Analiz lor bann Parti o-Puvwar par Lindsey Collen

03.03.2022

 Anu fer enn sirvol natir bann parti politik, kumanse ar seki opuvwar dan Moris aktyelman kumansman 2022, mem zur ki ena eleksyon rezyonal dan Rodrigues. Pu ena enn lot kamarad, Rada Kistnasamy, ki pu pran parti ki pa dan puvwar (seki dan Parlman e osi extra-parlmanter), e osi enn trwazyem kamarad, Kisna Kistnasamy, ki pu get LALIT antan ki parti politik. Alain Ah Vee ek Rajni Lallah pu get ki kote exakteman sak klas sosyal truv li aktyelman dan sa moman dan listwar.

Introdiksyon lor kifer nu pe rod konpran “parti politik”

Zordi, li vo lapenn rapel ki “parti politik” li form lorganizasyon ki permet klas oprime azir politikman, setadir amenn sanzman dan so faver. E li osi form lorganizasyon ki klas kapitalist servi pu anpes sa kalite sanzman la. Pur-lemoman, li MSM ek so bann alye ki pe anpes sanzman dan faver klas travayer. Me, dan lalit nu pa krwar nu bi se zis met deor, san organize pu amelyor sosyete. Dayer, ena tultan bann lafors pli pir ki deza la ki kapav organize pu “met li (seki opuvwar) deor”. Dan Lalibi zordi, sityasyon pli pir ki su diktater Khadafi. Dan Lezip al-Sisi pa pli bon ki Mubarak. Alor, nu bi bizin rod sutyin dan klas oprime pu enn sanzman ki baze lor enn program, setadir enn konpreansyon an-komin ki nu pe rode. Enn parti politik li form sosyal ki sa program-an-komin reprezante. E kan sa parti li reprezant enn program anfaver klas travayer, li bizin gide par enn lorganizasyon demokratik. Pli program la koeran e pli parti la demokratik, pli li ena posibilite amenn sanzman pu klas oprime ki mazoriter.  

Anfet, drwa fer politik dan enn parti politik, li enn-de diferans kle ant demokrasi ek otokrasi. Kan dan LALIT nu dir “fer politik”, li pa pe koz zis “politik elektoral”, me osi politik dan lezot sans ki nu, imin aktif dan enn tel lorganizasyon, mazine ansam – avek bi, dan loptik avansman klas oprime, pu sanz balans defors deklas anfaver klas travayer.

E sa papye la pe get MSM ek so alye atraver kad “ki zot parti” reprezante. 

MSM – An term nomb depite ek azan

Klerman Mouvement Socialiste Militant (MSM) li parti politik prinsipal dan Guvernman. 

Dayer li ena, MSM tusel, 36 syez depite lor 70, setadir enn “mazorite”, mem li enn mazorite minim. Anfet, MSM tusel, akoz Spiker ena enn kasting-vot, kapav mem perdi enn depite e ankor ena mazorite. Li pu lerla truv li, si zame li perdi enn, potansyelman dan mem sityasyon ki Parti Demokrat dan Sena dan USA. Me, MSM pa tusel dan Guvernman. Li dan enn lalyans. E so lalyans li paret ase stab pur-lemoman. Dan so lalyans guvernmantal, “Alliance Morisien”, lezot parti amenn so nomb syez ziska enn mazorite 44 lor 70, ki koste ar mazorite 2/3. 

Mo mansyonn sa parski, depi MSM ek so bann alye finn vinn opuvwar, pa zis finn ena bann gran, gran manifestasyon popilist ki finn desann lor lari, pu “met li deor”, e mem pu chalennj lezitimite eleksyon zeneral, me totalite lapres burzwa “kont” Guvernman dan enn fason ase sistematik, e zot kapav fer nu krwar MSM feb, kan li inportan pu rekonet ki li tuzur ase for dan Parlman. 

