Konstriksyon enn Parti Politik
23.02.2023
Premye pwin: Enn parti politik revolisyoner, li enn sayt konstriksyon, e li an-konstriksyon lor enn baz permanan. Buku dimunn Moris deza kone ki sa vedir akoz nu suvan konstrir nu prop lakaz, e travay la zame fini. Sa konsep “konstriksyon” parti, li inplik enn zefor onn-going depi sak manb. Li byin diferan depi sa bann parti kuma MSM, Travayis, MMM, PMSD, e mem byin diferan depi parti extra-parlmanter kuma LPM, Rezistans, etc. Li oblize diferan parski nu bi li diferan: Bann la ule sanz guvernman. Nu dan LALIT, nu ule sanz sosyete, e pu fer sa, bizin parla, sanz guvernman. Me, nu bi se pu fini ar diferan klas sosyal – ena ki kontrol manyer sosyete derule, ena ki pena swa, pu sirviv, apar vann so letan lor later ar enn ki pe kontrol manyer sosyete derule. Alor, pu nu mazinn sa sanzman sosyete, nu truv enn parti politik ki kapav ed nu mazinn li, e fer li.
Ena bann “mekanism” konstriksyon ki nu servi.
Seki inportan se nu tom dakor lor ki parmi bann mekanism konstriksyon nu ti devet pe privilezye asterla-mem. E sak manb, kan nu tom dakor, nu pe tultan rod ranforsi parti la atraver sa “mekanism” ki nu finn tom dakor pu servi la. Taler nu pu liste sertin sa bann mekanism la. Zot enn lalist ase faynayt.
Dezyem pwin: Dan enn lepok eptern, enn parti revolisyoner kapav, e li bizin, rekrite byin vit, agrandi vit-vit dan enn fason exponansyel, e li pu reysi fer buku so rekritman dan klas travayer, sirtu dan so lavangard. Sa li dan enn moman kan klas travayer pe rant an-aksyon antan ki enn klas. Me, par kont, dan enn dawntern, kuma nu pe viv dan dernye 30 an, kot klas travayer demobilize, kot pena mobilizasyon sindika demokratik, kot pena-mem buku sindika ki opere dan enn fason demokratik, si parti revolisyoner kuma LALIT fer sa mem kalite rekritman vit-vit la, nu pu rekrit lareaksyon andan dan so prop parti la. Li pu riske enn form “likidasyonism”. Parti la, anplas grandi, pu riske detrir limem antan ki lafors potansyelman revolisyoner. Nu pu vinn kuma tu sa lezot parti pro-burzwa la, akoz nu pu rekrit enn gran, gran mazorite kumsa. E nu finn efektivman truv par duzenn parti politik revolisyoner partu-partu dan lemond fer sa dan dernye 30 an. Nu nom zis LCR an Frans ek DSP an Ostrali, ki ti de parti byin for, byin dinamik, kot enn mazorite manb finn tante pu expann vit-vit pandan enn dawntern, e finn likid zot prop parti kuma enn lafors revolisyoner.
Sa introdiksyon la li atir latansyon lor konstriksyon konstan enn parti revolisyoner, e lor difikilte ki enn parti revolisyoner kuma LALIT fer fas dan nerport ki dawntern kot klas travayer pe sibir atak depi burzwazi kont li-mem, kot li divize dan diferan sekter, kot pena enn koerans kuma enn klas. An bref, pena enn konsyans de klas ki ot.
Trwazyem pwin: Na pena enn “baton mazik” pu konstrir enn parti politik revolisyoner. Nu bizin, an zeneral, zis evalye ki bann mwayin ki deza existe, ki nu-mem nu finn byin suvan deza servi, e ki, dan sa moman aktyel la, pu pli itil.
Alor, nu pe gete ki nu finn deza seye, e kan li finn marse e kifer. Nu pa pu al dekuver enn nuvo baton mazik. Nu pe evalye seki existe. E seki ti marse dan eptern, li pa pu marse dan dawntern.
Par exanp, dan lepase dan gran eptern, bann lane 1970 ek 1980, kot ti ena gran mobilizasyon otur e dan bann sindika ki fonksyone dan enn fason demokratik, LALIT, e LALIT DEKLAS a lepok, ti rekrite for-for, vit-vit. Nu ti sirkil ant 1,000 ek 2,000 Revi LALIT de Klas, par exanp, e preske tu ti dan labaz bann sindika: laburer, artizan, dok, transpor, sirtu. E kan nu distribiye 15,000 trak, li atraver sa 1,000 lekter Revi. Li fasil.
