Dat pu Avoy Abstrak pu Kolok LPT finn etann
16.05.2023
LALIT ena plezir pibliye lanons ki Ledikasyon pu Travayer finn avoy nu konsernan enn extansyon so dedlayn pu avoy lide pu so Kolok lor langaz Kreol.
LPT PE ETANN DAT LIMIT PU SUMET ABSTRAK PU KOLOK 2023
Kan dedlayn ti arive pu sumet abstrak pu Kolok Oktob 2023, Ledikasyon pu Travayer ti’nn fini resevwar enn zoli levantay abstrak otur nu tem “Lalit pu Langaz Kreol: Etadelye Apre 55 an Lindepandans”.
Etan done ki nu finn gayn plizir reket pu enn prolongasyon, setadir demand ki LPT etann dat limit, dan nu reynion Komite LPT Vandredi pase, nu finn pran desizyon formel pu nu etann dedlayn ziska 30 Zin 2023. Anfet Kolok pu bizin lor o-mwin 2 zur, setadir 28 Oktob ek 29 Oktob. Nu finn deza resevwar 17 zoli abstrak.
Ala detay lor Kolok:
Call for PAPERS LEDIKASYON PU TRAVAYER pu Kolok lor
“Lalit pu Langaz Kreol: Etadelye apre 55 an Lindepandans”
Alokazyon Zurne Mondyal Langaz Kreol, LPT invit dimunn prepar papye pu prezante dan nu 2yem Kolok Nasyonal. So tem li “Lalit pu Langaz Kreol: Etadelye Apre 55 an Lindepandans”. Li pu le 28 ek 29 Oktob 2023.
Premye Kolok LPT ti an 2001. Avan sa, nu ti osi fer enn Kongre lor Kreol an 1977 dan Plaza Rose-Hill, e enn 2yem Kongre lor Kreol an 1982 dan lasal Minisipal Louis Leschelles. E an 2009, nu ti fer nu Hearing Internasyonal lor Ditor ki Fer Zanfan kan Siprim Langaz Maternel dan Lekol. Antretan, nu finn osi fer enn seri Peblik-Lekcher, depi 1981 ziska asterla, kot nu finn invit orater kuma: Vandana Shiva, José Bove, Ram Seegobin, Jean Claude Bibi, Joseph Cardela, Emmanuel Richon, Trevor Ngwane, Patricia McFadden, Lee Haring, Enric Balaguer, Carol Benson, Christian de Brie, Tove Skutnabb-Kangas, Beban Sammy Chumbow ek Robert Philippson, osi byin ki fe Serge Sinamale, Neville Alexander, Anna Dartington ek Derek Bickerton. Pri Nobel an Simi, Roald Hoffmann, finn osi lir so poezi dan enn evennman LPT dan nu Horl GRNW.
Dan kad sa long listwar refleksyon lor langaz ek lor lavi lamas dimunn, zordi nu dan LPT pe prepar nu 2yem Kolok lor Kreol. Kolok pu fer dan kad Zurne Mondyal Langaz Kreol 2023. Alor, nu pe dimann tu dimunn ki interese vinn prezant enn papye pandan 15 minit parla, ubyen avoy papye la si u pa pu dan pei, si u ti kapav avoy nu enn paragraf lor seki zot pe prepare, ki parfwa apel enn “abstrak”. Dernye dat (ki fini etann) pu avoy u “abstrak” le 30 Zin 2023. Kumsa, nu kapav inform u kan u travay finn retenir a-tan pu u prepar u papye konplet. Li kapav nerport ki size liye ar tem. Ant-ot, nu pe mazinn papye lor tem osi varye ki sa:
Kreol dan tu laspe ledikasyon:
Kimanyer finn servi Langaz Kreol dan kur alfabetizasyon, ubyin dan kur “Kimanyer Ekrir Kreol pu profesyonel”, uswa dan kur an Kreol pu Stenograf Lakur, e mem kur pu ekrivin an Kreol.
Rapor lor Kreol kuma medyom: BEC, Terre de Paix, LPT, Abaim.
Langaz Kreol dan Preskoler; analiz liv an Kreol pu zanfan; analiz viktwar dan Lakur Siprem Playgroup lor kestyon kerikilem san langaz maternel ladan.
Langaz Kreol dan Primer, swa segonder, swa liniversite.
Politik
Langaz Kreol dan Politik: oral ek ekrit, dan miting, reynion, lafis, petisyon, invitasyon, minits.
Kreol dan Parlman.
Literatir ek lar
Kreol, roman an Kreol, poezi an Kreol, text tablo an Kreol.
Text sante an Kreol.
Analiz Revi Literer ki ti analiz literatir an Kreol.
Listorik Mo Krwaze an Kreol
Depi 1981, sinon avan, ziska asterla.
Listorik Stennding Orderz an Kreol
Kreol ek Lalit Deklas
Sindika ek Langaz Kreol
Manyer ki patrona ek guvernman servi Kreol dan Lalit de klas.
Lalwa
Langaz Kreol dan lakur Distrik, swa Lakur Intermedyer, swa Siprem, swa Rodrig, swa Lasiz.
Tradiksyon lalwa an Kreol – etidye nerport ki text existan.
Lavi Lasosyasyon ek Langaz Kreol
Langaz Kreol dan Istasyon Lapolis
Langaz Kreol dan Lopital ek Dispanser
Langaz Kreol dan Instans Internasyonal – UNESCO, Linguapax, Ka Diego, Drwa Imin – Komite Ecosoc
Kreol dan Medya ek Reklam
Kreol dan Meteo
Kreol dan Laparey Deta