Depi eleksyon 2019, MSM finn, li vre, perdi enn depite (Nando Bodha) ki finn rant dan Lopozisyon, e sa afebli li inpe. E anmemtan, li finn gayn enn, Abbas Mamode, ki finn kit PMSD, zwenn MSM. Alor, li ex-eko. Me, MSM finn perdi trwa Minis dan sa de banane la. Li finn perdi Bodha, e osi so VPM Collendavelloo e osi kolistye Premye Minis Pravind Jugnauth, Yogina Sawmynaden. Sawmynaden kapav anfet KO, e so karyer lavenir politik menase akoz li finn anburbe dan enn seri skandal otur kontra ek tennder, e so repitasyon rwine par asasina misterye so ex-azan Kistnen. Collendavelloo, par kont, pankor finn truv okenn zafer grav kont li kote kontra CEB pu St. Louis; so syez ti dan balans akoz rikawnt par Jenny Adebayo, me Collendavelloo finn re-gayne dan rikawnt. E, drolman, demisyon Adebayo depi MMM paret finn afebli MMM buku. Anmemtan, sak enn-de mwa, MSM anons enn nuvo aderan, ki avan ti dan MMM ubyin lezot dan lopozisyon, ubyin parfwa, enn Rezyonal MMM an-blok demisyone dan enn muvans pro-MSM. Alor, anterm azan, MSM finn reysi ranforsi, lopozisyon afebli. Atma Bamma, par exanp, fek zwenn MSM. Nitin Jeeha fek demisyone dan MMM.

Eleksyon antisipe?

Me, Pravind Jugnauth, malgre tusa “konfor” kote “nimerik”, paret pe gard li “lor pye-deger” pu enn eleksyon zeneral antisipe a nerport ki moman. Li kapav dan so lavantaz fer enn eleksyon antisipe, swa akoz sa ka lakur kont so prop eleksyon dan No. 8 lor kestyon depans ilegal dan dernye kanpayn elektoral, swa akoz sityasyon ekonomik riske anpire, si li atann pli tar dan so manda avan li deklans eleksyon. An plis, Lopozisyon pa ti kapav an pli gran dezord ki li ete zordi.

Natir MSM

MSM so natir, antan ki parti, li liye ar manyer li ti pran nesans. Li enn parti ki ti ne dan puvwar. Seki ti arive se, kan MMM-PSM ti opuvwar zis 9 mwa, ariv Mars 1983, ena kasir dan MMM e lamwatye MMM deryer fe Aneerood Jugnauth al ansam ar PSM Harish Boodhoo, gard puvwar par enn amalgamasyon ki apel “MSM”. Me, MSM so natir determine pa selman par lefet ki li ti pran nesans dan puvwar. MSM ti anfet reysi alye enn bon lamwatye, sinon plis, klas travayer ki ti dan MMM, pu vinn ansam ar li dan kasir la, e li ti reysi fer sa atraver bann “mezir” anfaver klas travayer. Alepok sa ti vedir mezir kuma sibsid lor diri ek lafarinn. Kapav-et MSM responsab anfet pu lans sa nuvo lamod pu parti politik pa ena enn “program” kom tel, me pu plito prezant zis enn lalis mezir, kuma enn karne rasyon. E MSM finn gard sa 2 idantite la: kuma enn kreatir dan “puvwar”, e kuma enn parti ki ofer klas travayer, antan ki elekter, sertin mezir inportan dan enn fason kotidyin, me ki pena naryin pu fer ar ranforsisman klas travayer antan ki klas. MSM finn osi servi so kas ki reste apre eleksyon 1987, pu mont enn batiman Sun Trust, su kontrol fami Jugnauth, pu asir MSM enn surs perpetyel reveni. Anfet, perpetyel, tanki bann Jugnauth opuvwar. 

MSM – antan ki parti politik – ena so prop port-parol, diferan depi port-parol Guvernman ubyin kit Minister. Seki ansarz koz pu parti abityelman se Bobby Hureeram; kan ena enn problem ki kapav ena laspe kominal ar li, Joe Lejongard vinn lom-for kuma port-parol, e kan MSM bizin argimantasyon kanon kote politik lor MBC TV, lerla Maneesh Gobin stenn-bay.

ML

Muvman Liberater (ML) Ivan Collendavelloo, ki so parti so bi se pu “liber” militan MMM depi Bérenger, alor li viz gayn dimunn depi MMM pu ranforsi MSM. ML li enn kasir avan eleksyon 2014 depi MMM, e li enn chalennj sirtu a-kumanse dan sirkonskripsyon Stanley Rose-Hill kot Bérenger poze. ML ena 3 depite dan Parlman kote Guvernman, me li ti pli for ki sa trwa depite la akoz so lider Collendavelloo ti VPM, e osi Collendavelloo, kuma Maneesh Gobin, ki konn amenn argiman politik avek lozik ek lafors. Asterla Collendavelloo nepli VPM. Me, de-lot-kote, pa naryin konkre finn sorti kont li dan zafer St Louis. Anplis, li finn rekinke atraver gayn laviktwar dan enn rikawnt ki ti chalennj so syez-mem. 

