaye. Li pa bon pu travayer, setadir. Defason li pli pa bon ankor pu travayer. Seki zenn kapav prodir plis, me seki pe vinn vye, zot pa kapav. Li parey pu seki kumans sufer kit maladi. Li pa futi travay ase. Li inzis.
Apre, plitar patron kumans kareman abiz lor travayer. Sa posib akoz nu nepli anplwaye.
Pa kone kimanyer patron inn reysi sa ku la. Me, mo sey explike.
Anmemtan, patron kumans fer nu travay 45 ertan dan 5 zur, Lindi a Vandredi. Sa osi pa ti enn sanzman pu rann travay pli fasil pu travayer. Li ti vinn pli pir. Kan patron bizin nu travay Samdi, li zis donn lord.
Antretan, patron ti kumans vann so kamyon ar sertin travayer, pu fer sa travayer la vinn enn “ti-kontrakter”. Sa ti arive, mo krwar, omilye bann lane 1990. Kamyon, dapre sa “lavant” la, vinn pu travayer, me beket ki bat beton, e ki atase ar kamyon, li res pu patron. Sa vedir patron kontrol sa su-kontrakter net. Sa vedir su-kontrakter pa kapav mem pran travay ayer.
Enn zur, top manajer, gran sef, ti apel tu travayer, fer kuma enn miting. Li dir nu tu pu vinn ti-kontrakter apartir asterla. Li, li pu donn nu travay defason. Diskisyon leve. Patron pa’le donn lempsem. Travayer inn lev kont li. Travayer pa finn aksepte.
Alor, patron finn aret zot tu. Met tu deor, apar enn poyne. Kumsa, li nepli ena anplwaye. Me, li finn donn lempsem.
Kumsa, sa ti arive.
Zordi, tu inn dereglemante. Li drol terib. Me, patron tuzur kontrol tu. Li kontrol tu.
Me, asterla li ena so gro kontrakter, ki anba li ena so mwayenn kontrakter, e anba li enn seri ti-kontrakter. E sakenn ki travay sipoze anrezistre, gayn enn “BRN” (Business Registration Number), lerla u pe travay pu li kuma enn su-kontrakter, u-mem. U gayn enn “but travay.” Kumsa, sa marse.
Me, li enn lazeng.
Patron vini, li dir li estim enn travay, dizon, Rs1 milyon. Li dir sa. Me, travayer bizin plede, dir “Abe li vo plis ki sa”. Me, travayer bizin aksepte. Lerla, nerport kan patron dir, “Tel but travay pa bon.” Li zis ena pu dir sa. Li kup Rs25,000. Ubyin nu dir nu finn travay valer Rs50,000, patron dir, “Non, u pa finn travay sa”. Enn-enn kut, si patron byin prese pu fini enn travay, li kapav sede, donn plis pu enn travay.
Me, pena lalwa travay, pena prevansyon aksidan, pena ogmantasyon, pena sik lokal. Ena zis enn kontrakter zot avoye, nu apel li “Marsan Siro”. Kan nu byin ankoler, li vini pu koz bon koze ar nu. Se tu.
Lafin bann lane 1990, nepli ena gran konpayni ki anplway buku dimunn. Ena gran patron, wi. Me, li nepli anplway dimunn. An 1999, patron ti donn mwa demisyon. Li ti gard zis seki ena plis ki 10 an servis. Mo ti ena zis 10 an. Li pa ti pran nuvo. Ti apel sa “degresaz”. Alor, tu sa travayer inn swa kareman lisansye, swa konverti an ti-kontrakter, swa patron donn li grad, li vinn supervayzer. Patron, kuma lepok esklavaz ek langazman, inn kumans fye lor pran travayer depi lot pei, fer travay pu li.
Guvernman bizin fors proprieter sa gro konpayni pran travayer kuma anplwaye. Gradyelman bizin evre dan sa direksyon la.
LM
