Miz angard lorganizasyon Fam kont langaz anti-fam Roshi Bhadain
15.01.2022
Lorganizasyon Fam, Muvman Liberasyon Fam (MLF) finn lans enn miz-angard a Roshi Bhadain pu so langaz anti-fam. MLF finn adres enn let uver a bann alye politik Roshi Bhadain pu zot pa asosye zotmem a so langaz anti-fam. Let la finn adrese a N.Ramgoolam, P. Bérenger, X. Duval, N.Bodha, lorganizasyon fam ek gennder, osi byin ki fam dan lapres.
MLF finn inform LALIT ki so bi se pu idantifye diskur anti-fam dan domenn politik, amenn deba ek kritik sa kalite diskur la.
Let MLF versyon an angle ti deza pibliye lor nu websayt ek FB le 12.01.22, seki swiv se so versyon kreol.
Muvman Liberasyon Fam
Lasosyasyon Anrezistre No. 1595
c/o Sekreter Rajni Lallah
1a, Lari Lakrwa, Forest Side.
Tel: 5253-4378
Ser Dr. Navin Ramgoolam, ek Hon. Mesye Bérenger, Xavier Duval ek Nando Bodha,
Re: Let Uver Lider Parti Lopozisyon Parlmanter
Nu, dan Muvman Liberasyon Fam, pe ekrir u, kuma lider parti Lopozisyon Parlmanter, pu fer enn demand ki u pran u distans depi komanter anti-fam ek depi taktik anti-fam enn u alye, Roshi Bhadain lider Reform Party. Nu pe fer referans an-partikilye so mesaz video lor Facebook* ek so program Radio Plus**.
Anmemtan, nu swet u, sakenn, enn bon lane 2022, e nu swet u, Dr. Ramgoolam enn retablisman kote lasante apre ki u finn travers Covid plis sibir enn loperasyon stennt.
Kote kontex sosyo-politik aktyel, dan MLF, antan ki lasosyasyon fam indepandan, nu pe konstaman konfront Guvernman MSM-ML avek demand anfaver emansipasyon ek liberasyon fam. Nu fer nu bann aksyon lor baz nu program kont patriarsi. Parfwa nu konfrontasyon avek Guvernman pran form bann “platform” ki kontenir enn seri diferan demand – e ladan ena ki platform komin avek lezot lorganizasyon kuma sindika – e ena fwa li pran form revandikasyon plis spesifik. Alafin 2021, par exanp, nu finn fer enn apel a Minis Fam pu rann piblik Rapor Thea Mendelsohn lor vyolans domestik dan kad so nuvo sondaz, plito ki gard Rapor la dan tirwar. Nu fer sa aksyon la akoz li dan kad nu program kont vyolans domestik. Kumansman sa lane la, kuma u pu okuran, enn nu manb finn sibir enn arestasyon e finn blese kan li ti pe konfront enn polisye poliman dan Rose-Belle; u pu okuran ki MLF ansam ar lezot lorganizasyon, apre lamor Kaya dan kaso, ti met dibut e donn kudme rul JUSTICE: Against Violence by Officers of the State kuma enn laspe nu aksyon kont yerarsi patriarkal ek so vyolans. Ladan nu ti devlop enn Program lor sa size vyolans polisyer, e nu ti gayn plizir viktwar, kuma nuvo lalwa spesifik kont tortir. Tusala pu met lanfaz lor linportans kontex programatik pu tu nu travay konstan pu emansipasyon fam e pu liberasyon an zeneral depi patriarsi.
E, nu bizin azute, nu ena enn listwar lor 45-an kot nu finn prezant nu demand pa zis ar diferan Guvernman, me osi ar diferan parti politik. An partikilye, nu finn atitre fer apel a u, dan Parti Travayist ek dan MMM – me usi a u dan PMSD, tandi ki Rassemblement Mauricien kestyon pa poze akoz li enn nuvo parti. Presizeman akoz nu ena enn long listwar kot nu prezant nu bann demand programatik ar u parti, nu pe ekrir u sa let la azordi. Nu ti mem panse nu finn gayn u sutyin e gayn sutyin u parti lor plizyer isyu konsern lalit fam, deza. Anfet nu finn suvan travay konzwintman avek lel fam Travayis, MMM ek PMSD, usi – lor diferan isyu kuma vyolans domestik, dekriminalizasyon lavortman, ek lor rape crisis units dan bann lopital. Nu panse ki u parti partaz dimwin enn parti nu platform, sirtu lor bann isyu debaz tel ki: rekonet lexistans vyolans domestik e opoz li; donn drwa alaparol e asir lekut tu viktim arselman sexyel; drwa pu fam aplay pu nerport ki kalite plas travay, sanki nu bizin viv dan lafreyer ki bann band zom pu larg enn “lasas” kont nu, si zame nu nome.
