Laviktwar lor lakaz lamyant Selebre dan EDC Olivia ek Caroline
08.11.2022
De militan LALIT ansarz kordinasyon Site EDC kot ena lakaz lamyant dan rezyon Rozil-Les pu LALIT, Alain Ah Vee ek Christian Batour, finn fer 2 reynion dan “seri reynion laviktwar” sa wikenn la. Zot finn fer enn reynion Site ECD Caroline dan enn sant sosyal informel, e lot la dan Olivia dan enn Kyos uver. Dan tulede reynion ti ena lanbyans laviktwar. Sirtu bann madam prezan finn rapel ki zot prop mobilizasyon ki finn amenn sa, ansam ar mobilizasyon tu sa 52 site EDC. “LALIT ki finn ed nu, finn kordinn nu,” enn madam finn dir dan Caroline. Dan Olivia, enn madam finn reponn, kan Alain dir ki mobilizasyon abitan Site EDC ki finn amenn laviktwar, finn proteste ki, “Gras-a zot dan LALIT osi ki nu finn reysi!” Enn vye Madam, Olivia, finn azute, “Ar mo badinn mo finn marse dan Port Louis! Kumsa nu finn gayne.” Li dir ki nu bizin rekonet.
Alain ek Christian binn explike ki, efektivman, li swit-a 2 gran manifestasyon Anvil, an lane 2018 ek 2019, plis enn 20-enn manifestasyon ar Bandrol partu dan Moris otur bann Biro CAB lokalize, e let ki sakenn finn anvoy Premye Mins. Se tu sa ki finn fer nu gayn viktwar aktyel. LALIT so bann brans ek rezyonal finn ede pu kordinn sa travay la, pu ki li ena enn lefe politik. Striktir Komite-Konzwin ant Rezyonal LALIT Rozil-Les ek abitan sak Site EDC ki finn permet sa viktwar la.
Guvernman finn finalman, akoz tu sa mobilizasyon lor letan la, pran desizyon swivan:
1. Li finn vot enn bidze pu demantel e ranplas sak lakaz lamyant.
2. Li viz pu fini fer sa dan 2 an.
3. Minister Lanvironnman pu fer demantelman e evakyasyon pano lamyant.
4. NHDC inn met enn Yunit pu konstrir nuvo lakaz.
5. Diferan kontrakter pu fer konstriksyon lakaz.
6. Guvernman pu peye pu kase, e pu ranze.
7. Sak lakaz pu 49 met kare, setadir pu enn tigit pli gran ki lakaz aktyel.
8. Sak fami pu gayn lokasyon valer Rs5,000 par mwa si li bizin kit so lakaz, ale, kan pe kase-ranze. (Ena sertin lakaz ki ena plas fer konstriksyon nuvo lakaz, lerla kas ansyin lakaz lamyant.)
9. Guvernman pu ede pu gayn noter pu rezud problem “lakaz zeritye”, e guvernman pu peye.
Dan reynion, Alain ti met lanfaz lor linportans ki pa bizin a okenn moman peye. Fode pa permet bann eskro vinn extork larzan depi dimunn.
Dan Caroline, madam ki kordinn reynion ti ena enn irzans medikal dan lafami e li pa ti kapav prezan anpersonn, me li ti fini invit dimunn deza. Sa 2 reynion la, zot ti reprezant “reynion laviktwar”, e pa pu ena ankor reynion lor lamyant. Sak dimunn prezan ti gayn enn panfle kot met sa bann pwin la an Kreol e byin kler, pu zot sir. Asterla zot pu bizin kordinn ar NHDC, fami par fami.
5 dimunn ki ti dan gran mobilizasyon lor lamyant dan sa 2 vilaz la pandan sa dernye 4 an, pe deza zwenn dan bann reynion LALIT anzeneral akoz zot kontan nu manyer travay, e zot anvi lite pu enn sosyete egal.
