Lopozisyon Parlmanter, kot zot pe ale? Par Rada Kistnasamy

14.04.2023

Apre nu lartik lor danze ki Guvernman dirize par MSM reprezante, nu pe get febles politik ek programatik Lopozisyon Parlmanter dan sa moman inportan la.

Konsta

Nu pe rant dan enn peryod elektoral avek posibilite eleksyon zeneral a nerport ki moman dan prosenn de zan. Problem se li inportan pu opoz e ranplas Guvernman MSM ek so alye, me nu truve ki Lopozisyon Parlmanter li pa pe fer lepwa. Li ti kumanse mal – par rant dan kales kase enn kanpayn kont masinnri elektoral – e sa finn amenn zot dan pozisyon ridikil kot zot pe syeze dan enn Parlman ki zot-mem dir pa lezitim. Pa zis depite Guvernman ki finn sipozeman “mal-elir”, me zot-mem. 

Pravind Jugnauth pe anonse ki so Guvernman pu al ziska lafin so manda, malgre enn kaskad evennman ki finn chalennj so puvwar sa 3 dernye banane la, me nu pa konn so vre lintansyon. 

Parmi bann chalennj ki finn pli tas ar li, ena:

- Enn seri lalwa represif ki atak drwa lagrev, liberte lexpresyon, drwa sirkile, osi byin ki enn nuvo lalwa ki enn represyon kont sitwayin ki gayne so sitwayennte atraver maryaz avek enn Morisyin e anrezistreman kuma enn sitwayenn.

- Atak Pravind Jugnauth kont DPP ek mazistra lor kestyon larg Bruneau Laurette lor kosyon

- Manyer ki finn alwe tennder dan peryod Kovid.

- Nominasyon enn Spiyker ki kuma enn miray lasye ki blok lopozisyon parlmanter dan so travay dan Lasanble Nasyonal, e ki kareman fer Lexekitif dominn Lezislatir, ki li, antan ki Spiyker, sipoze proteze kont Lexekitif.

Fas-a sa Guvernman la, nu ena enn Lopozisyon dan Parlman e nu ena enn lopozisyon extra-parlmanter ki pe azite e kapitaliz lor fanaz guvernman Jugnauth pu zot reklam Eleksyon Zeneral antisipe, e antretan ena eleksyon minisipal ki sipoze organize avan Zin 2023.

Dan sa kontex politik kot tu ankor instab ek flu, diskisyon pu lalyans elektoral ant PTr, MMM ek PMSD fini demare. Deza ena linisyativ PT, MMM, PMSD pu selebre abolisyon esklavaz ek fet Lindepandans ansam.

Ena diskisyon lor kuma pu reparti 60 tiket, deza Paul Bérenger finn anonse ki PT pu lokomotiv, e par kont MMM ek PMSD pu res wagon. Ena diskisyon sirtu lor kisannla pu prosenn Premye Minis. Tusala konstitye surs konfli konstan alinteryer PT kot ena kontestasyon lidership Navin Ramgoolam. Dan lopozisyon ena enn seri pretandan pu pos Premye Minis, anplis ki Ramgoolam: ena Bodha, Bhadain, Laurette ek Sherry Singh.

L'Entente Lespoir

Apre defet dan eleksyon 2019 kot lider PT, Navin Ramgoolam pa eli, li ti pran linisyativ pu ki PT, MMM ek PMSD zwenn ansam e konstitiye L’Entente pu kordinn zot aksyon dan Parlman ek andeor Parlman. Kumsa Ramgoolam pu gayn enn rol mem si li pa dan Parlman. Li, li kapav gard kontrol lor PT ek so bann eli an zeneral, e Arvind Boolell ti fer Lider Lopozisyon dan Parlman. Kumsa, sa ti kumanse.

Dan Parlman, PT ena 12 depite, MMM ena 9 e PMSD ti ena 5, donk Arvin Boolell ti asim rol Lider Lopozisyon an-akorite avek MMM ek PMSD.