Asterla, seki finn arive se u alye dan Lopozisyon, Roshi Bhadain, finn al lans li dan enn lager kont fam.
Bhadain Deklar Lager kont Fam
Dan so lager vanzans kont Premye Minis MSM Pravind Jugnauth, e kont lezot zom, Lider Reform Party Roshi Bhadain finn al deklans enn lager ideolozik tutazimut kont fam.
Sa li vremem enn lexpanp patriarsi ki finn al debride.
Nu fer apel pu u pran distans depi sa laliyn anti-fam la.
Kontex: Venndeta ant zom, ek Lager Macho
Pu sitye nu, rapel ki M. Bhadain li enn ex-Minis MSM, e sa ziska mi-2017. Li ti mem enn lepok “dofin” Aneerood Jugnauth pu post Premye Minis, lepok so garson Pravind ti demisyone kuma Minis e ti pe atann zizman dan zafer koripsyon Medpoint. Kan garson la inn truve non-kupab, M. Bhadain ti vinn notwar kan li ti chombo lame gos Jugnauth Jinnyor, ris li dan enn pozisyon ridikil pu anbras li, kumadir enn fason pu dir li pe temwayn so lwayote a nuvo lider MSM. Me byin vit sa de “zeritye” la finn rant an konfli. Alor, anbras-lame byin vit dezenere an venndeta. Tulede, anbras-lame ek venndeta, zot sorti depi lepok feodal, lepok kot yerarsi patriarkal ti reyne lor fam dan fason buku pli pir ki zordi lepok kapitalism modern. Kapav nu, fam, nu ti bizin fini remark sa “warning” lor ki pe vini dan lavenir depi M. Bhadain.
Tutfason, M. Bhadain kumans deter diferan “ka” pu “sali” sa-mem “lame” ki li ti fek anbrase la. Premye, ena sa ka kot 20-an desela Pravind Jugnauth ti aste enn but later Angus Road lor nom lor so bann tifi. Ti ena peyman atraver enn aranzman bizar, kot enn intermedyer dan Gran Bretayn finn fer peyman la. Pu devwal sa tranzaksyon la, M. Bhadain finn bizin fye lor linformasyon depi laparey leta Britanik. Answit li deter sa aksidan larut fatal kot Pravind Jugnauth ti inplike 25-an desela. E anmemtan, tutlong, M. Bhadain lans so fame badinaz lor “lakwizinn”. Sa li enn kanpayn kont Jugnauth Jinnyor so madam, Kobita ki, dapre falokrat Bhadain, limem veritab sant puvwar dan Guvernman MSM. Pei, dapre sa alegasyon la (uswa eski li enn jok?) pe mal guverne papar Premye Minis Pravind Jugnauth, me par “lakwizinn”, setadir par “domenn fam”. M. Bhadain kumsa atak Jugnauth atraver atak so fam. Sa zar atak la, li sinbol-mem patriarsi kapon. Nu ti bizin fini gayn ankor enn lot warning lor natir Bhadain.
Anmemtan, Roshi Bhadain, kan li perdi dan eleksyon 2019, met Ka Konstitisyonel pu sey demontre ki viktwar MSM dan eleksyon zeneral 2019 pa lezitim. So ka finn rezete. Li finn santi li amer. Me, gayne u perdi, li pa rekonet lezitimite so lennmi, Premye Minis. Li pli konfortab pu li refiz rekonet lezitimite eleksyon guvernman Jugnauth ki u dan Travayis ek MMM, kot u kandida finn, anfet, eli dan sa mem prosesis elektoral, e u pa pe dir zot pa lezitim. Tutfason, asterla, zordi, M. Bhadain inn osi vinn enn lider dan The Avengers, enn lekip avoka tu-maskilin ki gravit otur Ex-Atorne Jeneral Rama Valayden. Kuma nom “Avengers” indike, zot finn donn zot-mem rol pu netway pei atraver vanzans, e pu fer sa dan lepok pandemi kan avoka, kuma buku dimunn dan lezot metye, pe mank travay. Nu dakor ena buku sanzman neseser dan pei. Me atraver sa bann metod macho, nu dir “pena sime”.