PM ek MPM

Platform Militan ena Steve Obeegadoo, ki VPM asterla, me ki ena enn sel depite dan Lasanble Nasonal, enn lot demisyon inportan depi MMM. So nominasyon VPM det kree mekontantman parmi sertin dan MSM. Li donn Obeegadoo enn stati inportan, sirtu kan konbinn stati la ar so kapasite, li osi, pu reflesi, koze politikman. Me, li enn sel depite. 

E Mouvman Patriot Morisien ena 2 depite, Minis Ganoo ek PPS Diolle, ki zot osi, enn seynman depi MMM. Ganoo ti dofin Bérenger avan li kite, zwenn ansam ar Jugnauth. 

Suvan, ML, PM ek MPM azir inpe kuma enn blok informel ki, dan LALIT, nu apel “bann ex-MMM” – sirtu parski zot parti pa finn tro de-kole.

OPR 

Organisation du Peuple Rodriguais (OPR) ena 2 depite ki sutenir Guvernman. Pa kone si pu ena sanzman post-eleksyon-rezyonal – valer dizur, li pa paret.

Alor, ansam sa fer 44 depite dan kote Guvernman, lor 70. 

Ki Guvernman dirize par MSM finn fer dan so 27 mwa opuvwar?

Kote lekonomi finn ena enn tandans ver dezast, e enn direksyon byin, byin pro-gran-kapitalist:

- Guvernman MSM finn les pei la anburbe dan prodiksyon kann-ek-disik – mem kan sa pe amenn larwinn ekonomik divan nu lizye. Kann pe zis gurman fon piblik, e laplipar al ar patron tablisman ar gran planter, avek myet pu ti-planter. Nu, lepep antye atraver nu TVA, nu pe sibvansyonn bann misye la. Anfet, Maneesh Gobin, antan ki Minis Agrikiltir koz byin lor devlopman enn nuvo lindistri prodiksyon alimanter – tu so koze lor la top – me kan get komye kas li gayne depi Minis Finans pu sa, konpare ar seki kann ek disik gayne, li pa naryin ditu. Pena okenn siyn enn gran lindistri alimanter, e nu pe al dan 3yem lane depi nu gayn warning Kovid, e asterla, ena lager Larisi kont Ikrenn ek NATO ki pe anpir enn sityasyon deza pa bon, kote prodiksyon ek pri manze.

- Guvernman finn persiste, donn permi patron tablisman, dan zot 3-4 gro lanpir (Omnicane, Terra, CIEL, Medine ek ENL) bayant bon later agrikol pu vila de-lix, terin golf, ek “gated communities”. E li finn nuri enn “lindistri” espes ONG-sosyete-sivil finanse e kontrole par sa-mem kapital pu fer “travay sosyal” paternalizan anver lamas dimunn, ubyin par fwa ki “sible” (metafor militer) bann “pov”.

- Guvernman, atraver MIC, finn ariv vinn proprieter Smart City Omnicane, dan li tir Omnicane dan so landetman. Nu pa kone kimanyer sa pu evolye, me li pa ditu prometan.

- Guvernman MSM pa finn relans prodiksyon. Alor, li finn refiz servi Leta pu diriz kapital sa bann gro, gro “grup” la ver prodiksyon. E mem kan li dir li pe sutenir SME, par exanp, li pa diriz prodikter ver enn prodiksyon spesifik ki kapav ena lespwar uver enn nuvo sekter ki prodiktif, ki kree anplwa stab, e ki pu amenn deviz pu kuver inportasyon.

- Pri tu manze debaz finn monte, e pu kontinye monte asterla akoz lager ki Larisi inn deklare kont Ikrenn, e antretan pena enn nuvo lindistri alimanter, Moris pe fye lor inportasyon kan pri fret, karbiran ek manze tu pe monte fles.

- Somaz inn kontinye monte, e bann sif ofisyel maske sa, atraver definisyon farfeli ki MSM permet Statistics Mauritius servi pu “travay”.

- Lekonomi pa finn reysi re-dekole apre Kovid. 