Apre so defet, Navin Ramgoolam finn deswit, avan-mem fini fer kawnting, e ansam ar enn ramasi tipti parti extra-parlmanter, demar enn kanpayn pu konteste rezilta eleksyon. E li finn kumans denons seki li apel “guvernman ilezitim MSM”. MMM ek PMSD, apre enn ezitasyon tutafe dan zot loner, finn finalman al fer erer al swiv Ramgoolam dan sa kanpayn la. Zot, parey kuma PT, zot finn usi met ka pu konteste eleksyon. Preske tu ka ki ti’nn mete finn swa retire, swa rezete ubyin finn abuti a enn rikawnt ki, asontur, pa finn sanz rezilta. La, res ka dan No.15 kot Kandida bati PT, Cader Sayed Hossen pe dimann rikawnt, e pli inportan, res ka Suren Dayal finn mete onivo Privy Council, kot pe konteste eleksyon 3 depite No. 8, Pravind Jugnauth, Leela Devi Dookhun ek Logida Sawmynaden. Setadir, Premye Minis so syez dan Parlman su menas. Ka finn fixe pu le 10 Ziyet.

Kanpayn Lopozisyon pu konteste derulman eleksyon 2019 pa finn amenn rezilta ki Travayis ti vize. O-kontrer. Me, anmemtan, enn seri evennman finn vinn baskil tu, e donn zot lokazyon inatandi pu chalennj MSM ek so alye dan lezot fason.

Dabor, pandemi Covid-19, so lokdawn, ek so bann nuvo lalwa ki amenn restriksyon lor rasanbleman ek muvman finn vini ase boner dan 2020. Plitar dan lane nu finn gayn nofraz navir Zapone Wakashio e so polisyon dan lagon, swivi par aksidan bato Sir Gaetan avek lamor manb lekipaz. Nu finn gayn asasina Soopramanien Kistnen, ki ti enn kontrakter e osi enn azan MSM fristre, dan sirkonskripsyon No. 8, kot Premye Minis.

E tusala finn kontribiye pu emerzans enn muvman popilis, dabor otur Bruneau Laurette, ki ti ena sutyin enn tit-burzwazi debusole par lefe Kovid, sutyin osi depi lapres kuma L’Express, e pandan enn tan Legliz osi, e mem sutyin enn seksyon burzwazi ki ti an kriz, sirtu avek konsekans lokdawn ki ti vini ar pandemi Covid-19 lor zot biznes. Bruneau Laurette, enn ansyin azan MSM fristre, li osi, finn alatet sa muvman ki finn gayn sutyin depi parti tradisyonel dan Parlman ek andeor Parlman avek parti kuma Rezistans ek Alternativ.

PT, MMM ek PMSD finn kwinse ant mobilizasyon popilis Bruneau Laurette lor terin andeor Parlman ek dominasyon depi enn Spiyker andan dan Parlman. Li enn Spiyker ki fer erer krwar li enn emanasyon Lexekitif, kan anfet li enn emanasyon Lasanble Nasyonal. Li enn spiyker ki met seraz lor tu depite Lopozisyon avek tu sa irle, tu sa expilsyon, tu sa sispansyon, e avek buku Kestyon Parlmanter ki pa mem reponn. Lider sa trwa parti Lopozisyon Parlmanter la finn al fini par swiv, kuma enn lake, deryer Bruneau Laurette, e finn dir zot manb al dan so manifestasyon 29 Ut 2020, Port-Louis. Me, zot finn ale antan ki sitwayin. Sa vedir, zot finn disud zot parti tanporerman pu zot ale. Nu rapel simiz nwar ki zot ti mete sa zur la. Zot pa ti mem lib pu kapav afis kuler zot parti. Sa ti enn move turnir pu tu sa parti lopozisyon Parlmanter la. Enn form likidasyonism.

Me, pa zis sa. PT byin diferan dan so lyin ar Laurette. Kan MMM ek PMSD realize – kan Bruneau Laurette anfet anons li – ki so muvman popilist dedrwat viz pu “kokin” baz elektoral MMM ek PMSD (tit-burzwazi lavil, e inpe kominal), MMM ek PMSD kumans pran distans ar Laurette. Me pu PT, muvman otur Bruneau Laurette met li dan enn pozisyon defors dan kad negosyasyon lalyans pre-elektoral avek MMM ek PMSD. Ondire Laurette enn stepne, si MMM ubyin PMSD tro gurman dan kad negosyasyon enn lalyans.

L’Entente destabilize

An Fevriye 2021, Nando Bodha demisyone depi MSM e natirelman kuma Minis, apre konfli intern dan MSM. Sa demisyon la finn sanz rapor defors alinteryer L’Entente, ki finn gayn osi, kuma nuvo aderan, Roshi Bhadain ek so Reform Party. MMM ek PMSD kumans kestyonn swa Navin Ramgoolam kuma fitir Premye Minis. MMM ek PMSD finn truv Bodha kuma enn potansyel Premye Minis stepne pu zot, si Ramgoolam larg zot. (Dapre zot bann kalkil kominal abityel.)

