Ranplasman lakaz lamyant: Reinyon Laviktwar dan Lesid
20.11.2022
Reinyon komite konzwin LALIT - abitan lakaz lamyant pu anons laviktwar ti demare an Oktob par enn revolt delege lamyant dan Mahebourg. Laba ena enn tradisyon disipline pu invit dimunn dan reinyon. Militan LALIT Roland Fozoo ek Rajni Lallah ti prezan. Delege site EDC Balans dan Plaine Magnien ki osi enn sinpatizan LALIT osi ti vini. Delege (plizyer ladan finn vinn sinpatizan LALIT dan dernye 4-5 an) ti’nn invit dimunn par port-a-port kom dabitid me kan finn ena reinyon, ti ena zis enn duzenn dimunn dan renyon. Kan delege finn gayn rapor rankont avek NHDC komkwa pe kumans prosesis ranplasman lakaz lamyant, zot finn byin satisfe enn kote, e amerde lot kote ki buku abitan pa finn vinn dan renyon pu gayn rapor sa viktwar-la. Alor zot finn desid pu met enn lagrev, pa donn okenn rapor lor viktwar e dir abitan ki finn gayn laviktwar, me si zot anvi gayn rapor zot bizin vinn dan prosenn reinyon ki finn fixe dan 2 semenn.
De semenn apre, ti ena enn 40enn dimunn dan reinyon e delege finn kumanse par explike ki rol delege se ne pa pu pas kot sak dimunn donn rapor renyon. Fale vinn dan renyon pu tu dimunn konpran, pu diskit pwin dan renyon e pran desizyon ansam si bizin. Apre sa pwin dord-la ki Roland ek Rajni finn donn rapor rankont avek NHDC.
Fyerte dan lalit
Abitan finn satisfe net ki lalit ki Komite konzwin LALIT – abitan lakaz lamyant finn porte. E tu dimunn ki finn partisip dan mobilizasyon pu sa viktwar-la finn fyer. Delege dan renyon finn fer rapel tu bann aksyon ki abitan finn fer onivo Mahebourg (debark CAB Mahebourg, e kan depite MSM Jhugroo ki ti Minis Lozman alepok pa vini, al CAB Plaine Magnien ansam avek abitan lakaz lamyant Plaine Magnien), manifestasyon dan Mahebourg, e apoteoz dan sa lalit-la, se sa de gran manifestasyon ansam avek abitan lakaz lamyant dan 52 rezyon an 2017.
Kanpayn politik LALIT lor 20 an
Roland Fozoo ti explike kimanyer an 2001-02, se li ki ti propoze dan brans LALIT Rose Belle ki LALIT amenn kanpayn politik lor kestyon lakaz lamyant akoz li kitsoz ki afekte lasante travayer ki pena lemwayin pu ranplas lakaz lamyant. Li ti explike kimanyer LALIT, li enn parti kot kan ena mosyon dan brans, li diskite dan Komite Santral, e kan parti truve pwin-la kadre dan lalit politik pu klas travayer gayn puvwar, parti-la an-antye amenn sa kanpayn-la. Kumsa-mem, li finn explike, mobilizasyon finn kumanse an 2001-2. Rajni Lallah ti explik kimanyer sa premye faz-la, ansam avek lalit sindika CTSP ki ti pe amenn kanpayn lor danze lamyant lor sayt travay sirtu, finn ede pu ki ena 6 rapor ofisyel leta ki etablir danze lamyant, e ki dir guvernman bizin ranplas lakaz lamyant. Ziska ki guvernman an 2015 bizin anonse ki li pu ranplas lakaz lamyant. Ant 2016 ek 2022, enn dezyem faz mobilizasyon konzwin LALIT-abitan lakaz lamyant finn deklanse ziska li finn abuti.
Delege kan pe analiz lalit ki finn amene finn riy dimunn ki krwar ki kan u fer enn manifestasyon guvernman sede tutswit. “Sa lalit-la bizin ena pasyans, sa. Bizin kontiyn res mobilize buku letan sa. Finn pran 20 an pu gayne” zot finn dir.
Reinyon lezot site Lesid ek Henrietta
Dan reinyon laviktwar dan mwa Oktob ek kumansman Novam dan Batimarais, Souillac, site Balans Plaine Magnien, site Langlois Plaine Magnien, L’Escalier, Camp Diable, Henrietta, ti ena mem kalite sesyon rekoleksyon, mem kalite selebrasyon sa lalit-la. Dan preske tu renyon, delege finn explik seki zot finn aprann depi sa lexperyans lalit-la e osi zot finn osi kritik abitan ki finn amenn rol aryer-gard: seki get zis pu zot tusel, seki fye lor Minis, seki dekuraz dimunn vinn dan reinyon pu organize ansam avek LALIT. Dan Plaine Magnien, ti ena abitan ki ti dan mobilizasyon 2001-2. Zot finn temwayne kimanyer ti pe fer renyon abitan – LALIT lor bor sime dan site alepok. Dan plizyer renyon, dimunn finn riye kan zot mazine ki pu arive kan ena seremoni “donn lakle” lor nuvel MBC. Sirman MBC pu rod kit abitan pu dir “Mersi Misye Minis ki u finn ranplas nu lakaz”. Kan anfet se mobilizasyon abitan ansam avek LALIT ki finn amenn viktwar. Dan tu sa bann reinyon-la, abitan finn formelman remersye LALIT pu nu konstans e dedikasyon politik lor letan.
Rezolisyon pu rakont sa lalit-la dan landrwa
Dan Camp Diable, abitan finn pran rezolisyon pu rakont tu dimunn dan landrwa laverite lor kimanyer LALIT finn apiye pu mobiliz abitan e abitan finn dibute partu kot ena lakaz lamyant kat kwin Moris e se kumsa ki finn gayne. Enn semenn apre, kan ena renyon laviktwar dan La Sourdine, ena abitan fini gayn nuvel lor laviktwar akoz li dir “Mo ti al enn lamor Camp Diable, zot ti pe diskit sa laba. Kumsa mo finn gayn nuvel.”
Omaz a seki finn desede
Dan Camp Diable ek Batimarais, ti ena zanfan abitan ki ti dan mobilizasyon ek manifestasyon Port Louis an 2017 ki finn desede antretan prezan dan reinyon. Dan Camp Diable, tifi madam ki finn desede ti ena larm dan so lizye kan li finn aprann lor sa lalit ki finn amene e rol so mama ladan, pu ranplas lakaz lamyant dan lekel se li ki pe reste aster. Sa ti enn moman byin emuvan. Dan Souillac osi, abitan finn rann omaz delege feu-Alain Janvier ki ti vremem dedye ki finn desede an 2020.
