Editoryal – PART III: Ramgoolam so program, kuma Li finn Anonse dan Mohit Horl
06.12.2022
Kan Ramgoolam anonse ki Parti Travayis pu fer so rasanbleman tusel dan Mohit Horl dan sirkonskripsyon Premye Minis Pravind Jugnauth – mem kan ti deza ena desizyon kolektif ki zot pu fer enn rasanbleman initer ansam ar MMM ek PMSD dan sirkonskripsyon Nimero 8 – Ashok Subron depi Rezistans ek Alternativ al mandye enn invitasyon pu Rezistans. E zot ti prezan, laba. Linyon Sitwayin (parti Bruneau Laurette) ti prezan, li osi. (Apre sa, Rezistans inn al zwenn lider PMSD.)
Kan enn parti politik pe mobilize, kuma Travayis ti pe fer dan Mohit Horl, li la, pandan sa mobilizasyon, ki u kone ki exakteman so program ete. So program, li dan konteni so mobilizasyon. So program li pa kiksoz, kuma enn otokolan, ki li vinn kole apre, kan fini mobiliz lamas dimunn lor tu kalite pwin demagog, popilist, vid ubyin ridikil – ubyin mem danzere.
Alor, eski Ramgoolam ti integre kit pwin programatik dan so diskur mobilizasyon Mohit Horl? Li ti koz lor kimanyer li normal li gard so kas dan so kofor, e pa anba so matla. Dayer, kan li pe koze, li paret rapel ki kas la li sipozeman kas Parti Travayis, alor li finn inpe may-maye, anbruye lor la. Li ti osi dir ki li pa ti ne enn “nwar tuni” kuma bann Jugnauth ti ne.
Me, anfet li ti met divan trwa pwin programatik dan sa miting Mohit Horl kot Rezistans ti “invite doner” laba ansam ar Travayis ek Linyon Sitwayin. Abe ki sa trwa pwin la? Zot, tule trwa pwin, ase danzere.
1. Ramgoolam dir ki Travayis pu bes pri lesans ek dyezel par Rs20 kan li vinn opuvwar. Sa, li enn konnri total, kom promes. Ramgoolam pa mem kone, ni li pa kapav kone, ki pri pu ete lor marse mondyal dan sa moman kan li devine li pu vinn opuvwar. E li pa dir kimanyer li pu sibvansyonn diri, lafarinn, dilwil kwi-manze ek gaz menazer kan li tir sa tax lor dimunn ki rul masinn.
2. Ramgoolam dir ki Travayis pu amand IBA Act ek ICTA pu ki dimunn kapav dir “seki zot anvi” lor radyo ek lor rezo-sosyal kuma Facebook. Sa osi, li enn konnri total. Li bizin omwin dir li pu rod enn fason demokratik pu protez zanfan kont pedofil, protez sosyete kont piromann ki par expre sey lev bagar kominal, diminye sayber-buliying, ek limit sextorsyon.
3. Ramgoolam dir, pu bann prosenn eleksyon zeneral, li pu anpes Bangladeshi kokin eleksyon. Kumsa li koze. So diskur ti zenofob. Li danzere. Li blam seksyon klas travayer pli feb dan sosyete, li akiz zot kokin eleksyon. Ondire li pena azan politik prezan dan lasal vote. Ondire pa ti bizin prodir ID divan tu dimunn, kan al vote. Li finn persiste, kuma Trump dan USA, mintenir ki finn “kokin” so eleksyon. Li ti pu eli, li. Li ti sipoze o-puvwar asterla, li. Me, MSM finn kokin eleksyon. Sa kalite koze Ramgoolam la, li danzere. Alor, mem li finn perdi tu ka elektoral dan Lakur, enn apre lot, li persiste dir eleksyon kokin. So trwa pwin lor eleksyon, zot osi, zot feb net: li dir li pu ferm kompyuter-rum, li pu fer kawnting mem lanwit ki eleksyon, e li pu invit obzervater internasyonal.
Ramgoolam, so persistans ar “eleksyon kokin” li ena lezot danze. Li pa finn aksepte ki Parti Travayis, pli gran parti dan Lopozisyon pran pos Lider Lopozisyon. Kimanyer li pu permet donn Arvin Boolell sa grander la? Kan ti bizin li, Ramgoolam, laba? Alor, Lopozisyon dan pozisyon ridikil, kot pli tipti parti dan
Lopozisyon, PMSD, li ena pos Lider Lopozisyon.
Kifer Ashok Subron ek Rezistans pe rant dan sa kales kase? Sa kestyon amenn nu direk lor nu katriyem lartik.