Konfli ti vinn telman egi ki PT finn kareman retir li depi L’Entente ki li-mem ti met dibut. E sa finn ena lefe onivo rol Lider Lopozisyon dan Parlman. Arvin Boolell finn retir li kuma Lider Lopozisyon akoz L’Entente MMM-PMSD-Rassemblement Mauricien (Bodha ) ena 15 depite kont 12 PT. Paul Bérenger finn refiz post Lider Lopozisyon (pangar li paret finn provok sa kasir la pu li vinn Lider Lopozisyon?) e sa finn permet Xavier Duval, mem si so PMSD ti ena zis 4 depite, aksepte san ezitasyon sa post la. (PMSD nepli ti ena so 5 depite akoz Salim Abbas Mamode ti demisyone, zwenn MSM.) Sa Lider Lopozisyon depi pli tipti parti dan Lopozisyon, li pa enn pozisyon stab, e li finn kontribiye dan afebli Lopozisyon dan Parlman, sirtu avek enn tel Spiyker kuma Soorooj Fokeer.

Lot kriz alinteryer L’Entente vini an Ut 2022, kan Roshi Bhadain apel enn lasanble delege Reform Party kot desid par balot pu al dan eleksyon separeman depi L’Entente. Roshi Bhadain finn (tutafe lozikman) exklir depi L’Entente apre sa lasanble delege la, me li ti paret etone.

Me kriz onivo L’Entente pankor fini. Asterla kan negosyasyon PT, MMM ek PMSD finn demare pu enn laranzman elektoral, Nando Bodha pe kestyonn sa lalyans la lor baz kifer Navin Ramgoolam pu fitir Premye Minis. Li dir ki sa lalyans la pa pu resi vinn opuvwar e li propoz ki L’Entente de L’Espoir (pa Travayis) ki ti bizin plito lokomotiv enn lalyans elektoral. Dayer li prezan dan fet fin dane enn lot parti extra-parlmanter Linion Pep Morisien (ki Laurette ti donn kudme met dibut, lerla abandone). Li osi azute ki li pre pu pran labar si bizin. Sa pozisyon Nando Bodha finn kree problem kot Bérenger ek Ramgoolam finn kritik so pozisyon. Me, asterla ena koz koze pu Bodha re-rant dan ran.

Enn moman, kan Parti Travayis ti izole (vizavi L’Entente), li ti koste net ar Laurette. Me, avek arestasyon Laurette, Ramgoolam finn larg Laurette, deswit al get MMM ek PMSD pu sud enn lalyans – mem si zis dan kad eleksyon minisipal. Apre ki Bruneau Laurette finn sorti lor kosyon, li finn zwenn parti Sherry Singh, One Moris. E sa parti la paret byin, byin difisil demare.

Ala leta lopozisyon Parlmanter, setadir PT, MMM, PMSD, RM.

Asterla, Rezistans ek Alternativ vinn fer apel a sa bann parti la pu ki zot tu ralye ansam deryer Navin Ramgoolam. RA dir sa rasanbleman la li pu enn lalyans elektoral pu prosenn eleksyon ki zot dir pu elir zis enn “guvernman provizwar” pu 2 an pu sanz Konstitisyon par rapor sirtu ar deklarasyon kominote kan poz kandida pu eleksyon zeneral. Telman sa isyu la finn vinn enn andikap pu Rezistans – akoz zot enn parti elektoralist ki finn met zot-mem dan enn pozisyon kot zot pa kapav aliyn kandida – ki zot pe abandonn tu prinsip, abes zot a enn tel pwin ki zot pe alye zot ar sa bann mem parti, ki zot ti pe dir bizin fu deor, e dir zot tu ralye deryer Ramgoolam. Rapel Rezistans so slogan ti kritik slogan “BLD” (B.. zot deor), ti ranplas li par “BZTD” (B.. zot tu deor) pandan manifestasyon 2020 pu ki zot inklir Ramgoolam, Bérenger ek Duval. Dan sa nuvo lapel la, RA finn mem fer apel pu parti Lopozisyon vinn dan miting PT dan St Pierre, dayer zot mem ti prezan pu ekut diskur demagozik Navin Ramgoolam, kot li finn anons tu kalite insanite.

