Ka LALIT kont Guvernman, Premye Minis ek Atorne Jeneral dan Lakur Siprem Zedi 12 Zanvye
10.01.2023
LALIT ena plezir inform piblik ki nu ka kont Guvernman kont Premye Minis Jugnauth ek kont Atorne Jeneral Gobin pe repran dan Lakur Siprem, Lari Edith Cavell 9-er gramatin Zedi 12 Zanvye.
LALIT pe chalennj nuvo lalwa lor “sitwayennte” ki permet Premye Minis aktyel ubyin fitir tu sinpleman “aras” sitwayennte depi nerport ki sitwayin Moris ki finn gayn so sitwayennte swit-a maryaz ar enn Morisyin de-nesans. Premye Minis pa mem bizin furni kit rezon pu banisman sa sitwayin ki li destitye de so sitwayennte. E sitwayin ki finn expilse kumsa par Premye Minis pena okenn drwa fer lapel. Li enn lalwa ki donn puvwar diktater enn dimunn eli ki vinn Premye Minis akoz li komann enn mazorite dan Parlman.
Lindsey Collen finn pran lor so zepol pu met sa ka la, me li enn ka ki anfet lor nom tu fami Moris ki afekte, e nu dan LALIT nu estime ki trwa-kar extended famili Moris ena enn manb ki marye ar enn dimunn ki pa ti ne isi. Alor, li enn lalwa represiv ki afekte nu tu. Li ule dir buku fami pu dan enn pozisyon feb pu exers zot drwa sitwayennte, pangar par-la ena reprezay enn zur. Sa ka la pe anfet fer enn demand formel divan Lakur Siprem ki li etidye nuvo lalwa e dekret bann seksyon ladan ki al-akont Konstitisyon kuma “nil” (void an Angle). Kot nu finn arive ziska ler dan ka la, se Lindsey Collen so avwe finn sumet so Plint avek sumonns divan Lakur, ar tu so argiman legal e tu so detay personel inklir so aksyon kuma enn sitwayin pandan so lavi dan Moris. Atorne Jeneral pa finn dimann naryin anplis. Me, Premye Minis ek Leta Moris finn avoy enn 20-enn kestyon. Nu avwe finn reponn tu sa bann kestyon la. De fwa Lindsey finn al divan Lakur. Sak fwa buku manb LALIT, fami ek kamarad osi byin ki piblik ki sutenir ka lor prinsip finn prezan. Finn ena enn deklarasyon par 12 fam kont sa bann sanzman dan lalwa, ki finn de-fer enn progre ki muvman fam ti fer ant lane 1977 ek 1983. E finn osi ena enn 29-enn lorganizassyon ek plis ki 100 individi ki finn dibute, dir zot sutenir ka.
Sa ka la pa ti pu posib si pa ti ena trwa profesyonel dan lalwa ki ti ofer pu pran sa ka la pro bono. Pro bono vedir zot pe travay pu dibyin tu dimunn, e pa pe pran okenn fiz. Ena Me. Antoine Domingue SC, Me Jean-Claude Bibi, ansyin Atorne Jeneral, e Avwe Ayesha Jeewa, ki pe fer letid avanse dan lalwa konstitisyonel.