Sityasyon ekonomik byin danzere – ena mank prodiksyon, ena sir-landetman bann konpayni e osi bann menaz, plis sibvansyon klas kapitalist pandan pandemi finn aplati bann rezerv. Ala kot MSM inn amenn nu.

Ki relasyon diferan Klas Sosyal ena ar MSM?

Burzwazi

Burzwazi istorik, ki normalman benefisye depi led invizib depi Leta (kuma enn seri para-etatik, par exanp), sann kut la, ar Kovid, sa sibsid la finn vinn vizib. Burzwazi istorik depandan net lor Guvernman. Guvernman MSM finn “kree” kapital, donn zot e pret zot. Sa vedir Guvernman finn, an retur, benefisye enn sutyin ase bizar depi burzwazi istorik limem. Donan-donan divan nu lizye.

Par kont, dan so manda 2014-19, MSM finn pran li kuma enn bi pu li detrip 2 nuvo lanpir-an-devenir kapitalist (“burzwazi deta” ki ti pe vinn imans) ki ti monte avek kudme rezim Parti Travayis avan eleksyon 2014. Lefe atak guvernman MSM kont sa 2 lanpir la finn kontiyne kuma enn fim. Premye ti ena Bhunjun ki ti dan biznes fonsye e ki finn aste enn navir pu transport karbiran pu pei, ki ti enn rulman imans e ki ti benefisye Moris dan sans Moris, kuma enn pei, ti ena so prop mwayin “nasyonal” pu transportasyon karbiran, mem li sekter prive. Guvernman MSM inn rezilye kontra la. Sa finn, asontur, fer lefe bumrang kont Leta, kan e larbitraz e Lakur finn donn Bhunjun rezon, e Guvernman fini par dwa Bhunjun enn fortinn depi larzan piblik. Lanpir Rawat, plito kote kapital finansye, finn osi detripe. Alor, sa montre klerman a ki pwin burzwazi deta depandan lor rezim opuvwar, lor parti opuvwar, pa zis lor “guvernman”. E kimanyer li byin difisil pu kit burzwazi “montan” rant dan ran burzwazi istorik, forme avek mindev esklav ek angaze.

MSM finn donn “faver” – anterm kontra, tennder, etc, sirtu lepok lokdawn – a-gos, a-drwat ar tu kalite konpayni ki zot azan politik met dibut. Sa ki apel “koripsyon”, e li koripsyon mem, me tu dimunn Moris kone ki li difisil pu klas burzwa agrandi so baz sosyal kan tna enn burzwazi istorik ase “etans” opuvwar, e zame sa burzwazi istorik pu fer kikseswa sinifikatif dan sa direksyon la. Alor, ena enn realite de-klas ki existe bel-e-byin, e kasyet anba seki Transparency International etc. apel “koripsyon”: li kan Leta, atraver parti o-puvwar MSM, fer enn atak kont enn klas monopoler (burzwazi istorik) pu sey koyn so monopol, atraver donn faver ti konpayni rule par so azan, an-esanz pu enn baz elektoral pu MSM. Etan done burzwazi istorik res byin “inpopiler” – sirtu akoz li ti, apre tu, angrese dan lepok esklavaz ek langazman atraver enn explwatasyon otan kriyel, e tanki ideolozi burzwazi limit konpreansyon lamas travayer a enn tel pwin ki zot pa truv, pur-lemoman, opsyon sosyalis kuma enn posibilite, zot espes “dakor” (elektoralman, omwin) pu Leta MSM atak burzwazi istorik par kree enn nuvo burzwazi montan ki nu dan LALIT donn apelasyon “burzwazi deta” – exakteman kuma lanpir Rawat ek Bhunjun, avan nu gayn sa bann ti-konpayni MSM pe sutenir. Nu kapav dir lamas dimunn dakor, mem avek retisans, avek sa kalite “favoritism” la, kan li paret permet dimunn dan lezot klas al chalennj gro kapital – ki li dan biznes lasirans ek labank, ki li dan biznes marinn marsand. Me, lerla kan puvwar sanz lame, MSM per (san tor) sa 2 lanpir nuvo la pu sutenir Travayis politikman avek zot imans kapital, e MSM atak zot. Lezot lexanp “burzwazi deta” – ena buku – se Leal, ki gayn komann depi Leta pu loto ek gro masinn ki li inporte, e Roland Maurel ki prodir lapintir, gayn komann ar para-etatik, Kalachand ki inportater motosiklet pu trafik monte a-lepok, e zot tu, zot osi, dan diferan moman, gayn enn kut-pus, pu zot chalennj sa monopol gran kapital dan burzwazi istorik. Si al fetyte sa gro revi “The Top 100 Companies in Mauritius”, lane apre lane, u pu konpran.    

