Editoryal Part IV :Ashok Subron Finn Fuy enn Gro Tru Politik e Li Ladan
06.12.2022
Kifer Ashok Subron finn mandye enn invitasyon ar Travayis pu prezan dan so gran miting dan Mohit Horl? E kifer li mem rod mandye invitasyon pu tu lezot parti politik – parlmanter ek extra-parlmanter – dan sa miting la? E kifer li pe al kolabor ar bann parti burzwa dan enn tel fason? Rezistans ti fek al dan enn manifestasyon Laurette avek pankart “BZTD” (bur zot tu deor).
Li donn 2 rezon ki pa tro mars ansam. Li dir asasina Kistnen enn “laliyn ruz” alor bizin fer nerport kwa pu tir MSM depi dan Guvernman. Sa vedir li pu alye ar nerport ki klas ek nerport ki bor politik. Anmemtan li dir li pe rod fer enn lalyans ki inifye tu seki andeor MSM (gos ek drwat, travayer ek patron) pu rant dan enn eleksyon zeneral inikman lor kestyon sistem elektoral. E lerla, kan tu sa parti amalgame ansam la gayn mazorite 3/4 (ki li krwar enn evidans), ansam ar sa ramasi parti patronal ek dedrwat, li pu introdir enn nuvo kad legal konstitisyonel pu ki eleksyon kapav fer dan enn fason ki permet zot-mem poz kandida san met enn “kominote” lor Nomination Paper. Pu sa, zot bizin mazorite 3/4, li dir e li vre, e sa explik kifer li pu mars ar nerport kisannla purvi kapav viz sa 3/4 la. Lerla dan 2 an, li dir, “zot” (seki opuvwar) pu apel enn lot eleksyon zeneral lor tu bann pwin politik ek ekonomik. Sa, li dir, so bi: regle problem “laliyn ruz” otur lamor Kistnen, e regle problem poz kandida san met kominote. E pu sa, li rod enn ti-plas ar Travayis, e lerla ansam zot pu amenn lezot parti politik ar zot. Sa, so plan. Kan li ti fek tann sa, Bérenger ti truv li absird, avek rezon. Li absird.
Me, ki vre rezon kifer Ashok Subron pe al get Parti Travayis?
1. Bankrut Stratezi Legalist Ashok Subron kont Best Loser System
Anfet, li finn telman fuye e fuye, politikman parlan, san kone kot li pe ale, ki Ashok Subron asterla truv li andan dan enn tru kot li pa kapav sorti.
Pandan pre 20-an depi so parti existe, li finn sirtu fer travay politik lor enn sel fron (apar travay sindikal ek ONG-ONG): bann ka legal san-ses kont Best Loser Sistem. Li enn stratezi legalist, e suvan sa aport so doz danze. Rezistans & Alternativ finn met enn seri ka divan Lakur Siprem, divan Privy Council, divan Komite UN Drwa Sivil ek Politik, e re-divan Lakur Siprem, e re-re-divan Lakur Siprem.
E lerla fek-la, zot anonse avek gran ponp e avek gran ponpaz, ki zot pe “fer lapel” kont dernye desizyon Lakur Siprem kont zot. Zot pe al Privy Council.
Lerla, san tranzisyon, ep! Zot anonse ki zot pe plito met enn “nuvo ka”, ki parfwa dan lapres raporte ki zot pe “amand zot plint”, ki vedir zot pe re-kumans mem ka a-zero me avek enn plint amande.
Telman zot finn fer ka legal ki zot finn bliye ki zot kont Best Loser Kominal, e zot pe asterla zis amenn lalit pu poz kandida san met enn kominote lor zot nomination paper. E zot finn bliye ki sa lalit la, li oblize enn lalit lor terin politik. Li pa posib rezud problem debaz, ki nesesit enn amandman konstitisyon pu sanz arsitektir elektoral, atraver enn lalit pirman lor plan legalist.
Antuka, zot pa kone kot pu ale aster. Zot dan enn tru. E dan sa tru kot zot ete, zot pe al may-maye dan zot prop argiman, osi. Kifer nu dir sa?
