Ram Seegobin lor Dernye 15-enn dan Politik Moris
24.01.2022
Premye seksyon so diskur pu “tur dorizon politik” pu dernye 15-enn, Ram Seegobin finn konsantre lor seki alabaz politik: lekonomi. Lerla li get pozisyon diferan klas sosyal, enn par enn. Apre sa, li vinn lor politik Moris e Rodrig. Ena enn seksyon lor pandemi. Lerla li adres sityasyon internasyonal.
Lekonomi
Apre premye lokdawn, buku ekonomist burzwa, mem sertin gran patron, plis enn-de Minis MSM, ti kumans koz lor lirzans pu ogmant prodiksyon lokal manze de-baz, e lor nesesite pu asir sekirite alimanter onivo nasyonal, Ram Seegobin ti dir dan so “tur dorizon politik” dan komite santral LALIT Dimans lor Zoom. Suvrennte alimanter baze lor prodiksyon lor enn ase gran lesel, ti vinn enn nesesite “evidan” pu tu dimunn ki reflesi enn tigit, dan sa moman, kan pandemi ti fek deklare, ki ena gran danze dan sa stratezi existan sistem kapitalist e avek enn guvernman otan pro-kapitalist dan Moris.
Me, apre sa, laplipar sa bann mem ekonomist la, sa enn-de patron la ek sa enn-de Minis MSM la, finn bliye sa net. Kan zot tu pe kumans krwar –a-tor ubyin a-rezon – ki kriz pandemi pe kalme, zot tu finn return dan zot ansyin maynd-set kot zot truv zot bi prinsipal: kontiyn rod zot “krwasans ekonomik” ki baze lor asir “profi” prive pu gran misye la. E zot pans sa, mem si zot pe servi kapital ki sorti dan fon piblik!
Zordi selman [Dimans 23 Zanvye] ekonomist Eric Ng, dan lagazet Week-End, an-repons ar enn kestyon zurnalis, finn re-sulev sa kestyon prodiksyon alimanter la. Li finn re-met lanfaz lor diversifikasyon agrikol, lor prodiksyon alimanter. Alor, li finn kontiyn gard sa kuma enn tem prinsipal lor azanda. Li tuzur inportan. Me, remarke okenn sa bann parti politik dan Guvernman ni dan Lopozisyon pa pe koz prodiksyon alimanter pu kreasyon anplwa (dan karo, lor lamer ek dan lizinn prezervasyon), pu suvrennte alimanter, pu deviz.
Dezyem, ena buku deba asterla lor depresyasyon Rupi, ki rapid e intansyonel. Sa enn gran parti responsab pu sa inflasyon galupant ki ena. Pri pe grinpe dan enn fason terib dan labutik ek supermarket, kuma tu kamarad kone.
Trwazyem, Moris so “ofshor” ki bann la apel “global biznes” aster, pe sorti “lalis nwar” Linyon Eropyin. Pa ti ena ase mezir pu limit blansiman larzan ek lezot pratik mafya ek “terorist”, dapre Lerop. Me, asterla Guvernman finn re-ser enn-de pratik, e Moris finn sorti lor sa “lalis nwar” la. Me, rantre lalis nwar, sorti lalis nwar, pena okenn analiz dan pei lor natir sa sekter modi la. Li enn sekter ki bizin ferme – akoz li enn eskrokri kont lamas dimunn dan lemond, setadir enn metod dimunn siper-ris pu pa pey tax, e tax, kuma nu kone, li sa tigit ki zot kontribiye dan sosyete an-esanz pu tu sa explwatasyn ek tu sa dominasyon ek destriksyon ki zot, antan ki klas, seme.
Katriyem ena “infrastriktir”. Travo lor Metro leze pe al ase vit. Byinto li pu ariv Curepipe. Guvernman fini kumans koz nuvo tronson Rose-Hill-Reduit, nuvo tronson ver Lenor, mem ver Lwes ek Lesid. Tu sa proze la klerman depann lor finansman depi Lind. E li paret enn proze ki Guvernman fini gayn lasirans depi Lind ki finansman li bel-e-byin posib, e li paret pu al delavan. Tuzur, Guvernman pankor konstrir so trotwar pu pyeton ni so “bicycle lanes”, ni mem ase parking pu “park and ride” (kuma ena Monte-S). E li sa kalite amenazman la ki rann proze la interesan.
