U ENA ZISKA LE 30 ME PU CHEKE SI U NON LOR LALIS ELEKTORAL
28.05.2023
LALIT pe fer apel a tu so manb, sinpatizan ek elekter ki zot ena 2 zur reste pu cheke si zot nom lor lalist elektoral. Li enn lalist ki re-kree sak lane, e sak elekter li vote, kuma u kone, dan sirkonskripsyon kot li rezide. Drwa devot li liye, avek rezon, ar plas kot u reste. Laba, kot u reste, u gayn drwa vot pu dimunn ki pu reprezant u kuma Depite dan Parlman – ek reprezantan dan konsey vilaz ubyin minisipal.
Rann enn servis osi – pu aprofondi demokrasi – fer tu u vwazin, koleg travay, fami, kamarad dan spor, lamizik, piknik, kone, e fer parey. Kumsa, nu pran demokrasi ki existe deza dan nu lame, e depi sa pozisyon la, nu kapav osi kontiyn lite, ubyin kumans azut nu lavwa dan lalit, pu amelyor sistem la.
Ena 3 fason pu cheke si u lor lalist elektoral:
1. Swa u al gete dan enn Biro (get lalist pu tu sirkonskripsyon ki nu finn marke anba), swa u pran u portab, rant dan seksyon mesaz, mark ELEC, kit enn lespas, lerla met u nimero Kart Idantite. Avoy li nimero 789. Deswit Biro Komiser Elektoral reponn avek enn mesaz ki dir ki kote u nom anrezistre pu vote.
2. U cheke an-personn ZISKA MARDI 30 ME dan enn Biro Komiser electoral, 4pm ziska 5.30pm
3. U al lor web-sayt Komiser Elektoral (https://oec.govmu.org/) e deswit gayn enn plas kot met zis u Nimero Kart Idantite, e li verifye ki u lor lalist elektoral e kotsa.
Si u pa truv u nom, u bizin al kot enn biro komiser elektoral, avek u kart ID plis enn prev ladres (kuma enn papye lalimyer ubyin dilo (CEB ubyin CWA) kot ena u nom ek ladres.
