LALIT denons Bil pu Ranvoy Eleksyon Vilaz ek Minisipalite
23.05.2023
LALIT denons Bil “Local Government” ki Guvernman finn prezante dan Lasanble Nasyonal ki viz pu prolonz manda Minisipalite ek Konsey Vilaz pu ankor 2 an. Pa kumsa ki demokrasi marse. Lepep finn elir so reprezantan pu enn manda defini, ki deza tro long. Se zis elekter ki kapav donn ankor plis manda ki sa. Guvernman finn prolonz manda akoz enn Leta Dirzans Saniter pandan lepidemi Kovid. Sa, li ti enn rezon lezitim. Me, asterla Guvernman Pravind Jugnauth pe servi pretex pu ranvway eleksyon rezyonal. So pretex se Guvernman ena lintansyon pu vinn delavan avek sanzman dan kad demokrasi rezyonal. Li tutafe rezonab pu viz amelyor Local Government dan Repiblik Moris – atraver plis desantralizasyon puvwar ek enn bidze pli gran ek otonom, atraver ramenn manda rezyonal a 3 an, atraver etann revokabilite ki deza ena par Konsey Vilaz lor so Konseye Distrik a tu eleksyon rezyonal – me kit nuvo kad legal inkoni li pa enn rezon pu ranvway eleksyon. Desizyon Privy Council ase resan dan ka similer dan Trinidad ek Tobago deza finn transe lor enn lalwa similer laba: li pa konstitisyonel.
LALIT finn kontakte Linion Pep Morisien formelman pu exprim nu sutyin pu demars LPM met enn ka konstitisyonel.