Anmemtan, konsiltasyon fek fini ar Labank Mondayl. Paret ena buku lanfaz ki guvernman pe mete lor proze Cote d’Or. Sa, li enn nuvo proze lor kreasyon enn espes sekter bio-teknolozi – enn lindistri farmasetik baze lor zafer Inpe teknolozik-teknolozik. E kot pe fer li? Dan sirkonskripsyon, par kwinsidans, Nimero 8, kot syez Premye Minis.
Burzwazi Istorik
Burzwazi istorik, Eric Ng konfirm sa dan so intervyu, dan so lansanb, li ase satisfe ek tretman depi Guvernman. Burzwazi istorik pa ule fer deklarasyon brit-brit, pangar sa pu zenn zot-mem vizavi Guvernman. Dan lindistri sikriyer, patron la, li satisfe avek ogmantasyon pri bagas. Sa, li reflet inpe seki pe ariv sa lindisri la: lontan patron la ti get pri disik -- monte swa bese. Asterla disik pa tro interes zot, me pri bagas, wi. Li finn devinn enn “lindistri bagas”. [Truv tu dimunn lor Zoom, pe riye, surir, malgre zot lor myut.]
Lindistri Turis sipoze inn repran. Me, li enn repran ki ase lant. Kifer? Parski, kuma tultan LALIT inn dir, li pa zis ase pu uver frontyer isi Moris. Fode dimunn anfet vini. Kot tu nu surs turist, setadir UK, Lafrans, Lalmayn, Sid Afrik, mem Lareynion, Omikronn finn donn bal, e dan buku plas ankor pe donn bal. Ena sif rikord pu Kovid – pu infeksyon, e pu ka dan lopital. Alor ena pei pe met lokdawn, ena pe tir lokdawn, ena pe re-met lokdawn, ena pe uver frontyer, ena pe re-ferm frontyer. E sak pei pe bizin sanz so regleman sak ler. Alor, dimunn bizin pran kuraz avan zot re-vinn “turis” ankor. Finn kumans ena enpe koze lor ki pu arive si repriz la ankor lant, e si lotel nepli gayn “wej-asistenns” depi Guvernman. Ki pu arive pu anplwa?
Burzwazi Deta
Kote Burzwazi Deta, asterla. Seki nu finn truve dan dernye 2 an, se kimanyer Burzwazi Deta so laspe ki frol ilegalite – sa prosesis formasyon enn burzwazi deta atraver servi puvwar deta pu “ed” enn nuvo gran-burzwazi emerze, li tultan frol ilegalite – an e 2020 e 2021, sirtu otur emerjennsi-prokyurmennt, pa zis li finn frol ilegalite, me li finn kareman tom dan ilegalite. Ka “Pack and Blister” 2020, e ka Molnupiravir an 2021 demontre sa. Lanket ICAC pur-lemoman, pe pwint dan direksyon o-fonksyoner. Minis zwe malin, tir zot kanet dan zwe. Zot les enpe o-fonksyoner sarye fardo.
Burzwazi Deta, ena proze Saraco, foto-voltaik ki ti konstrir par fami ansyin Spiker Seetaram lor flan Montayn dan Bambous, proze la net finn al dan administrasyon zidisyer. Sa vedir li an difikilte finansye.
Li osi inportan pu swiv konfli burzwazi deta ek burzwazi istorik dan enn lot plas, ki inpe bizar: dan Lekurs Suval. Dan LALIT, nu pa tro swiv sa bann gran lager otur Lekurs Ipik, me purtan li inportan. Dan li-mem ena gro-gro konpayni dan Top 100 Konpayni inplike, e anplis li enn plas kot ena buku blansiman larzan, e kot burzwazi istorik abitye fer tu kalite bal. Politikman, li finn tultan byin inportan. Dan lepase ti ena gran lager lepok kan Minis Finans Bheenick ti ule met enn lot ipodrom Pailles, e burzwazi istorik finn firye e finn reysi sabot li. Li ti enn proze Roland Maurel, ki burzwazi istorik tultan rod sabote. Dan Finance Act 2021 kan ti kree enn Horse Racing Division dan Gambling Regulatory Board, Jean-Michel Giraud, Prezidan MTC, finn akiz Jugnauth pe rod “nasyonaliz lekurs”. Ena koze ki ena enn proze Michel Lee Shim pu kree sa nuvo ipodrom. E, ankor enn fwa, nu truv Roshi Badhain, sann kut la, dan so ka dibwa tek, pe inplik Michel Lee Shim urdi enn konplo politik ansam ar lapolis kont li, Badhain. Me, Roshi Badhain, kant-a li, pros ar Paul Foo Kune, ki enn lot patron dan sa sekter la e ki gran lennmi Lee Shim.