M. Bhadain, pu konklir lor “kontex” – e anfet li rezon kifer nu pe ekrir u – u, Mesye Bérenger, Duval ek Bodha dan sa fron komin Lopozisyon Alliance de L’Espoir ansam ar li, e u, Dr. Ramgoolam, u ansam avek li antan ki lider pli gran konpozan “lansanb Lopozisyon”. Me nu bizin pa bliye ki M. Bhadain – e la, li pa diferan depi u, kat lider ki nu pe adres sa let la – li ti enn ex-Minis dan Kabine ansam avek Jugnauth ek so MSM. Nu mansyonn sa zis oka nu bliye kimanyer “anbras-lame” ek “venndeta” ena tandans mars ansam, enn apre lot, dan sistem feodal. Akoz u alye avek M. Bhadain, li vo lapenn rapel ki so bann aksyon reflet pa zis lor li me usi lor u, si u res trankil, si u pa reysi demark u-mem.
Azordi dan leprezan, M. Bhadain ena alegasyon kont li ki li ti inplike, 10-an desela, dan enn gran ka vol dibwa tek antik, kan li ti sef anketer dan ICAC (Institisyon Anti-Koripsyon), e sa finn revinn lor tapi pu turmant li. Ubyin eski sa alegasyon la finn detere? Dan nerport ki ka, li form parti venndeta aktyel.
Atak Frontal Patriarsi
Azordi dan leprezan, kan, le 10 Desam, ena enn ka vyolans domestik trazik, li u alye, Roshi Bhadain so bofrer, enn kad Financial Services Commission, ki perpetrater. Sa paret kler.
Bhadain koze kumadir li premye fwa li pe konfronte avek enn ka vyolans domestik. Purtan, sa dram la li swiv mem patern buku lezot ka similer. So bofrer al so lakaz arme avek enn kuto. Li pik so madam Priya ki ser M. Bhadain, kut kuto dan so liku, rat so larter prinsipal par de milimet, pik li dan so ba-vant e lor so de kote lame. Li manke tuy li. Kan so tifi 17-an intervenir, li pik so tifi usi kut kuto. Apre, mem tanto, li al pik limem dan so leker, e kumsa li desede. Bug la ti usi ena enn bwat zalimet dan lanvlop ki ti dan so lame, Bhadain dir, alor nu prezim li ti pu aroz so viktim avek kit sibstans inflamab, met dife ar li, kuma so Plan B.
Tusala, si li’nn ariv kumsa, li enn lexanp klasik, dan so faz avanse – mem si enn lexanp extrem – vyolans domestik, ki al fini dan enn dram. Enn vev ek enn zanfan dan sa ka la finn, parey kuma buku dant nu, pey enn pri byin ot – anterm vyolans fizik ek vyolans emosyonel. Nu pans zot, e nu mazinn ki zot pe traverse, dan sa moman teribleman difisil. Perpetrater la, bofrer la, finn, trazikman, pey pri iltim, avek so prop lavi, pu so vyolans.
E se apartir la vini-mem, ki M. Bhadain kumans enn seri atak kont fam.
E samem rezon nu pe ekrir u sa let la, dimann u, antan ki so alye, pu pran enn pozisyon.
Aret Lav Blam depi Perpetrater Macho
Kum-dabitid, premye zafer ki patriarsi opuvwar ena pu fer dan bann ka vyolans domestik se pu lav tu blam depi lor perpetrater zom.
Suvan, li “lapres” ki fer sa. Zot fer lanons kuma: “L’infidelité de sa femme la cause du crime”. Zot resi truv enn exkiz pu zom la avan-mem vinn lor item nuvel, setadir ka femisid. Dan sa ka la, “Divors”, gro tit dan lagazet Le Defi “paret lakoz”. Swadizan lakoz deryer sa kut-kuto la, li lefet ki bofrer la so madam, Priya, finn deklans prosedir divors, samem ki li finn sibir vyolans domestik. Lakoz deryer sa atak la, li pa mari ki finn pike kut kuto. Dan muvman fam, nu fer apel pu respekte enn fam so desizyon pu prosed avek divors. Fam pa pran enn tel desizyon alalezer. E nu fer apel a tu dimunn pu zot blam dabor perpetrater pu so aksyon vyolans. Li ki finn pik so madam kut kuto. Viktim la pa antor. Li osi sinp ki sa.