Depi bann lane 1990, selman, kan klas burzwa internasyonal kuma nasyonal, finn atak klas travayer, nepli ena sa kalite mobilizasyon la ditu. Sindika finn birokratize. Dan ka Moris, nu ti ena enn dernye suf mobilizasyon – enn espes “prolongasyon” (kuma dan futborl), kot nu dan LALIT, dan enn fason inpe zenan atraver LPT, finn ena akse – atraver All Workers Conference 1996-1999 – a lavangard klas travayer, sirtu dan sekter piblik. Sa finn enn zoli “prolongasyon” sa gran flanbe dan eptern la. Me, li ti defansiv net: kont neo-liberalism ki patron ti pe inpoze, kont privatizasyon ki guvernman ti pe inpoze, kont patant prive lor lavi, etc. Sa lepok AWC ti osi kumansman sa dawntern, kot nu tu kondane pu travay avek ladireksyon sindika, avek birokrasi li-mem, avek tu so limitasyon. E, se kimanyer diyl ar sa ki finn reprezant sa kasir kot Bann Subron demisyone ale. Subron finn vinn enn birokrat sindika, limem, e li fyer de li. Sa birokratizasyon, li enn form sibstitisyonism (Subron ubyin Bizlall oto-proklam zot kuma reprezantan klas travayer). Sa li vinn baz obzektiv seki apel “stalinism”, setadir enn grup dimunn rod sibstitye zotmem pu klas travayer – akoz klas travayer finn febli (pu rezon ki klas dominan finn atake) – e zot kumans fer seki zot ule lor nom klas travayer. Se sa ki bann Subron fer. E bann Bizlall, Tan Yan, Shanto fer. Zot otoproklam zot lider klas travayer, e lapres burzwa donn zot kudme ladan, kuma dayer patron, guvernman e mem lalwa travay donn zot kudme fer. Negosyater rekonet dan lalwa travay asterla! Jane ek Reeaz dan CTSP, zot sey gard enn degre mobilizasyon, mem li pa mobilizasyon “konsyan”, kuma kan zot servi taymof pu fer travayer vinn lasanble, patron pey travayer pu vini, e travayer vinn dan konferans depres Sindika, e sa donn enn laparans ki lapres ek televizyon reperkite. Zordi, Subron li kareman rant dan enn sindika dan sa mem fason ki Gaetan Duval ti fer lontan. Li rantre, li lider, li port-parol, li tu. Tusala pa finn amenn so parti politik lwin: Rezistans inn al fini kuma enn “azan” pu sa Parti Travayis totalman diskredite otur Navin Ramgoolam ek so bann kofor pe degorz biye an-dolar.
Dan LALIT, par kont, nu finn realize ki nu oblize relativman marzinalize apartir bann lane 1990, e pu ki nu travers sa lepok la, kan klas travayer pe sibir atak lor atak depi klas kapitalist, nu bizin opere dan enn lot fason.
Nu finn konsantre lor konstriksyon nu parti, lor devlopman programatik, nu finn integre Komite Konzwin Lozman dan sa travay la, e nu finn, pandan enn lepok, organiz peser otur prodiksyon enn Charter. Nu tuzur krwar dan linportans demokrasi dan sindika, e lalit kont birokrasi dan sindika. E nu osi, anmemtan, travay ar birokrasi sindika kan li posib – sirtu lor priz pozisyon konzwin.
Me, natirelman nu dan LALIT, nu bit kont tu kalite obstak.
Dan labsans mobilizasyon klas travayer, mobilizasyon kan li konsyan li enn klas, nu gayn enn gran lamonte elektoralism, setadir klas travayer krwar ki eleksyon se tu. Sanzman vini zis atraver enn sinp eleksyon. Eleksyon pu rezud tu. E sa kuran elektoralist, li natirelman amenn enn gran proporsyon klas travayer sutenir MSM, Travayis, MMM, mem PMSD. Kifer? Akoz zot ena pli sans “gayn” eleksyon. CTSP ase uvertman finn sutenir MSM. Zordi Subron ek Rezistans pe azir pu reyni tu parti lopozisyon otur Ramgoolam!
Sa labsans mobilizasyon klas travayer dan enn politik deklas, li osi ponp kuran popilist, setadir enn gran lider, ek enn program ki li-mem li kone ki li pe fer, ki enn sover. Sa gayn terin.
Alor, Subron ek Bizlall, zot reysi rekrit “individi” depi sindika ki zot kontrole, GWF ubyin FPU, e sa donn zot enn laparans ki zot reprezant klas travayer, akoz zot ena enn-de manb dan klas travayer. Me, san mobilizasyon antan ki klas, sa individi la, li enn individi, kuma nerport ki individi. E suvan, li pu aktif politikman zis dan lepok eleksyon. Sa, li anmemtan enn form elektoralism, e osi enn form popilism, e li lekontrer politik deklas.
Politik deklas, par kont, viz tultan pu sanz balans defors deklas anfaver klas travayer – e sa fer par aksyon konsyan enn gran nom travayer, ki ena enn lyin ar enn parti revolisyoner, ki reysi konvink sa but dan klas travayer apel so lavangard – so seksyon pli saz, pli experyanse, pli serye – lor baz so program.