MTC finn ena de lezot proze pu enn dezyem Ipodrom. An 2004, ti ena lide pu fer enn Bagatelle lor 100 arpan later, e 2014 ek 2017 ti ena plan Medine ek Tote, pu fer enn Pierrefonds. Bann Terra ti anvi fer enn Pamplemousses. Tusala pu dir, ena buku “vested innterest” pe lager otur Lekurs – e li ena lefe lor politik. Suvan li pran form, kontan-pa-kontan, enn lager “burzwazi deta” kont “burzwazi istorik”.
Klas Travayer ek Sindika
Nu finn truv enn ti ogmantason dan mobilizasyon. UBIW pe fer demand pu enn nuvo “kolektiv- agrimennt” pu reget kondisyon travay pu travayer transpor.
CTSP pe fer bon travay kote travayer lezot pei. Sirtu tu dernyeman, finn ena enn lagrev travayer Tian Li dan konstriksyon. Zot pa finn gayn konpansasyon lor plizir lane. Zot finn rant an grev, CTSP inn negosye, e zot tu pe gayn Rs3,000 a 4,000 ogmantayson. Enn sikse pu CTSP.
CTSP enn-de bann federasyon ar lekel nu travay, e li byin bon ki zordi zot pe azir lor prinsip ki travayer lezot pei kuma travayer ki form parti dan klas travayer. Sa li sirtu inportan dan enn moman kot dan tit-burzwazi finn ena buku zenofobi, sirtu kont “Bangladeshi”. Sa El Figaro ki ekrir dan L’Express pa rat enn lokazyon pu blam travayer Bangladeshi pu lefet ki MMM ek Travayis ek PMSD finn perdi eleksyon zeneral. CTSP pe osi amenn kanpayn inportan lor “KOVID-liv” pu tu travayer, inklir travayer depi lezot pei. Kuma li ete asterla, dan sekter prive ek piblik, kan travayer teste pozitif, kan li oblize self-isoleyt, parfwa so sik-liv inn fini, alor li pa gayn lapey. Alor, demand la, li inportan. Li pu enn espes sik-liv spesyal pu lepidemi Kovid.
Sa mwa la, e sa osi inportan, Portable Retirement Gratuity Fund pe vinn an aksyon. Depi lontan CTSP finn mobilize pu sa. Asterla patron pu bizin kumans kontribiye. Fon la li al ver enn “severenns-alowenns” ubyin gratuiti kan pran retret. Li al ver sa lemp-sem ki dimunn gayne. Seki inportan ladan se asterla li asire ki travayer gayn enn larzan ki baze lor tu lane ki li finn travay. Li nepli baze lor zis so tan-servis ar so dernye patron.
Finn ena osi bann ase gran manifestasyon lor kestyon dilo – Bambous Verieux – kot finn ena arestasyon ek posib purswit.
Kote politik
Seki finn dominn deba sa 15-enn la, li bann ka lakur ki lopozisyn finn mete pu konteste eleksyon zeneral. Sirtu finn ena zizman dan ka re-kawnt dan No 19, setadir Stanley-Rose-Hill. Finalman seki resorti se ESC ek Komiser Elektoral finn aksepte ki ena iregilarite, kan get sif pu rekonsilyasyon. Kan get komye biltin dan sak lasam, e komye total votan, dan omwin 3 kawnting room, kot sak lasal ti sipoze gayn 1,200 biltin, finn anfet gayn plis. Eski finn konte ar presizyon ubyin non, kan partaz li par lasal klas? Anfet, bi sa kontaz la, se zis partaze an diferan sal-deklas pu kontaz al pli vit. Me, kan 1,200 biltin al dan sak klas, dan sak biltin ena 3 vot, alor pu sak kawnting-rum, matematikman bizin:
i) Sif divizib par 3.
ii) 3,600 vot, ubyin mwins.