Ki lintere lopozisyon PTr, MMM, PMSD defann?

PT, kuma nu lekter kone, finn pran nesans kan muvman sindikal pe organize pu plis drwa travayer, dan muvans lalit klas travayer kont kolonyalism e pur Lindepandans. PT finn abandon sa lalit depi ki Seewoosagur Ramgoolam (ansam ek Grup Advance ek Grup L’Express) pran kontrol parti, e finn pli abandonn sa lalit la ankor depi lafin bann lane ’60 avek koalisyon avek PMSD, ki ti kareman reprezant zintere burzwazi istorik. Ansam zot ti servi represyon kont muvman sindikal e militan politik ki ti pe leve sa lepok la. PT finn devye pu vinn finalman enn parti ki defann lintere burzwazi ek enn seksyon tit burzwazi fristre asak fwa ki ena enn rezim Jugnauth. 

MMM, e sa osi nu lekter kone, ti ne dan lalit deklas dan bann lane 1970. MMM ti reprezant lintere klas travayer e osi enn tit-burzwazi bloke par Parti Travayist, me klas travayer ti “an-avangard”. MMM finn devye depi lafin lane 1981, finn fer konpromi kominal avek lalyans ar PSM e finn fer konpromi deklas kan li kumans kolabor avek kapitalist pu proze “Nuvo Konsansis Sosyal”, kuma MMM ti apel li. MMM finn abandonn politik lalit deklas. Suvan li ariv reprezant lintere burzwazi, afors li pena okenn restan so program anfaver klas travayer.

PMSD, ki ena enn listwar kuma reprezantan proprieter tablisman ek gran inportater masinnri, ki ti anti desandan “imigran” depi Lind lor baz kominalo-relizye, ti enn parti ki ti pran pozisyon kont Lindepandans, parey kuma li ti kont sifraz iniversel avan sa. Asterla PMSD inpe tro feb pu burzwazi interese ar li tro. Li plito inn vinn enn parti oportinist, plito teknokrat, e li rod pli bon diyl elektoral pu lafors ki li reprezante dan kit lalyans politik.

Rassemblement Mauricien so lider Nando Bodha li ena lanbisyon pu vinn Premye Minis. E li anons li. Li ti dan Guvernman MSM, me finn demisyone. Dan lepase finn ena kestyon lor so lyin ar parti fondamantalist Hindu, RSS me pena buku siyn ki li amenn enn tel politik dan lapratik.

Seki sokan dan tu sa politik manevriye la se lefet ki okenn sa bann parti Lopozisyon la nepli ena lagazet dan lekel zot devlop zot program, lor enn baz onn-going. Travayis ti ena Advance ek Nation ki ti reprezant diferan tandans (Seewoosagur Ramgoolam ek Satcam Boolell), osi byin ki sutyin depi Mauritius Today (tandans Jagatsing) e mem Mauritius Times, B. Ramlallah pro-Travayis. PMSD ti ena Le Populaire. MMM ti ena Le Militant, Le Peuple e Le Nouveau Militant – enn apre lot. Me, seki inportan, se zot tu ti ena enn program, ki ti devlope dan enn lagazet kotidyin, ki enons sa program la tulezur. Zordi zot napena okenn program an-komin. E zot pa mem kone ki klas sosyal zot reprezante. Parfwa zot koz “valeurs” akoz li enn mo konpletman “vid” e vedir seki zot ule li vedir, pa plis. E sinon, zot zis koz kont Jugnauth so Guvernman. 

Konklizyon

Lopozisyon PT, MMM, PMSD ena mem kalite politik groso modo ki guvernman MSM. 

Zot ena enn politik ki viz pu favoriz burzwazi dan sekter imobilye, turism ek sekter finansye. 

Zot pa truv nesesite pu koz anfaver enn devlopman ki baze lor lindistri agro-alimanter ek lapes kuma enn pilye ekonomik, sirtu dan kontex kriz aktyel. Zot pa koz nesesite devlopman ki pu amenn kreasyon lanplwa dirab pu tu dimunn Moris, asir suvrennte alimanter e asir lantre deviz. Sa pa zot priyorite ditu.

