Rankont abitan Site Lamyant Ste Catherine ek Circonstance pu selebre la viktwar
18.11.2022
Abitan de Site EDC fer ar pano lamyant, Site Ste Catherine ek Site Circonstance, ti fer enn reynion ansam ar LALIT yer, Zedi 17 Novam pu selebre laviktwar apre desizyon guvernman pu pa zis anlev sak lakaz lamyant, me osi al delavan ranplas li avek enn lakaz anbeton.
Sa renyon ti organize par komite Konzwin LALIT-Abitan Site Ste Catherine/Sirkonstans, e ti ena lye dan Village Hall L’Agrement, St Pierre. Ti ena anviron 35 dimunn prezan. Rajen Coothen ek Rada Kistnasamy ti reprezant LALIT dan sa renyon la. Alor, Rezyonal LALIT Rozil-Les pe fer ankor enn reynion laviktwar dan Les pei, apre reynion dan Olivia ek dan Caroline.
Rada Kistnasamy finn explike ki, gras-a mobilizasyon ki abitan tu sa lakaz lamyant dan enn 50-enn Site partu-partu dan Moris, ansam ek LALIT, finn amene lor plizyer lane ki finn abuti dan sa viktwar la. Li finn donn rapor lor rankont ki Rajni Lallah ek li-mem ti ena ar yunit lamyant dan NHDC, reprezante par M. Vijay Naraidoo.
Ala enn rezime desizyon ki NHDC finn anonse dan sa rankont la;
- NHDC pu fer enn serve, antye tu Site lamyant dan Moris, pu verifye nomb lakaz lamyant reste.
- Minister Lanvironnman ki pu responsab pu retir pano lamyant e demont lakaz existan la.
- NHDC pu donn kontrakter kontra pu rekonstriksyon lakaz anbeton, 49 met kare sakenn.
- Travay pu demare Site La Ferme, Bambu ek Site Ste Claire, Goodlands ki, lotorite estime, de pli gran site.
- NHDC pu pran sarz Avwe ek Noter pu fer afidavit, e pu kuver sa fre la, e pu kuver fre transpor si dimunn ena pu deplase pu zwenn noter.
- NHDC pu alwe Rs5,000 kuma fre lokasyon si abitan bizin lwe enn lot lakaz pandan konstriksyon.
Anplis seki NHDC finn deside swit a tu sa mobilizasyon depi 2002, e akselere depi 2018, ena propozisyon LALIT ki ti fer dan sa reynion la:
1. Ki NHDC avoy let a tu abitan lakaz lamyant pu fer zot kone ki pu ranplas zot lakaz e lor ki kondisyon. Sa li pu ki tu abitan lakaz lamyant rasire ki Minister Lozman ek Later ek NHDC rekonet zot kom abitan lakaz lamyant e pu rasir zot ki pu ranplas zot lakaz;
2. Ki NHDC fer laranzman, par exanp atraver biro CAB dan sak rezyon, pu ki abitan lakaz lamyant kapav gayn ranseynman lor kan pu ranplas lakaz dan zot rezyon, sanki bizin al kot Minister Ebenn;
3. Ki, dan ka lakaz zeritye kot pa pe reysi met enn lord minimem e akoz lamyant enn problem lasante piblik, Minister met enn notis ofisyel ki pu ranplas lakaz-la pu rezon “lasante piblik”. Dayer Konstitisyon, li rekonet ki Leta bizin kapav intervenir dan ka kan propriyete prive, kuma lakaz lamyant, si li finn vinn enn menas pu lasante piblik. Lerla NHDC bizin rekonet rezidan-la, si li montre ki li finn res ladan lor letan, e fer laranzman avek li pu ki kas lakaz, ranplas li. Si ena lezot zeritye ki ena problem lozman, lerla pu bizin inskrir zot pu lakaz NHDC.
Dan renyon yer, Rajen Coothen finn koz lor linportans pu dimunn organize e grupe kan ena lalit pu reklam drwa, e lor linportans ki sak dimunn ena dan sa lalit la.
Enn abitan finn poz kestyon lor kuma zot pu kone ki pe derule dan lezot rezyon lor kestyon lamyant, ar kisannla zot pu adrese? Eski pa bizin kontiyn fer renyon parey ankor? Swit-a sa kestyon la, Rada Kistnasamy finn dir ki travay ki LALIT finn amene ansam avek bann abitan finn kilminn dan sa viktwar la, kot Leta finn pran responsabilite, finn alwe enn bidze, e pe kumans fer travay ranplas lakaz. Nu travay antan ki bann “komite konzwin abitan-LALIT ansam avek abitan lakaz lamyant” li oblize aret lamem. Dan LALIT, nu pu swiv seki pe arive inpe parey kuma tu nu lezot kanpayn alabaz, ki kontiyne tultan.
Asterla, dimunn ki interese dan travay politik alabaz pli zeneral kumsa, zot invite pu vinn dan renyon LALIT, pa zis lor kestyon lamyant, me osi lor tu size ki konsern liberte ek drwa dimunn, ek ki get vre koz inegalite deklas dan sosyete. Alafin renyon, sis abitan finn donn zot nom pu vinn dan renyon LALIT dan rezyon.