Dan 3 kawnting rum, finn anfet gayn buku plis ki 3,600 – “buku”, kan konpar li ar diferans ant Jenny Adebiro so skor ek pu Collendavellooo. Swa finn donn sa bann lasal klas buku plis par erer, kan kont zot pu met dan pil 100-100 e partaze brit-brit, ubyin ena kit problem. Klerman Komiser Elektoral, e mem Collendavelloo inn dir “OK, ena enn problem, retir obzeksyon, al delavan, fer rikawnt.” Alor, Lakur inn deside, wi, pu al delavan avek Rikawnt. Lakur Siprem ki pu fer li – dan Lakur mem. Alor, nu bizin atann gete ki so rezilta. Kestyon ki pe poze, eski ena sa mem kalite discrepennsi partu? E mem, eski tultan ena? Eski li enn problem sistemik?
Remarke ki sa pa ti dan petisyon MMM Jenny Adebiro. Seki finn arive se pandan ki Ka la pe derule, Komiser Elektoral finn al sumet sa bann “rekonsilyasyon” la, e finn dekuver sa problem la. Eski ena mem problem lezot sirkionskripsyon? Lerla li pu enn problem politik ki pli grav ki zis konestasyon pu enn sinp rikawnt ti pu reprezante.
Zizman la dir bizin ena plis vizilans depi Komiser ek ESC, osi byin ki depi bann kandida ek zot azan. Dan LALIT, nu bizin fer enn sesyon lor ki demand spesifik ki pu diminye sa kalite problem la afekte kredibilite eleksyon dan lavenir. Nu dan enn lepok kot ena tu kalite lafors – inpe partu dan lemond – ki pe atak eleksyon – pa tultan pu fer li pli demokratik, me osi suvan pu fer li mwin demokratik. Bizin buku refleksyon lor demand ki al dan bon direksyon.
Alor, antuka, pe al ver enn rikawnt. Li bon. Sa li dan No 19. Lezot ka pu kontinye fer zot sime dan Lakur. Rapel ena buku ki Lakur finn rezete – an-parti ubyin an-totalite – e ena osi enn seri ki kontestater, li-mem, finn abondone, retire.
Politik tuzur, L’Entente L’Opposition (MMM-PMSD-Bhadain ek Bodha) dan dernye 2 semenn raprosman ar Parti Travayis. Avan sa Travayis ti’nn elwayne, me li finn aksepte pu rediskite ansam. Alor Paul Bérenger ek Navin Ramgoolam pu zwenn sa semenn la. Remarke ki seki zot pe diskite buku, li tuzur kestyon kisannla pu postile kuma Premye Minis, kisannla pu Lider Lopozisyon aktyel, etc. Tuzur lanfaz lor ki pos pu kisannla, kimanyer partaz puvwar antre-zot, si zot gayn eleksyon. Kote l’Entente Lopozisyon, ena long interview Nando Bodha dan L’Express zordi [Dimans]. Sa li enn tayming L’Express. Kan zot truve ki Bérenger pe koste ar Ramgoolam, L’Express, normal, pu fer sa travay la, ponp Bodha enn ku kuma enn “stepne” – donn li sa long intervyu dan sa moman la, dan lekel li pena gran-soz pu dir – pu ranforsi lame MMM vizavi Travayis. (Sa-mem kalite badinaz ki ti amenn zot trazedi an 2014, kan 40% elektora (MMM) plis 40% elektora (PT) ti azut ansam pu gayn mwins ki MSM-ML.) Badhain tuzur ena so problem dibwa tek. ICAC pe fer lanket, pa kone kot sa pu ale.
Dan Rodrig, yer ti Nomineyshenn-De. Finalman, apre buku traktasyon, eleksyon rezyonal pe al ver enn eleksyon a-trwa. Pu ena OPR (san Serge Clair ki pe vinn enn “menntor”) v/s MR Von Mally v/s enn laranzman elektoral ant de diferan “lalyans”, setadir UPR-MMR-MIR plis FPR-PMSD Rodrig. Sa dernye la, li enn blok 5 parti, sakenn dan diferan rezyon. Pandan enn moman, Francisco Francois ki enn Depite ki reprezant Rodrig dan Parlman isi, ti krwar li pu demisyone isi, pu li vinn Sef Komiser Rodrig, si OPR re-eli. Me, li paret Guvernman MSM pa tro anvi enn Parsyel dan Rodrig. Alor, paret ki Guvernman finn konvink Francois pu li pa demisyone kuma depite. Sirman an-esanz pu kit promes. Pur lemoman, pena Minis Rodrig, remarke. Alor, klerman li pa ti pe viz sa pos Sef Komiser Rodrig. Sa vedir, kote OPR sirman Ms Franchette Gaspard pu postile pu vinn Sef Komiser.