Lor kestyon Chagos zot dakor parey kuma guvernman MSM ki Diego Garcia bizin kontiyn res enn baz militer USA. Zot osi, zot ule vann Diego. Zot osi, zot ule kontiyn permet Lamerik servi enn but teritwar Moris pu so bann vize militarist, malgre zizman ICJ ki li ilegal, malgre rezolisyon Nasyon Zini kont okipasyon ilegal Chagos par UK ek USA, malgre UK-USA truv zot izole ar zis Israel, Ostrali lepok Scott Morrison ek Laongri.

Zot pena mem enn program bankal kuma enn ti-lalist mezir. Ziska ler lider PT Navin Ramgoolam kontant li pu fer enn seri lanons varyab dan so bann sorti, kuma enn lalist promes elektoral farfeli, san ki finn etidye inplikasyon sa bann mezir la, ni adopte zot dan so parti. E kan li fini dir enn zafer, li bliye li, pran enn lot, lerla bliye sann la la. Li dir li pu sanse “bes pri lesans par preske 25%” (san mem kone ki pri la pu ete kan, e si, li vinn opuvwar). Li pu amenn gran-dimunn trwazyem az Lareynion. Lerla kan tu dimunn kas enn gran riye, li espes retir sa. Li dir li pu retir tu restriksyon lor liberte dexpresyon lor Facebook, san mansyonn ni sayber-buliying, ni mem terorism dextrem drwat, ni rezo pedofili onnlayn, ni responsabilite, antan ki peblisher, ki Meta, etc ti devet ena. Sa bann lanons la zis baze lor seki pas dan latet Ramgoolam, kan li zoz mekontantman imedya, mem li efemer, e li sertennman pa konstitye enn program ki pu opoz guvernman Jugnauth.

Amezir ki eseans elektoral koste, nu pe travers enn peryod traktasyon, kot parti dan Parlman, kuma PT, MMM, PMSD, RM ek parti andeor Parlman kuma Rezistans, Reform Party, Linion Pep Morisien, One Moris, zot tu pe azir byin dezespere. Zot pe plito bat-fol. Zot pe rod ki formil ki pu fer zot sirviv prosenn eleksyon zeneral dan enn lalyans ki zot kwar ena kapasite ranport laviktwar kont Jugnauth ek so bann alye. Sa, li zot priorite.

Parti LALIT nu demark nu depi sa kalite lopozisyon. 

Nu travay lor baz enn program, ki tultan pe explisite dan nu Revi Bimansyel, lor nu web-sayt ek lor nu paz FB, dan nu bann trak ek lezot piblikasyon, e ki viz pu ranforsi klas travayer pu asire ki dimunn ena bann nesesite de baz kuma travay, manze ek lakaz, e ki viz pu klas travayer vinn opuvwar, antan ki klas, e lerla etablir sosyalism, kot pa pu ena enn reyn par enn ti poyne kapitalist dan enn klas posedan. Sa program LALIT pa enn program elektoral, li enn program pu sanz natir sosyete li-mem. Li nesesit kontiyn devlop li e kontiyn elabor li, par rapor a nuvo sityasyon, e finalman fini ar sa explwatasyon par enn ti-klas ki finn expropriye lamas dimunn depi later, e depi tu kapital ki so klas finn kree e lor lekel nu tu depann pu sirviv.

Program LALIT viz alor pu enn sanzman sosyete, pu enn sosyete sosyalist, e avan sa, kot fardo kriz sosyal ek kriz ekonomik klas kapitalist pu nepli zis shifte lor ledo klas travayer ek dimunn mizer asak fwa. Ala seki separ nu depi bann lezot lafors politik dan lopozisyon. E ala ena enn-de siyn lepok pe sanze: klas travayer dan Lafrans ek Gran Bretayn, dan Lalmayn ek Lagres, pe kumans sorti dan sa pozisyon defansiv kot li ti ete depi dernye 50-an neo-liberalism.

(Lartik baze lor papye e deba ki finn swiv dan Seminar LALIT, 4-5 Fevriye. Papye ti prezante par Rada Kistnasamy ek SR, avek enn ti epdeyt.)

Lor Navin Ramgoolam 

Plizyer manb lexekitif PT finn uvertman kritik Navin Ramgoolam, dimann li stepdown. Zot kritik sirtu manyer Navin Ramgoolam pe evins ansyin manb, e osi pran desizyon par li tusel san konsilte lexekitif. Parmi manb ki finn exprim zot kont Ramgoolam ena Yatin Varma, Satish Faugoo, Cader Said Hossen, Devanand Rittoo. 