Tusala pu dir ki burzwazi istorik, osi byin ki enn nuvo burzwazi deta emerzan, pa zis satisfe ar MSM, me depandan lor li. Alor, zot pa interese tro kritik MSM ek lezot parti o-puvwar lor kestyon “zesyon ekonomik”. Zot res chup-chap.

Tit-burzwazi

Par kont, ena gran gran seksyon tit-burzwazi ki anfet kont MSM, kont MSM net, e zot ena gran gran port-vwa dan radyo ek lapres. Zot seki lor radyo dimunn “la classe moyenne” ki pe sufer. E zot pe sufer mem, e kan zot sufer parfwa zot danzere. Zot prodir popilism. Zot lopozisyon li pa lor baz okenn program, etan done li enn klas ki pa futi fer enn program, ubyin mwins ankor kit “projet de société”. Alor, sa explik sulevman kot 100,000 dimunn su lidership ti-burzwa swiv enn Bruneau Laurette san kone kot li pe ale ni kot zot-mem zot pe ale; e nu gayn enn band avoka, wi lom-delwa, pe fer miting pu “BLD”, zot osi san okenn veritab program; e nu mem truv sa fenomenn kot Lopozisyon Parlmanter antye swiv kuma muton deryer sa kalite lidership bizar la.

Klas travayer

An zeneral, klas travayer finn kile depi sa bann muvman popilist anti-MSM la. E anmemtan, ena sindika ki ziz parti politik par sa sistem komye “mezir anfaver klas travayer” MSM finn amene. Lerla zot anonse ki klas travayer finn reysi a “95% so bann revandikasyon” – mo pe sit enn sindikalist CTSP, pli bon federasyon sindikal aktyel. E anfet MSM finn ogmant pansyon iniversel, amenn meyer kondisyon travay dan plizir duzenn sekter, asir WAS ek Innkom-seport pandan Kovid. Kan konsyans deklas feb, travayer ena tandans ziz lor enn lalis revandikasyon kumsa.

Alor, zis LALIT ki finn kritik MSM lor baz MMM so program ekonomik. Zis LALIT ki finn chalennj li par enn seri petisyon pandan lepok lokdawn, kot finn kritik MSM so sutyin pu kann-ek-disik, pu so sutyin pu “real estate” gembling, e kot finn prezant enn program pu lekonomi. LALIT finn reysi konvink lidership plizir sekter sindika pu apiy sa bann demand la, me san vreman popilariz zot dan zot prop baz. 

Lasante

Sekter lasante finn byin inportan akoz nu finn travers enn pandemi, ki tuzur ar nu, depi dernye eleksyon kan MSM pran puvwar. E guvernman finn debruye (ziska ler) relativman byin kote pandemi, mezir prevansyon, inklir vaksin, e mem tretman dan lopital gratis iniversel. Me, telman ena sa koripsyon, e favoritism kote kontra (kan MSM nuri so rop “burzwazi deta nesan”), otur kontra dirzans pandan lokdawn, ki MSM finn vinn enn menas, mem enn danze pu lasante. Kimanyer kapav inn pas komann pu venntileyter ki pa futi servi? Atraver sa koripsyon la. Kimanyer inn pas komann pu mem konprime Rs 8 ek Rs 80 dan mem 48 ertan? Atraver sa koripsyon la. Mem lor kestyon kanpayn pu interdir “monopol” lor prodiksyon vaksin o-bon-milye enn pandemi, la osi, MSM finn plito tyed. 

Lor zafer kimanyer MSM finn henndel Kovid, sel parti ki finn evalye sa dan enn fason rasyonel, e kritike kot bizin kritike, ankor enn fwa se LALIT. Tit-burzwazi tulezur ti pe sot-sote depi enn priz pozisyon irasyonel ziska lot purvi li al dan direksyon “BLD”.

