LALIT pran pozisyon kont Invazyon Ikrenn par Larisi
28.02.2022
LALIT fer apel pu enn sese-lefe imedya, ek pu larme Ris kit Ikrenn. Nu dibut ansam avek lamas travayer dan Ikrenn kont sa invazyon la. Nu fer apel pu aret sa lager la. Larisi pena okenn drwa pu invahir Ikrenn, enn leta suvrin. Anfet, dapre lalwa internasyonal li ilegal pu Larisi invahir ek/uswa okip Ikrenn. Alor, Larisi bizin negosye ver enn sese lefe ek retir so larme depi andan Ikrenn. Bann anze sa lager la byin ot. Larisi posed 6,000 zarm nikleer, pli gran arsenal nikleer dan lemond, tandi ki Lamerik ena 5,600 zarm nikleer. Lamerik konble sa diferans atraver azut zarm nikleer so bann alye (kuma Lafrans, UK, Israel pu kumanse) ek li sel pei dan lemond ki finn deza perpetre enn atak par larg enn bonb nikleer. Lamerik finn frwadman larg enn bomb nikleer lor sa zoli lavil, Hiroshima, eliminn laplipar so popilasyon sivil dan enn sel atak mortel. Ek lerla larg enn dezyem bomb, komsidire kuma enn bonis, lor enn lot zoli lavil, Nagasaki, kot laba usi finn tuy laplipar popilasyon. Alor, kan nu pe pran pozisyon, nu pe anmemtan warn kont danze ki sa kalite militarizasyon kontinyel LOTAN poze pu lemond antye. E nu fer apel pu LOTAN met aryer, ek aret maske so agresyon kont lemond deryer sa fasad “liberte pu zwenn” enn band trafikan zarm ek marsan lager.
Sa lager la li pli efreyan ki tu lezot lager ilegal dan bann dernye lane. Li vo lapenn get tradisyon otur bann lager atros – pran depi lafin Lager Frwad vini mem – kot LOTAN uswa Lamerik finn kareman bafwe lalwa internasyonal, ek kareman invahir ek morsel bann pei, parey kuma Larisi pe fer asterla. Alor pu nu dan LALIT, li enn pozisyon lor prinsip pu opoz invazyon Ris akoz nu ti usi opoz bann invazyon LOTAN. Ek nu usi opoz lokipasyon militer Repiblik Moris par UK-USA.
Lamerik ek LOTAN, nu pu rapel, ti kareman bonbard Belgrad depi lao dan lesyel, kas Yugoslavia an but-but – anfet fragmant pei la net, exakteman kuma Prezidan Larisi Vladimir Putin pe fer asterla dan Ikrenn. Zot ti finn sispann “lalwa internasyonal” alepok ziska ki zot ena pu opoz Larisi. Gete kimanyer asterla Putin pe kopye exakteman manyel LOTAN lor kimanyer fer sa, kan li pe zistifye sa invazyon Ikrenn. Yugoslavi, li usi li ti enn pei suvrin. Lamerik finn invant enn oximoronn, “lager imaniter” pu met enn vwal lor so bonbardman aeryin ilegal, ek pa mem pran lapenn pu zistifye fragmantasyon sa leta suvrin la. Lamerik ek Gran Bretayn ti bonbard Bagdad depi avyon byin lao dan lesyel – eski Larisi so latak grav lor Kyev pa pe imit sa shock-and-awe [sok-ek-terer] sa lanwit terib lor Bagdad? Enn-de ex-militer Amerikin “invite lor plato TV” rapel sa, zot pa onte pu fyer sa memwar orib la.
Dan Lirak US-UK ti kareman bonbarde, rantre, asasinn so sef-deta, ranvers so Guvernman ek selebre so aksyon kumsidire lalwa internasyonal nek lapusyer sorti lalinn. Sa invazyon ek lokipasyon mortel ki swiv finn antrenn lamor, direk ek indirek, plis ki enn milyon popilasyon Lirak. Lamerik ek Lafrans finn rant dan Lalibi ek laba usi finn bonbarde depi avyon lao ek finn asasinn sef-deta, ek finn ranvers Guvernman. Zot pa pran okenn traka mem si pei la ankor an rwinn. Lalwa Internasyonal ti sispann.
Lamerik ek LOTAN finn zis rantre ek bonbard Afganistann pu return li dan lepok pre-istorik, lepok lom-de-kavern, pu sit zot prop portparol, ek okip li pu 20 banane, tusala pu detrir enn pei, kit li an rwinn. Tusala ti an flagran vyolasyon lalwa internasyonal. B-52 Lamerik ti dekole depi teritwar Moris ki zot pe okipe ilegalman – Diego Garcia, enn parti Arsipel Chagos – pu al bonbard Bagdad ek Afganistann.