Roshi Bhadain, parkont, prosed dan enn fason diferan pu lav tu blam depi lor so bofrer. Mari la finn pik so fam, li dir, pa parski li enn zom vyolan me parski mari la finn resevwar enn let depi so patron. Sa, dapre Bhadain, samem lakoz: ena enn zom par la, ki ena enn nay kont so bofrer, li-mem lakoz sa kut-kuto ki bofrer la afliz lor so fam. Bann fam ki finn blese, malerezman, dapre sa lozik macho la, zot tu sinpleman domaz kolateral. E zot pa mem ena drwa rakont zot versyon evennman la.
Atak Kont Fam I: Pretann Vyolans Domestik pa existe
Alor, dapre Bhadain, li pa enn ka vyolans domestik par so bofrer. Li akoz, dapre tez Bhadain, patron FSC finn avoy so bofrer enn let sispansyon. Sa let pu inform li ena petet aksyon disipliner pe kumanse kont li dan so travay, samem “lakoz”, Bhadain dir, kifer so fam inn kumans prosedir divors, ki samem “lakoz” kifer Bhadain so bofrer inn pik kut kuto, avan li komet swisid. Kifer so bofrer, si li amerde avek so patron, e si vyolans permisib, pa, par exanp, al pik sa patron la? Kifer li al pik so fam, manke tuy li kut- kuto? Kifer pik li dan so ba-vant? Kifer bles so tifi? Plis anord, kifer li pa fer fas so komite disipliner kuma tu lezot dimunn dan leka fer? E kifer li pa fer fas so divors, usi? Kifer li swazir pu ena rekur a vyolans? E kifer swazir pu atak – parmi tu dimunn dan lemond – so madam? Ala bann kestyon ki vyolans domestik tultan sulve. Pretex Bhadain invante pu so bofrer, li kareman enn argiman debusole. Me, kimanyer li vinn zistifye so argiman, alor?
Repons sinp se li pa kapav. Alor, Bhadain premye dabor, vinn deklare, dan enn program lor Radio Plus, ki tu explike par enn teori ziridik esoterik apel “The Doctrine of Causation”. Li mem fer apel a lider Avengers Rama Valayden, ki ti pe asize akote li lor mem plato radio, kuma so temwin ki sa-mem sa. Kan enn zom, enn sel kut, invok enn doktrinn legal akademik pu zistifye enn aksyon enn zom macho, u kapav devine li pe maske enn febles dan so argiman. Get lozik so argiman enn kut, e u pu truve kimanyer li feb: Enn mari pik so fam kut kuto akoz li finn resevwar enn let depi so patron. Dezyem, Bhadain invok, lor so video lor rezo sosyal, enn long lalis tu kalite bondye ki dan so kote: Krishna, Dharma, Allah, Jesus Christ, Dye Monper. Nu pa pe exazere, samem li finn invoke. Lor Radyo li fer referans a Gita Jayanti. Li pe fer so “dharma”, li dir. Kuma so nom-mem ule dir, limem “zarm Lord Krishna”, li dir. Sa kalite invokasyon, usi, trayir enn volonte pu maske so mank argiman ar enn vwal relizyozite ase efreyan.
Kan Bhadain zet blam lor problem travay pu tir blam depi perpetrater ki pwaynard so madam, li ekivo zistifye tu vyolans domestik. Li grav.
Sa premye baz lor lekel nu akiz Bhadain deklar lager kont fam.
Atak Kont Fam II: Li Totalman Innyor Sarz Arselman Sexyel
Dezyem atak kont fam vini kan nu rant an detay lor ki exakteman sa problem dan travay ti ete ki bofrer la finn gayne.