Represyon

MSM li tultan rabat lor represyon. Alor, kan ena enn kriz saniter kuma Kovid, li introdir enn seri mezir represif. LALIT finn expoz so amandman pli danzere: li finn dekret lagrev ilegal dan lepor, ayropor e bann lopital – pa zis pu pandan lepidemi, me pu apre.  Lerla, MSM finn servi pretex abi ki dimunn fer onn-layn pu introdir plis represyon dan ICT Act, kuma li finn servi Top FM so kanpayn kont li, ki MSM ti anfet oredi reponn politikman, pu li introdir amandman dan IBA ki pu riske enn danze pu liberte dexpresyon tu radyo prive.

LALIT so program li tuzur rod plis liberte pu lamas dimunn kan ena enn problem, plito ki represyon.

Chagos

MSM so pli gran viktwar pe vinn so pli gran krim. Li finn finalman al dan instans internasyonal, kuma LALIT finn reyelman kontinyelman fors tu guvernman fer, e finn gayn viktwar ICJ ek Lasanble Zeneral Nasyon Zini osi byin ki dan enn seri lezot institisyon internasyonal inportan. Me... Me, Jugnauth pe rod “re-vann” Diego, ar USA direk asterla. Nu bizin kontiyne denons li, anpes li. Kuma zis LALIT pe fer, antan ki parti politik.

Lanvironnman

Apre Wakashio, MSM pa finn azir ase vit pu amelyor reaksyon leta Moris a sa kalite nofraz la. Alor, la, ena 3 bato Taiwane fek tase lor brizan, 2 ankor la. Mem si li swit-a enn siklonn ki finn lev lamer, fer li demonte, fode ena lemwayin netway sit nofraz dan enn fason sekyur.  

Tu dimunn kone ki, akote danze lager nikleer ki menas limanite avek extinksyon, ena osi danze polisyon ki menas debalansman klima ki kapav, ansam ar destriksyon abita ek polisyon simik, provok extinksyon spishiz an kaskad. 

Dan Repiblik Moris, pli gran surs polisyon – par so emisyon karbonn, so destriksyon koray, so bann benker anba lagon, e par so stokaz ek servising sumarin nikleer – se Diego Garcia. Diego Garcia pli gran problem polisyon dan Repiblik Moris zordi. 

Alor, kan MSM pe rod enn lamone lokasyon ar Amerikin pu Diego lor baz enn bay 100 an (wi, 100 banane!), li, MSM, pe kontribiye dan polye bul later, osi byin ki nuri risk lager nikleer. Alor, anplis ki Pravind Jugnauth met so joging, al fer “zurne netwayaz” dan vilaz dan so sirkonskripsyon No. 8, ki sa osi li bon li fer li, li bizin deswit fer travay pli inportan: rul so lamans, retir sa lof pu lwe Diego Garcia ar USA, e met enn taymtebl pu fermtir baz, inklir so netwayaz ekolozik. Fode pa Guvernman Moris – asterla enn guvernman “indepandan”, nepli enn koloni – vann Moris. Dernye fwa li ti ranversib akoz li ti ilegal pu Gran Bretayn fors so guvernman sibaltern siyne, kan Monarsi Britanik ti tuzur sef-deta Moris. Sann fwa la, Jugnauth bizin byin fer atansyon. So leritaz politik ki li kite riske vinn lefet ki li finn “vann Diego Garcia”. E sa, kuma tu dimunn kone, li pu enn krim. 

Inn ler pu tu anvironnmantalist dan Moris adres sa problem la. Fermtir baz, li neseser pu sa 2 rezon la: aret kontribiye ar lager, aret kontribiye pu lindistri armaman polye ler, lamer ek bul later.

Konklizyon

Kan byin gete, Guvernman Moris ti kapav byin destabilize par tu sa tem ki finn sakuy li, sirtu fas-a tu kalite sote-pile dan tit burzwazi, me li finn benefisye depi:

- Enn lopozisyon Parlmanter feb, san program de-fon, divize e grogi apre defet an 2014 ek 2019,

- Enn klas travayer feb akoz pena prodiksyon, finn ena delokalizasyon, santralizayon mulin, mekanizason kann, fermtir lizinn, e ranplasman par zuti elektronik.

- Enn klas burzwa ki depandan lor Guvernman MSM.

- Enn tit-burzwazi ase bizar ki rod opoz Guvernman par enn “performans” enn bann “sho” popilist telman absird ki li ti kapav fer riye, si li pa ti osi anmemtan konport danze pu sosyete an antye. 

[Baze lor enn kozri pli kurt ki Lindsey Collen ti fer dan Seminar LALIT Dimans dernye, le 27 Fevriye, ki ti fer par Zoom].