Kote pandemi Kovid
Kote pandemi, an zeneral, nomb ka sertennman pa pe ogmante, me pe plito stabilize. Me, bann sif tuzur ankor ase ot. Ena inpe mwins admisyon, inpe mwins ka dan ICU, enn dan lot. Paret dan Moris, nu finn res ant Delta ek Omicronn pu inpe pli lontan ki buku lezot pei. Tulde tuzur prezan. Nu kone, Omikronn, si li trape, li fane byin vit, fer buku ka. Sa ki pe arive dan lezot pei. Omikronn ena isi, me li pankor dominn Delta. Nu ankor ena tulde. Pa finn gayn sa vag imans Omikronn, ziska ler.
Kote vaksinasyon, kanpayn buster pe kontinye. Asterla, li finn akselere buku. Ena bann dedlayn divan lor kisannla pu konsidere kuma fuli-vaksine. U pu bizin fini fer buster. Tu seki ti pe asiz lakaz, pa prese, ena pe dir, “Mo atann Pfizer”, ena inpe tike akoz propagann anti-vaksin, enn ku zot tu finn al met lake. Asterla, li vinn re-vinn inposib dan Sant Vaksin la afors ena dimunn. Partu ena tro buku dimunn. Guvernman ti’nn met dat 15 Zanvye pu eseyans pu buster, me li ti inposib, alor li finn prolonz dat limit ziska 19 Fevriye. Alor, sa vedir fode dimunn gayn buster dan enn tigit mwins ki enn mwa pu ki zot konsider kuma fuli-vaksine. Zot pe akseler kanpayn la. Plis, anmemtan, ena kanpayn 12an – 17 an. Sa osi, Pfizer. An zeneral, kanpayn vaksin pe al ase byin. Me, pu zot ariv fer buster tu dimunn ziska 19 Fevriye pa pu fasil. Pu regayn enn lot mini-kriz.
Guvernman inn anons enn Kovid “spesyal-liv” pu dimunn ki al fer vaksin. Li pa sorti dan sik swa lokal. Li enn Spesyal liv. Kum dabitid, li enn desizyon Guvernman me kan get li lor MBC, li anons li kumsidire MSM ki finn fer li!
Restriksyon ki tuzur an-plas lakoz Kovid, tusala inn etann ziska 31 Mars. Tu restriksyon res parey.
Re-uvertir lekol, par kont finn anonse. Apre buku deba, apre petisyon tusa, lerla finn tom dakor pu re-uver le 2 fevriye. Tu lekol pe repran an “prezansyel”. Ena buku nuvo mo dan sa lepok Kovid la: “prezansyel”, “komorbidite”, pu nom zis 2.
Kote Chagos, Grup Refizye Chagos pe al Lakur Drwa Imin, Lakur Eropyin Drwa Imin, dan Strasbourg. GRC pe osi met presyon lor nuvo lalwa sitwayennte UK pu ki zot mintenir zot drwa kuma sitwayin Britanik. Anmemtan, Olivier Bancoult pe rekumans koz bato pu al Chagos – li pe realize ki Pravind Jugnauth pe rul li lor sa promes bato la.
Kote Internasyonal an bref
Kote pandemi, Omikronn dan Lerop ek USA inn kree enn vag pli gran ki avan, kot ena sif rekor pu nuvo ka. Anplis de sa, ena lezot problem ki lev latet akoz Kovid. Par exanp, Premye Minis Boris Johnson, li dan bel bel problem “akoz Kovid”. Depi 2020, kan ena konfinnman, lokdawn ase sever, kot dimunn pa pe vizit zot paran naryin, dan Biro Premye Minis Nimero 10 Downing Street, finn kontinye fer fet, enn seri parti ek amizman, Premye Minis ek so staf. Zot tu finn kontiyn fer tu kalite fet. Mem depite Parti Konservater inn vire kont Johnson. [Ram dir li pa sir si ena ase pu fer li demisyone, ale, me li pa inposib. Bizin ena 54 depite ki vir kont li. Enn enn 10-enn fini ankoler. Enn depite inn mem demisyone, zwenn Labour.]