Rezistans enn parti ase elektoralist. Li enn parti sosyal-demokrat meynstriym. Zot finn abandonn enn stratezi deklas baze lor politik deklas. Zot manyer fer politik se poz kandida, amenn kanpayn tradisyonel. Alor, zot bizin kapav poz kandida pu avans zot politik.
Me, zot finn met zot-mem dan enn tru kot zot pa kapav poz kandida.
Apre pre 20 an konba: zot pa kapav poz kandida san met enn “kominote” parski Konstitisyon pankor sanze e sa li parski fode 3/4 eli tom dakor pu sanz li. Zot pa kapav poz kandida parski fode amenn enn lalit politik lor terin pu sanz Konstitisyon, e pa zis enn lalit legal dan Lakur, e sa li parski best loser ek so deklarasyon etnik, li form parti enn arsitektir konstitisyonel ki selman bann eli (pa zis ziz ki nome) gayn drwa re-konstrir kan kas li. Kimanyer enn Lakur Siprem kapav “kas” enn arsitektir elektoral san ki li ena puvwar ranplas li? Si zame Rezistans reysi, e Lakur Siprem sipa Privy Council fer sa, li ti pu iresponsab.
Li ti pu danzere.
E dayer, manyer Rezistans inn amenn so ka Nasyon Zini, zizman ki zot finn gayne, li expoz sa. Zizman al met zot dan enn anbara politik mortel: Komite Drwa Sivil ek Politik dir swa Guvernman bizin amand Konstitisyon pu eliminn Best Loser System (e pu sa, guvernman bizin mazorite 3/4, ki pankor existe, ubyin kikenn bizin organiz enn ku-deta!) swa, e isi but danzere, Guvernman bizin amand lalwa pu re-introdir kestyon lor ki “kominote” sak dimunn Moris ete dan Resansman ki fer sak 10 an. Rezon kifer finn aret poz kestyon depi 1972, li presizeman parski kestyon la riske propaz kominalism, plito ki diminye li, ki ti bi BLS. Ena dimunn deza anvi enn nuvo kategori pu kominote X, lezot deza ule enn nuvo kategori pu kominote Y, etc, e tu sa faksyon la, su lidership zot tit-burzwazi respektiv, riske fer siranser kominal. Rezistans pa ule sa, me se sa ki zot riske gayne. E li rezilta direk zot stratezi legalist bankal kont enn problem fonsyerman “politik”, dan sans nob sa mo la. E dayer, resansman fini fer lane dernyer, e erezman pa ti inklir sa kestyon la.
E manb Rezistans pa kapav mem poz kandida zordi pu ki zot dan enn pozisyon, antan ki kandida, pu propaz zot lezot pwin ekonomik, politik ek sosyal dan zot program, ni pu sey eli lor la.
Alor, zot dan enn tru ki zot-mem finn fuye pandan 20 an.
Sel manyer Ashok Subron finn truv pu sorti se pu agrip ar Ramgoolam?
2. Bankrut Politik so Alye Bruneau Laurette, pu ki Subron finn Dibut Garan
Si ena enn sel dimunn ki finn kosyonn Bruneau Laurette depi kumansman so re-inkarnasyon depi ex-azan MSM an “ero popiler”, se Ashok Subron. Onivo politik nasyonal dan pei, personn pa ti konn Laurette. Serk azan MSM ti sirman konn li.
An 2020, Ashok Subron finn invit Bruneau Laurette dan preparason so manifestasyon 11 Ziyet. Laurette ti prezan dan manifestasyon osi, avek bann bandrol inprime avek enn slogan drol kont Premye Minis Lind, Modi, kan sa pa ti lor azanda manifestasyon ditu. Lerla Ashok Subron finn sutenir manifestasyon Bruneau Laurette le 29 Ut 2020, kot Laurette emerze kuma enn sipozeman gran lider popilist, avek enn doz kominalis zis anba sirfas (kan li kritik nominasyon dan lapolis, ubyin kan li kumans menas pran baz MMM ek PMSD), e tusala omilye kriz post-Wakashio kot Bruneau Laurette finn ansorsele dimunn ar tu kalite zistwar farfeli – depi nofraz la ti enn swadizan enn “akt de ger” ziska guvernman ti pe “amenn ladrog” dan sa imans navir la. E so manifestasyon ti lor enn sel veritab slogan: BLD. Enn program vid. Enn program vilger. Enn program vyolan. E Laurette so bann zimaz lor internet, truv li pe dibut ar fizi, pe met linz avek fizi lor la, kumadir enn sinbol militarist.