So bofrer finn sispann dan so travay parski ti ena enn lanket arselman sexyel kont li. Bhadain, li mem, li lir depi let sispansyon ki so bofrer ti resevwar, livre kot so ser:
-- “suvan-suvan u finn dimann li [enn zenn fam stazyer] pu vinn kot u desk, e lerla u poz li bann kestyon personel”,
-- “plizyer fwa u finn dir li ki li bizin gard bon relasyon avek u akoz u-mem ki pu siyn so testimonyal alafin so staz”;
-- apel li kot so desk ek donn li “a small tap on her thigh” (enn ti-tape lor lazam/lakwis) – “li [stazyer la] ti met enn rob sa zur la”;
-- dan renyon travay li ti “devye depi azanda renyon”, koz lor bann kiksoz kuma “ki kalite tatwaz u bizin mete”, e poz stazyer la kestyon lor kifer li pe evit zwenn li; apre reyion, li ti dimann stazyer la “pu vinn kot u desk” pu ki li kapav “blag-blage” avek li;
-- li finn dir enn lot madam kumkwa li anuye apre dernye renyon avek tifi la, e ki bofrer la ti pe sanses plenye ki stazyer la “frwa anver li”.
Patron so bofrer inn donn li zis de zur pu reponn. Lor la, nu dakor avek M. Bhadain, li ilegal, li inzis, li inakseptab. So bofrer ti ena zis pu dir so patron sa.
Sispansyon dan travay, interdiksyon depi lor sayt travay, sa kalite sanksyon, par kont, suvan byin apropriye. Me, Roshi Bhadain, dan enn arogans patriarkal depi enn lot lepok, balye konplint arselman sexyel ki sa zenn fam la finn raporte, pa pran li kont ditu. Zenn fam ki finn fer konplint la pa paret merit enn su latansyon. Li usi, stazyer viktim sa arselman la, li pena drwa ala parol ditu. Mem kan FSC pibliye enn kominike apre, la osi, Bhadain balye avek enn rever lame, mem si konplint zenn stazyer fam korbore par konplint depi de lezot fam, depi avan:
“1. An Avril 2018, ti ena enn konplint an ekri pu arselman sexyel ki enn madam anplwaye par FSC ti fer kont li [bofrer Bhadain]; li ti gayn enn warning verbal pu sa.
“2. An Zin 2020, ti ena ankor enn konplint pu arselman ek pu intimidasyon ki enn lot madam anplwaye ti fer kont li; enn lot warning verbal ti done. Li ti avoy enn let exkiz a madam la.
“3. An Novam 2021, enn trwazyem konplint ti sumet par enn madam stazyer pu arselman sexyel lor li, osi byin ki pu santaz.
“4. Dan lalimyer tusala, FSC ti pran konsey legal, deside pu sispann sa misye la, pandan lanket.
“5. Alegasyon kumkwa rezon pu so sispansyon se pu liber so plas travay pu donn li enn lot staf, li san-fondman, li san-baz, e li fos.”
Sa kominike la date 14 Desam e let sispansyon ki Bhadain ti lir, zot dekrir seki anfet, dan lexperyans 45-an nu lasosyasyon, enn sarz arselman sexyel ase tipik. Sann la la pli grav akoz ena trwa diferan konplint par trwa diferan fam, ena alegasyon ki finn tus enn fam fizikman, e ena alegasyon santaz. Me, M. Bhadain zis innyor tu sa konplint la kumsidire li pa finn mem anrezistre zot. Pu li tusa konplint kuma lapusyer lor meb. Sel repons M. Bhadain se li akiz FSC rod kree enn post pu pa enn “staf”, me pu enn kontraktyel. Ki kalite koze dekuyone sa? Mazinn si sel repons pu sa kominike osi daming se enn teknikalite lor definisyon “staf” swa enn problem draftaz?
Me, pu Bhadain, parey kuma vyolans domestik li pa lafot perpetrater; arselman sexyel, li osi, li pa lafot zom ki fer li. Perpetrater li lave de tu blam.
Ubyin eski M. Bhadain pe dir sa bann evennman vilger – vyolans domestik ek arselman sexyel – napa kapav arive dan so fami? Li dir sa, lor Radio. E li al pli lwin. Li pe mintenir, ki anfet veritab viktim dan tusala se li, li-mem, Bhadain. Li Sef Klan, e li ki finn sibir atak kont so fami, alor so fami pe detrir. Bizin pitye li. Wi, li, M. Bhadain pretann ki se li ki veritab viktim e sa kut-kuto la, e sa alegasyon arselman sexyel. Li viktim akoz so fami, kot li li sef jaz, finn, li dir, “detrir”. E sel zafer ki bizin rektifye, dapre li, se ekut so siporterz ki finn kontakte li pu dir li, fode “pa destabilize”.