Onivo internasyonal, ena zwer tennis kuma Novak Djokovic finn sulev enn pwin byin inportan. Li kwar li spesyal, li. Li enn-de bann pli gran zwer tenis dan lemond, alor li finn krwar li pa bizin swiv regleman saniter kuma tu lezot dimunn bizin. Turnwa tenis Lostrali tro bizin li, li finn krwar. Pu li, zot pu fer exepsyon. Sa, li kapav marse dan enpe lezot pei, me pa Lostrali. Ostrali lor zafer kuma restriksyon saniter, mem sipa regleman lor inportasyon plant ek zanimo, zot bezer. Si u rant Ostrali, si savat lor u lipye li fer ar lapo ki pa proses, zot sezi u savat anplas, u rant dan Lostrali pyeni. Si sanz Leta a Leta alinteryer Lostrali, si u pe manz enn pom dan bis, sipa dan u loto, zot sezi lamwatye ki reste! Pena kata-kata laba lor lasante piblik. Antuka, lotorite Lostrali ti dir Djokovitz, si u ena enn sertifika kumkwa u finn malad Kovid e finn geri dan tel laps letan, u kapav rantre. Ep! So tayming inpe subsonab, li gayn sertifika kumkwa li finn gayn Kovid dan bon moman. Li finn gayn enn seri problem ankor, lor eski li finn koz manti lor enn seri zafer. E, bann la finalman finn met li deor, expilse li. Gran zwer tenis, u pa.
Kote volkan sumarin dan Tonga dan Losean Pasifik, sa finn osi kree enn tsunami ki finn afekte tu pei otur, ziska Zapon, Nuvel Zeland, Alaska, Peru. Me, laba, Tonga, kan li finn exploze anba lamer, li finn avoy gaz ek lapusyer, lasann, enn oter 30,000 met dan ler. Li buku pli ot ki avyon anvole. Li res lao, lerla kumans tonbe dusman-dusman. Antretan, li fini kumans fer letur glob. Li pe vinn isi. Si lev boner, depi dernye 2 zur, granmatin. avan soley leve, lesyel ruz an antye, pa zis kote les, kuma abitye, me partu, antye lesyel. Mem kote lwes. Byin ruz mem. Meteo Moris pa pe liye sa ek volkan, me fransman li paret ena pu fer ar sa. Nu swiv pu nu kone. Tonga, antretan, pe travers enn gran kriz, parski li kuver an lapusyer, lasann. Pena dilo pu bwar. Tu inn kontamine.
Ena enn gran konfrontasyon zeo-politik pe fer ant USA, enn kote avek so NATO (OTAN) ek Larisi. Li otur kestyon Ikrenn. Depi enn bon but letan, USA fer kanpayn kumkwa Larisi pe prepare pu invayir Ikrenn. Tulezur CNN montre foto ayryen ki montre enn ta kamyon park dan Larisi me prekot frontyer. Buku intox. Zot pa montre anserkleman Larisi par NATO. Anfet, NATO ti sipoze al ver disbenn, kan Pak Varsovi disbann 1991. Rapel, NATO ti met dibut an 1949 par Lamerik pu gayn enn seri alye ar li pu “kontenir USSR” militerman. USSR ti met dibut so Pak Varsovi an 1955 pu defann li kont sa militarizasyon ki ti pe anserkle li. E nu finn gayn lager frwad pu sa 40 an la. Kan Blok Sovyetik vinn disud an 1991, e Pak Varsovi finn osi disud, NATO finn kontinye. Trump inn vinn asire ki tu pei kontiyn peye pu gard li. E asterla, Guvernman Biden pe servi sa-mem NATO la pu anserkle, pa USSR, me Larisi. E parey kuma Trump ti konsantre so intox kont sirtu Lasinn, pur lemoman Biden pe konsantre tu so intox kont Larisi.
Bizin veye. Li kapav vinn grav. Ubyin li kapav enn kestyon rod negosyasyn kelkonk. Me, USA ek Larisi de sel pei avek ase minisyon nikleer pu detrir lemond an antye.
NOT: Baze lor Ram so diskur dan Komite Santral LALIT lor Zoom, e osi lor eleman dan deba apre, avek inpe presizyon azute.
