Kolok lor “Lalit pu Langaz Kreol: Etadelye apre 55 an Lindepandans”
31.10.2022
LALIT ena plezir inform lekter ki Ledikasyon pu Travayer (LPT) pe invit dimunn pu prepar prezantasyon pu enn “kolok” ki pu fer lane prosenn. Ala Kominike ki LPT finn avoy nu alokazyon Zurne Mondyal Langaz Kreol, e an preparasyon pu selebrasyon 55 an Lindepandans lane prosenn:
Ledikasyon pu Travayer pe invit dimunn prepar papye pu prezante dan nu 2yem Kolok Nasyonal. So tem li “Lalit pu Langaz Kreol: Etadelye Apre 55 an Lindepandans”.
Premye Kolok LPT ti an 2001. Avan sa, nu ti osi fer enn Kongre lor Kreol an 1977 dan Plaza Rose-Hill, e enn 2yem Kongre lor Kreol an 1982 dan lasal Minisipal Louis Leschelles. E an 2009, nu ti fer nu Hearing Internasyonal lor Ditor ki Fer Zanfan kan Siprim Langaz Maternel dan Lekol. Antretan, nu finn osi fer enn seri Peblik-Lekcher, depi 1981 ziska asterla, kot nu finn invit orater kuma: Vandana Shiva, José Bove, Ram Seegobin, Trevor Ngwane, Patricia McFadden, Lee Haring, Enric Balaguer, Carol Benson, Christian de Brie, Tove Skutnabb-Kangas, Beban Sammy Chumbow and Robert Philippson, as well as the late Serge Sinamale, Neville Alexander, Anna Dartington and Derek Bickerton. Pri Nobel an Simi, Roald Hoffmann, finn osi lir so poezi dan enn evennman LPT dan nu Horl GRNW, e nu finn akey lansman Mize Dodo par Emmanuel Richon.
Dan kad sa long listwar refleksyon lor langaz ek lor lavi lamas dimunn, zordi nu dan LPT pe prepar nu 2yem Kolok lor Kreol. Kolok pu fer dan kad Zurne Mondyal Langaz Kreol 2023. Alor, nu pe dimann tu dimunn ki interese vinn prezant enn papye pandan 15 minit parla, ubyen avoy papye la si u pa pu dan pei, si u ti kapav avoy nu enn paragraf lor seki zot pe prepare, ki parfwa apel enn “abstrak”. Dernye dat pu avoy u “abstrak” le 30 Avril 2023. Kumsa, nu kapav inform u kan u travay finn retenir a-tan pu u prepar u papye konplet. Li kapav nerport ki size liye ar tem. Ant-ot, nu pe mazinn papye lor tem osi varye ki sa:
Kreol dan tu laspe ledikasyon:
Kimanyer finn servi Langaz Kreol dan kur alfabetizasyon, ubyin dan kur “Kimanyer Ekrir Kreol pu profesyonel”, uswa dan kur an Kreol pu Stenograf Lakur, e mem kur pu ekrivin an Kreol.
Rapor lor Kreol kuma medyom: BEC, Terre de Paix, LPT, Abaim.
Langaz Kreol dan Preskoler; analiz liv an Kreol pu zanfan; analiz viktwar dan Lakur Siprem Playgroup lor kestyon kerikilem san langaz maternel ladan.
Langaz Kreol dan Primer, swa segonder, swa liniversite.
Politik
Langaz Kreol dan Politik: oral ek ekrit, dan miting, reynion, lafis, petisyon, invitasyon, minits.
Kreol dan Parlman.
Literatir ek lar
Kreol, roman an Kreol, poezi an Kreol, text tablo an Kreol.
Text sante an Kreol.
Analiz Revi Literer ki ti analiz literatir an Kreol.
Listorik Mo Krwaze an Kreol
Depi 1981, sinon avan, ziska asterla.
Listorik Stennding Orderz an Kreol
Kreol ek Lalit Deklas
Sindika ek Langaz Kreol
Manyer ki patrona ek guvernman servi Kreol dan Lalit de klas.
Lalwa
Langaz Kreol dan lakur Distrik, swa Lakur Intermedyer, swa Siprem, swa Rodrig, swa Lasiz.
Tradiksyon lalwa an Kreol – etidye nerport ki text existan.
Lavi Lasosyasyon ek Langaz Kreol
Langaz Kreol dan Istasyon Lapolis
Langaz Kreol dan Lopital ek Dispanser
Langaz Kreol dan Instans Internasyonal – UNESCO, Linguapax, Ka Diego, Drwa Imin – Komite Ecosoc
Kreol dan Medya ek Reklam
Kreol dan Meteo
Kreol dan Laparey Deta