Laba, dan manifestasyon, dan enn moman kot bann ase gran ti-burzwa ti an-panik (top manejer lotel ti pe sey adapte a 1/2 lapey akoz frontyer ferme) e mem seksyon burzwazi (san kontra, ni tennder) ti apiy Laurette for-for, sirtu par enn orater manifestasyon, Patrick Belcourt, ki ti pran laparol lor mikro anfaver re-uvertir frontyer. E sa ti sel vre revandikasyon sa manifestasyon la.
Dan miting Bruneau Laurette Mahebourg an Septam 2020, laba, Subron ek Rezistans ti prezan ankor, dibut garan ankor. Ansam, zot ti amenn kanpayn ar patrona kont CSG, ki esansyelman enn tax lor patron ek gro salarye.
Kan Laurette ti pe al afebli deza, ariv Fevriye 2021, lepok so rasanbleman ansam ar MMM, PMSD ek Travayis, Rezistans ti partisipe, fer manifestasyon ansam. Sa amalgamasyon la ti terminn dan enn veritab o-de-budin. Me, Rezistans ti vinn dan manifestasyon kot MMM ek PMSD ek PT ti ete. Selman, zot ti ena pankart avek slogan ki dir BZTD (bur zot tu deor). Sa li enn lot versyon pli larz sa-mem slogan vid, vilger, vyolan “BLD”. Anpasan, ki finn ariv sa slogan Rezistans la kan Subron & Co. pe al miting Mohit Horl fek-la? Li inkrwayab bann zafer farfeli ki pe arive lor lasenn politik zordizur.
Apre arestasyon Laurette, parey kuma Parti Travayis, Rezistans finn kontiyne dan enn lalyans informel ar Bruneau Laurette. Dayer ti ena sa 3 lorganizason prezan dan Mohit Horl: Travayis, Rezistans & Alternativ ek Linyon Sitwayin Bruneau Laurette.
Bruneau Laurette so rol politik finn tultan res opak. Kuma tu popilis, dimunn swiv li san konn li. Zordi lapolis finn ferm li lor sarz ladrog. Li dir li finn instale. Me, kot li ete, li pa enn alye politik valab pu Subron ubyin pu personn. E Subron finn mont li depi premye kumansman, e ankor tuzur paret pros ar li. Lor ki baz, sa li pa kler.
Konklizyon
Seki Ashok Subron pe propoze, si li arive, pu inevitableman amenn enn likidasyon danzere tu parti politik Lopozisyon. Mazinn u ki an 2014, Travayis ek MMM pa ti futi res ansam pandan enn kanpayn elektoral. Tulde finn sorti zot lalyans blese, afebli. An 2019, kan Travayis ek PMSD pa ranport laviktwar, zot osi, zot lalyans kase zur eleksyon. Tulde sorti afebli. E si Ashok Subron krwar kapav avans klas travayer par mars ar klas kapitalis, abe li pu bizin re-reflesi. Si li krwar li kapav transform natir enn muvman popilist ki deza fini demare otur slogan BLD an enn lalyans avek enn program kler anfaver klas travayer, li pe fer erer. Erer grav.
Kan likid bann parti lopozisyon existan, li danzere. Li kapav anpir reyn otoriter MSM. E sa kalite lalyans ki Subron pe propoze, li fer exakteman sa: li riske likid tu sa bann parti la, inklir pu li. Lerla parti la, mem li ankor existe, li pu fini perdi so form, so lafors miskiler, so fors defrap politik. Sa-mem ki apel “likidasyon”.
Sel manyer pu avans lamas dimunn dan klas travayer se atraver enn program anfaver klas travayer, kuma program LALIT ena, enn program ki depann lor klas travayer konpran li, e azir lor baz program la. Li kapav paret difisil. Li kapav vreman et difisil. Me, napena sime kupe. Samem sa.
