Collection Maurice 2022 par Immedia 29yem edisyon
23.12.2022
Lekip Immedia finn ankor enn fwa prodir enn Collection Maurice trileng pu lafin lane – par 25 diferan ekrivin sa lane la, lan 2022.
Lansman ti fer 1 Desam dan lotel Hennessy Park par Prezidan Repiblik Prithvirajsing Roopun, e diskur lor liv la par ansyin Prezidan Cassam Uteem.
Ena 10 zistwar an Franse otur tem Intégrité Assumé ekrir par Ananda Devi, Jérome Valin, Jean Lindsay Dhookit, Yves Giraud, Juckshmee Jeawon, Bettina Cadinouche, Vèle Putchay, Brinda Pillai, Sailesh Ramchurn.
Ena 12 zistwar an Angle otur size Honesty Challenged, ekrir par Ramesh Ramdoyal, enn dwayin, e osi bann nuvo kuma Raajeev Auchambit, ek lezot ekrivin kuma Tejaswinee Burumdoyal, Kobita Kumari Jugnauth (so nom kapav fer lekter krwar ki li madam Premye Minis aktyel, me de dimunn avek nom parey), Jiaa Mattan Dausoa, Dini Lallah, Michel Gautier, Prisheela Mottee, Yogini Veerapen, Valérie Moonowa, Jean Lindsay Dookit, ek manb LALIT Lindsey Collen.
An Kreol zistwar la ekrir lor tem Leker Prop par Flavia Doherty-Bigara, Mard-Ay 34, Jean Lindsay Dhookit, Yves Giraud, Steve Maudrame, Anil Gopal ek enn par manb LALIT Lindsey Collen.
Kum tuzur, li enn kado lane byin presye ki dimunn kapav ofer enn kamarad, enn koleg, enn fami.