Byin sir, bann pro-USA ek pro-LOTAN ki pe deblatere lor TV ek dan media meynstrim, pa koz lor sa bann stratezi, mem kan Putin pe imit zot parey. Li pe bufonn zot par swiv alatet zot stratezi pu vyol lalwa internasyonal lor lager ek lokipasyon.
Alor, finn ariv ler pu LOTAN-su-kontrol-Lamerik disbann so expansyon militer agresif, enn-fwa-pu-tu. Sa li, byin sir, difisil pu sistem kapitalist asterla akoz li depann, lor furni lager an permanans, sirtu Lamerik, enn fwa LOTAN-su-kontrol-Lamerik so “konplex militaro-indistriyel” vinn depandan lor lager. Kan LOTAN ti retir li depi Afganistann lane pase, sa finn enn sel ku met enn frin a seki regleman lekonomi kapitalist Loksidan: prodiksyon armaman ek depans militer. Lamerik so “konplex militaro-indistriyel” tutswit pe aswafe pu enn lager sanglan, pu gard bann kontra, pu uver lavann pu nuvo kontra, pu plas nuvo komann pu lasye ek lezot metal , pu avyon, elikopter, tink, fizi mitrayez, kanon, bonb ek pyes resanz pu sakenn dant zot, pran depi so labuzi-fizib par duzenn, vis, bulon par milyon, pyes elektronik lor pano abor divan sofer, pu lesans ek dilwil ek batri pu rul tusala, osibyin ki hamberger ek bot militer, kokakola ek iniform ki bizin prodwir pu kontinye lager, ek pu ankor ek ankor relans lekonomi Lamerik an deklin. Bref, LOTAN ti dimann enn nuvo lager, e li finn gayn li.
Sa expansyon konstan LOTAN finn kontinye, lontan apre disolisyon Pak Varsovi an 1991. Pak Varsovi ki ti met dibut pu kontre expansyon LOTAN, finn disud, swadizan pu met fin a lager frwad, kan USSR, Linyon Sovyetik kase. Par kont, olye disud LOTAN, Lamerik ek Lerop finn expann li.
Alor, kan Ikrenn pe sibir enn atak li enn rezilta previzib sa expansyon agresif LOTAN. Ek ena enn lager propagann pro-LOTAN ki bann organn lapres kuma CNN ek BBC tulezur pe bonbard nu. Parey kuma Ikrenn, avek rezon, pa aksepte ki ena larme Larisi mase lor so frontyer, parey Larisi finn santi pe gradyelman “anprizone” ek “asfixye” par enn LOTAN-kontrole-par-Lamerik. Tandi ki Larisi li restan enn imans lanpir, Lamerik li enn lanpir an deklin, so lekonomi pe vasiye su pwa 700 baz militer andeor so teritwar, ek ankor enn lot 700 baz lor so teritwar. Sa mem si lepep Amerikin pena materniti liv uswa ledikasyon pre-skoler gratis. Sa mem si lepep Amerikin pena veritab sistem lasante gratis. Sa mem si lepep Amerikin asterla ena diferan lekol pu zanfan diferan klas sosyal, ki asterla pe konsolide kuma preske enn sistem karst. Sa amezir inegalite pe aksantye.
Akoz sa militarism agrandisan LOTAN, bann pei osi diferan ki Lasinn ek Lenn finn abstenir dan vot kont Larisi dan Konsey Sekirite Nasyon Zini, rezolisyon ki Larisi finn met so veto. Ansam sa de pei la fer enn tyer popilasyon mondyal. Guvernman lezot pei, tel ki Moris, finn adopte enn pozisyon netralite. UAE usi finn abstenir lor vot Konsey Sekirite. Sid Afrik inn fer apel pu Larisi retir li, anmemtan ki fer apel pu tulede kote fer “konpromi”.
Kan LALIT denons invazyon Larisi dan Ikrenn, nu fyer ki nu finn ena mem pozisyon ek mintenir nu mem pozisyon, kont tu lezot invazyon ek lokipasyon, kont expansyon LOTAN usi parey. Alor li enn stennd lor prinsip kont tu lager agresyon ek tu lokipasyon militer.
Nu sezi sa lokazyon la pu apel UK-USA pu retir li depi sa parti teritwar Moris ki zot pe okipe ilegalman, kuma ICJ, pli ot Lakur Nasyon Zini finn konfirme. Samem kifer nu dimann Israel pu retir li depi Palestinn ek Lasiri. Kumsa, diskors UK-USA pa sonn ridikil ek ipokrit.
LALIT, 26 Fevriye, 2022
Tradiksyon an Kreol depi versyon orizinal an Angle finn pibliye lor websayt LALIT le 26 Fevriye 2022. Link: https://www.lalitmauritius.org/en/newsarticle/3029/lalit-takes-position-against-russian-invasion-of-ukraine/
