Renyon Laviktwar Site EDC Ste Claire dan Goodlands
14.11.2022
Dan Site Ste Claire Goodlands ena gran efervesans parmi abitan site EDC apre viktwar lor revandikasyon pu ranplas lakaz lamyant, enn viktwar ki vini apre plis ki 20 an lalit. Sa latmosfer la li finn prezan depi enn reynion abitan anar 2 manb LALIT, kot ti zet enn kudey lor natir sa gran viktwar la.
Anplis, NHDC finn deside pu kumans travay demolisyon-rekonstriksyon dan sa Site la, osi byin ki Site EDC Laferm Bambu, akoz dan sa 2 site la, ena plis lakaz lamyant. E Guvernman pe viz pu ranplas tu lakaz dan prosenn 2 an.
Dan renyon konzwin LALIT-abitan Site Ste Claire, ti ena 25 dimunn prezan. Renyon ki ti anime par 2 manb LALIT, Alain Ah Vee ek Rada Kistnasamy ti fer dan enn gran lavarang enn manb.
Alain Ah Vee finn demar renyon par anons sa viktwar ki finn gayne apre buku mobilizasyon abitan lakaz lamyant ansam ar militan LALIT – dan sak sa 50-enn Site EDC la, e osi onivo nasyonal.
Alain finn dir ki finalman guvernman finn alwe enn bidze pu al delavan ar seki tultan nu pe demande, savedir demoli lakaz lamyant, ranplas li par enn lakaz plis ansekirite an-dir, e furni larzan pu lokasyon antretan, e okip “problem lakaz zeritye”.
Alain Vee finn explike kimanyer Guvernman pe prosede;
- Guvernman finn prezant e fer vote dan Parlman enn som dan Bidze Guvernman de Rs800 milyon pu demantel e ranplas sak lakaz lamyant, lor enn peryod 2 an.
- Minister Lanvironnman pu fer demantelman e evakyasyon pano lamyant.
- Diferan kontrakter pu fer konstriksyon lakaz su kontrol NHDC. (Guvernman pu pran sarz peye pu tu sa travay kase-ranze la.)
- Sak nuvo lakaz pu 49 met kare, setadir pu enn tigit pli gran ki lakaz aktyel.
- Sak fami pu gayn lokasyon valer Rs5,000 par mwa si li bizin kit so lakaz, ale, kan pe kase-ranze. (Ena sertin lakaz ki ena plas fer konstriksyon nuvo lakaz avan, lerla kas ansyin lakaz lamyant.)
- Guvernman pu ede pu gayn noter pu rezud problem “lakaz zeritye”, e guvernman pu pey fre noter la.
Abitan Site Ste Claire finn explike, enn par enn, kimanyer ofisye NHDC pe pase an-grup, diskite lor presizeman ki bann papye ki abitan bizin met-azur avan demolisyon ek rekonstriksyon zot lakaz. Dan enn renyon ki NHDC ti fer avek enn grup abitan site Ste Claire, ena abitan finn fer bann ofisye konpran, zot dir, ki se gras-a mobilizasyon ansam avek LALIT ki guvernman finn ariv pran sa desizyon la.
Plizir abitan lakaz lamyant finn dir ki, dan zot ka, ena buku difikilte pu kontakte zeritye, tom dakor pu finaliz afidavit, alor sa kapav retard sa plan NDHC ki ena enn target pu ranplas tu lakaz lamyant avan 2 an.
Rada Kistnasamy finn explike ki li ek Rajni Lallah ti dan rankont avek M. Naraidoo, ki ansarz Yunit dan NHDC ki pe exekit plan demoli-ranplas lakaz lamyant la, finn propoze formelman ki NHDC servi rezon “Public Health” pu ranplas lakaz lamyant, si neseser. Sa pu evit enn ded-lok, ki abitan lakaz lamyant kapav zwenn si ena zeritye pa dakor, ubyin pa futi, tom dakor pu kit rezon. Pa kapav les lamyant dezintegre, rant dan ler, anplas-anplas, kan li enn danze lasante: enn sertin moman, bizin azir.
Lezot propozisyon ki LALIT finn fer dan sa reynion avek reprezantan Yunit NHDC:
1.Ki NHDC avoy let a tu abitan lakaz lamyant pu fer zot kone ki pu ranplas zot lakaz e lor ki kondisyon. Sa li pu ki tu abitan lakaz lamyant rasire ki Minister Lozman ek Later ek NHDC rekonet zot kom abitan lakaz lamyant e pu rasir zot ki pu ranplas zot lakaz;
2. Ki NHDC fer laranzman, par exanp, atraver biro CAB dan sak rezyon, pu ki abitan lakaz lamyant kapav gayn ranseynman kan pu ranplas lakaz dan zot rezyon, sanki bizin al kot Minister; sa paret pe marse dan sertin landrwa, me pa tu.
3. Ki, dan ka lakaz zeritye, akoz lamyant enn problem lasante piblik, Minister met enn notis ofisyel ki pu ranplas lakaz-la pu rezon lasante piblik. Dayer Konstitisyon, li rekonet ki Leta bizin kapav intervenir dan ka kan propriyete prive, kuma lakaz lamyant, li finn vinn enn menas pu lasante piblik. Lerla NHDC bizin rekonet rezidan sa lakaz la, si li montre ki li finn res ladan lor letan, e fer laranzman avek li pu ki kas lakaz, ranplas li. (Si ena lezot zeritye ki ena problem lakaz, lerla pu bizin inskrir zot pu lakaz NHDC.)
Dan dernye 3 semenn lekip NHDC pe anfet fer enn servey dan tu sa 50-enn Site EDC la, pu kone sir-sir komye lakaz lamyant ena, e kisannla res ladan.
Konklizyon
Aster ki finn gayn sa viktwar pu ranplas lakaz lamyant, se abitan sak lakaz lamyant individyelman ki natirelman bizin fer swivi, li-mem. Militan LALIT ek delege abitan pe inform tu abitan ki, si zame ofisye biro CAB pa okuran ki pe pase, se li, biro CAB, ki pu bizin kontakte NHDC pu kone ki pe arive.
Apre renyon, plizir abitan prezan finn montre lintere pu donn kudme dan travay politik LALIT lor tu size, pa zis kestyon lozman.
