Abitan site Argy res mobilize apre viktwar lor lakaz lamyant
25.11.2022
Komite konzwin LALIT-abitan lakaz lamyant Site Argy, Flak, ti zwenn pu get kuma pu azir pli divan apre viktwar lor desizyon guvernman pu ranplas lakaz lamyant.
Dan renyon ki ti ena lye le 24 Oktob, abitan site Argy finn dir ki bann ofisye NHDC ti vizit landrwa pu fer serve lor komye lakaz lamyant ena. Dan renyon, enn abitan finn dir ki li finn zwenn minis lapes Sudheer Maudhoo ki depite laba dan enn seremoni distribisyon multon, kot minis pa ti paret tro okuran ki ena enn linite spesyal asterla dan NHDC ki okip anlev lakaz lamyant ek ranplas li. Sa abitan la finn dir ki minis Maudhoo ti pe koz enn lot koze, sipa guvernman pe negosye ar tablisman pu ena enn transfer bay lor later site, me narnye konsernan sa plan NHDC. Abitan finn dir ki mem ofisye biro CAB dan Flak pa okuran sa linite spesyal NHDC. Li paret ki ena enn gro problem kominikasyon onivo Leta ek so bann institisyon.
Gary Homet ek Rada Kistnasamy ki ti reprezant LALIT, finn inform abitan lor rankont ant linite lakaz lamyant dan NHDC ek reprezantan LALIT. Dan sa renyon la, reprezantan NHDC, M.Vijay Narraidoo finn anonse ki:
- NHDC pu fer enn serve antye Moris pu verifye nomb lakaz lamyant reste.
- Minister lanvironnman pu retir pano lamyant ek demont lakaz la.
- NHDC pu donn kontrakter kontra pu rekonstriksyon lakaz anbeton, 49 M kare sakenn.
- Travay pu demare site Laferme, Bambu ek site Ste Claire, Goodlands ki dapre NHDC de pli gran site.
- NHDC pu pran sarz awe ek noter pu fer afidavit kot neseser ek pey transport si ena pu al Port-Louis.
- NHDC pu alwe Rs5000 kuma fre lokasyon si abitan bizin lwe enn lot lakaz pandan konstriksyon
Abitan site Argy finn desid pu pran kontak avek NHDC pu dimande lor kan pu kumans ranplas lamyant kan zot finn anpran ki NHDC pe konsantre zis lor 2 site, site Laferm ek site Ste Claire.
Apre renyon, 5 abitan prezan finn dakor pu partisip dan renyon LALIT dan rezyon Flak, pu analiz ansam kriz ki tus klas travayer ek dimunn mizer.
