Biro Komiser Elektoral finn komans so port-a-port anyel pu konpilasyon Rezis Elektoral
23.01.2023
Sa travay la finn kumanse apartir 21 Zanvye e sa pu kontiyne ziska 4 Fevriye 2023. Kuma sak lane, nu ena enn sistem extra-ordiner dan Repiblik Moris, kot re-konpil lalist elektoral sak lane. Nu pa bizin inskrir, me ofisye fer port-a-port pu inskrir nu. Kumsa nu gayn enn Rezis Elektoral kot ena nom zis dimunn ki res dan sa Sirkonskripsyon aktyelman. Kumsa nu gayn nuvo elekter ki finn fek gayn 18 an dan sak sirkonskripsyon. Demokrasi pu eleksyon zeneral dan Repiblik Moris, li baze lor sakenn vote kot sakenn so rezidans ete. Kumsa sakenn ena enn vot egal, e li enn vot kot lansanb elekter gayn trwa depite ki redevab anver nu, elekter dan sa sirkonskripsyon la. Kumsa alalong, nu espere nu gayn drwa pu osi kapav revok depite ki swa fane, swa pa respekte so program – ki li enn sinp depite ubyin enn Minis. Me, antretan, nu ena pu asire ki Rezis Elektoral inklir tu dimunn dan nu landrwa.
Alor, Parti LALIT pe demann ki tu nu manb parti, tu nu sinpatizan, e tu dimunn ki rezone dan Moris, pu ki nu tu ena enn bon lapros vizavi travayer ki pe fer sa resansman anyel la, sa port-a-port anyel la. Bizin ena enn koperasyon. Li enn travay kot ena kolaborasyon ant ofisye Biro Komisyon Elektoral ki pe fer sa port-a-port la ek tu elekter, sakenn dan nu sirkonskripsyon, dan 21 sirkonskripsyon. Nu tu ena enn rol pu ranpli pu bon derulman sistem elektoral, pu ki sa tigit demokrasi ki sistem kapitalist akord nu, apre otan lalit nu gran dimunn, fonksyone osi byin ki kapav. E nu bizin lite pu plis demokrasi dan lavenir. Me, dan nerport ki sistem, fode ena enn bon lantant ant travayer ki pe konpil Rezis Elektoral ek elekter ki anvi exprim so vot.
Par exanp, dan Bambous, enn manb LALIT finn, kan li fini anrezistre so fami, inform bann travayer ki ti pe fer port-a-port dan so sime ki, si zame zot ena problem avek enn lakaz (swa akoz lisyin pe fer zot tike, ubyin akoz ena kadna lor laport, ubyin petet akoz ena enn sa bann rar dimunn ki mal-resevwar travayer Biro Elektoral, ubyin nerport ki lot difikilte) zis re-vinn kot li, li pu gete kimanyer li, ansam ar lezot vwazin, kapav ede pu travers sa difikilte la.
Ala seki Biro Elektoral dir le 18 Zanvye, 2023:
January 18, 2023
“The Representation of the People Act provides that a House to House Inquiry be carried out for the compilation of the Register of Electors.
“This year, the said inquiry will be carried out as from Saturday 21 January to Saturday 4 February.
“Assistant Registration Officers will be calling in each household to register eligible and qualified electors.
“This exercise will take place in all the 21 constituencies, that is, in Mauritius and Rodrigues as well as in the island of Agalega.
“The new Register of Electors will come into force on 16th August 2023.”
Lor so sayt, Biro Komisyon Elektoral, li osi dir, e li dir li an Kreol, “Pou plis detay, sonn 800 2010”.
Lerla, ena enn Lalis Elekter ki provizwar ki pibliye sak lane. Ankor enn fwa, ena enn devwar pu nu tu, pu nu al cheke, sipa sone e cheke ki nu nom bel-e-byin lor lalist elekter. Lerla lalist final pu pibliye plitar sak lane.