Trak
Enn mwayin nu finn servi dan sa dawntern la, se trak. Nu viz klas travayer granmatin lor sime al travay, kan ti-burzwazi leve granmatin, sorti, nu kumans aret distribiye. Me, li enn metod ape-pre. Nu oblize servi li akoz dawn tern. Ki li ete? Nu pe distribiye dizon 8,000 trak ar dimunn dan klas travayer, parski kumsa nu reysi tus kelke 100-enn travayer dan lavangard. Me, nu pe atenn zot kuma individi.
Revi
Atraver nu Revi, zuti pli inportan kote ideolozik, nu devlop nu program, e nu distribiye li. Me, kan klas travayer pa dan enn lepok mobilizasyon konsyan, Revi la, mem li inportan, li pa kapav ranplas sa mobilizasyon la.
Alor, nu osi, atraver trak ek Revi, bit kont enn lot obstak. Nu fye buku lor lekritir. E nu dan enn sosyete ki pa tro letre, dan sans fye lor lekritir. Mank enn zefor pu lir.
Reynion
Reynion politik, li oral. Me, li enn mwayin ki depann lor kapasite enn-de militan parti pu regrup dimunn, e dan enn dawntern dimunn paret gayn difikilte reyni mem bann tipti grup dimunn pu diskit politik. Nu kad LALIT, nu bizin montre nu-mem fer sa. Kapasite nu kad pu organiz ti reynion li vreman esansyel pu konstriksyon enn parti. Linportans “parlman” Ebenn, li la.
Ti-Video ek Odyo
Kote oral, nu finn sey enn-de fwa, emet ti-video ek odyo politik. Sa osi marse. Me, li depann lor aksyon militan pu invit dimunn pu ekute, promuvwar li. Li mars ase byin. Linportans sa regupman WhatsApp kote infermye ena so linportans dan sa kalite travay la.
Nuvo zuti teknolozik
Kimanyer sey servi zot? Kimanyer servi zot pli byin?
- Lalist rezo desantralize lor portab – pu program radyo, pu enn lartik lor web, pu dir ki ena dan Revi fek sorti, etc..
Nu websayt – ki gayn buku vizit
Youtube – Kimanyer sak manb avek mwins lexperyans pa al fer tipti intervyu avek manb lor size ki interes zot? Amenn enn sel kamarad depi dan u travay, u kur, u lekol? Fer intervyu la, e propaz li maximem – par sonn dimunn, avoy dimunn, provok deba. Servi zot prop paz si zot ule. Gary ti fer sa pu Rajni so mini-konser.
Forom Rezyonal
Nu finn osi sey LALIT limem organiz forom rezyonal, ubyin ankuraz lezot lorganizasyon fer forom – enn grup dimunn dan enn landrwa, swa LPT, swa MLF. Sa finn mars ase byin. Get zis avan premye lokdawn, LPT ti fer enn lor langaz dan Horl Koromandel.
Ranforsisman konsyan brans – agrandi sak brans
Sak militan bizin rekrit enn-enn nuvo manb pu so brans. Bizin asire ki brans zwenn osi regilyerman ki li posib rekrite. Idealman, sak profeser ki manb kapav rekrit enn-de ki pe gan 18 an, ki nepli so zelev – dan moman li pe kite. Sak etidyan ki swiv enn kur kapav rekrit ankor enn-de etidyan pu vinn enn reynion.
Miting
Miting ek Kongre Noktirn enn metod ki, dan eptern, li esansyel. Me, zordi zur pa sir.
Lafis
Sa, li tultan marse, a enn degre. Me, li bizin viz rekrit nuvo manb osi.
Fer Komisyon Parti LALIT “uver”
Nu finn deza sey sa suvan, e li finn marse.
Kur Ledikasyon Politik
Sa finn marse sak fwa. Me, nu finn mem ena lefe lekontrer. Dimunn dan travay “sosyal” al rekrit nu manb ki ti pe koste pu fer “politik”! Me, klerman sa enn zafer ki kapav marse dan enn dawntern.
Muv Delibere pu kone ki tem, ki size, interes dimunn
1. Rode e truve ki size pu interes lezot dimunn. Ki topik nasyonal? Ki topik internasyonal? Pu dimunn dan u travay, dan u lekol, dan u landrwa?
2. Invit lezot dimunn, enn par enn, pu seki interes sa dimunn la.
Seminar Rezidansyel pu Rekritman
Sa nu finn deza fer.
Li osi li finn marse. Finn ena zis pu fam. Zis pu zom. Zis pu zenn. Nepli ena sa zuti la osi fasilman.
Alor, nu bizin pas-an-revi tu metod nu finn deza servi dan lepase, get ki pli sans marse dan enn tel lepok? E pu nu nomb e kalite kad?
Alor, ki metod ki pu marse, ki pli apropriye, li depann sirtu lor:
- Natir lepok aktyel?
- Nomb nu kad?
- Kalite nu kad?
Lartik baze lor kozri par RS ek LC, 4 Fev. 2023 e deba apre.