Navin Ramgoolam finn dan enn rasanbleman dan Solitid, Zanvye 2023, tret manb ki pe konteste so lidership de “Zida”, pe dir ki MSM deryer tusala e rezon kifer zot pe konteste se akoz zot pa pe gayn tiket.

Me selman Ramgoolam pa zis pe konsteste dan so parti. Li tuzur ena problem kofor ek ka kofor, ki tulde pez lor li. Li ankor ena problem ki li pa aksepte defet elektoral 2019 ki li atribiye a trikaz eleksyon. Tusala reprezant febles adisyonel pu li.

Me, Ramgoolam pa mank ponpaz, malgre kontestasyon dan so prop parti.

Dan mem moman sa konstestasyon lidership Navin Ramgoolam ena, enn kote Paul Bérenger, pu premye fwa, pe konsede ki PT pu anfet “lokomotiv” lalyans PT-MMM-PMSD avek Navin Ramgoolam alatet. Lot kote, ena Ashok Subron ki pe fer apel pu tu parti lopozisyon ralye deryer Ramgoolam. Li zistifye sa par met anavan RA so proze politik, pu ki enn larz  fron tradisyonel gayn trwa-kar mazorite dan Parlman pu lerla kapav sanz Konstitisyon sirtu lor kestyon drwa poz kandida san deklar kominote. 

Problem kofor

Pu rapel, Ramgoolam ankor pe sarye so “kofor” ek so “ka kofor” la depi apre eleksyon 2014. Politikman, li lur. 

Apre ki Ramgoolam finn perdi eleksyon, nuvo Premye Minis Aneerood Jugnauth an 2015 ti desid pu uver lanket lor vol dan kanpman Ros Nwar ki ti inplik Navin Ramgoolam kan li ti Premye Minis. Lapolis finn aret Ramgoolam e met sarz konplo kont li e kan finn fer lafuy andan so lakaz, finn dekuver enn kofor avek Rs220 milyon ladan an biye. Ramgoolam ti arete e purswiv su 23 sarz komkwa li finn aksepte peyman an likid plis ki lalwa permet. An Novam 2019, lakur intermedyer ti rey tu sa bann sarz la, me DPP finn konsteste zizman. Swit-a sa kontestasyon la, Lakur Siprem an Ut 2022 finn rann enn zizman pu dir re-uver prose kont Navin Ramgoolam. Asterla Navin Ramgoolam pe konteste zizman Lakur Siprem onivo Konsey Prive. Li fini gayn enn spesyal-liv pu loz so ka. Dan so diskur dan rasanbleman Solitid, Ramgoolam ankor zistifye ki li ena drwa gard enn kofor kot li avek Rs220 milyon, li dir sinon ‘Kot pu garde? Anba matla?’. Li dir ki ena donasyon pu PT e so prop larzan melanze ladan. Kestyon ki poze, se eski pena enn sistem kot ena enn trezorye parti ki pu ena sa responsabilite gard kont parti? 

Ramgoolam e kanpayn kont ‘eleksyon trike’

Lor so kanpayn isterik lor ‘eleksyon trike’ Navin Ramgoolam fini persiste mem, sem dut lor derulman eleksyon. Li dir ki eleksyon ti trike an 2019, samem li pa finn eli dan sirkonskripsyon No.10. Li dir ki Soopramanien Kistnen, avan so lamor, ti finn vinn dir li kimanyer li, Kistnen, finn sarye travayer depi Bangladesh ki pa anrezistre lor Rezis pu fer zot vot pu Guvernman MSM. Me, sa li enn koze li finn tande depi enn dimunn ki fini desede. E Ramgoolam pa explike kuma sa kapav arive, si zur eleksyon ofisye Biro Elektoral pe chek kart idantite, e ena azan tu parti politik dan 200 met, dan lakur lekol, dan sak klas kot pe vote, ena mem azan pu gardyin bwat aswar, e zur kas bwat. Li pa explike ki azan PT ti pe fer sa ler la. E nonpli lapres. Zot konplezan, zot pa poz li sa bann kestyon la. Diskur Ramgoolam kont travayer Bangladesh byin danzere, li pe kree enn listeri anti-travayer Bangladesh ki kapav kree derapaz dan enn kanpayn elektoral. Li ankor pe fer sa kalite derapaz zenofob la. E sertin dan lapres pe azut lor la.