Antuka, Bhadain konverti sa trwa fam ki finn raport arselman lor trwa zan, parey kuma li ti konverti so ser ek so nyes, an domaz kolateral ki li fek dekuver dan kur enn venndeta kont li. E ankor enn fwa, li dedwann perpetrater. Tu veritab viktim patriarsi, dapre Bhadain, zot sinp figiran dan sa lager macho ant li, antan ki sef klan, e lezot zom macho, ki sirman osi bann sef klan.
Eski Bhadain pe insinnye ki bann sef dan FSC pe akiz li, Bhadain, gayn linformasyon konfidansyel depi so defin bofrer? E eski li pe insinnye ki samem ki size sa lager macho la? Kot nu pu kone? Me, dan nerport ki kad-figir, li pa relevennt. U pa kapav vinn dedwann vyolans domestik u bofrer, ni dedwann li depi akizasyon arselman sexyel depi trwa fam.
Antuka, dan muvman fam, nu insiste ki dimunn ekut konteni konplint tu viktim ki temwayn arselman sexyel. Li enn pwin de-baz pu fam. Nu atann ki patron uver lanket intern, e kan neseser, met prosedir pu aksyon disipliner. Antretan, nu atann ki sispann zom akize, si neseser, e osi inpoz enn interdiksyon depi sayt travay, kan neseser. Nu finn lite pandan buku lane pu ki sa vinn prosedir normal. Depi lane 1977 vini-mem. MLF ti mem koni pu so let uver ar National Organization of Women dan USA kot nu ti konsey zot lans apel pu Prezidan Demokrat Bill Clinton demisyone apre ki li finn abiz enn stazyer, e pu reziste kont bann argiman macho bankal kuma tusala enn “konplo Repiblikin” alor pena abi sexyel ladan. Ase resaman, laplipar lider feminist Amerikin finn konsed zot erer. Zot dakor zot ti bizin apel pu demisyon Clinton alepok. Wi, sa kalite sovinism zom, li pa existe zis dan Repiblik Moris, ni li pa nuvo. E lager kont li, sa osi, li pa zis Moris, ni li pa nuvo. Kan ekut M. Bhadain, u pa pu krwar ki gran sulevman otur #MeToo Movement dan USA ti plis ki trwa-zan desela.
Atak Kont Fam III: Sezon Lasas Uver kont Fam ki gayn Nominasyon
Trwazyem atak kont fam li konsern seki pe fer referans dan No. 5 dan Kominike FSC (lao). Apre ki Bhadain finn niye vyolans domestik e niye arselman sexyel, li prosede ar enn lot size: li fer alegasyon ki vre rezon, veritab rezon, pu sa konplint arselman sexyel la kont so bofrer, li pa akoz li ti arsel sa stazyer la, non. Ni akoz li finn arsel de lezot fam avan. Non. Veritab rezon se enn lennmi M. Bhadain, enn Minis, ki sanse “tu dimunn” lor Facebook “konn” so idantite, ti pe rod liber enn plas pu kaz enn so seri “metres”, alor ti bizin debaras so bofrer par sa sarz la. Wi, sa-mem seki M. Bhadain dir.
Bhadain mem fer referans a fam ki li pu sanse parasite dan sa post la, e an-pasan ar trwa lezot fam ki finn nome resaman dan institisyon finansye, kuma kat “t...t...nn”. Wi. Pu M. Bhadain, li tutafe normal pu redwir fam, pa zis an-gro kuma enn obze sexyel, me a pa plis ki nu prop parti prive. Bhadain, pu asire ki nu kone li pe deklar lager kont tu fam, li promet ki li pu anons nom fam konserne dan so akizasyon an piblik, kan li terminn so “lanket” lor li. Wi, li CID asterla. Ubyin kuma dimunn ti abitye kriye li, “KGB”. Li pe fer lanket lor fam, li. Li pe fer apel lor Radyo pu dimunn vinn delavan, furni li linformasyon lor fam. Li anonse li pu teroriz fam kumsa. Seki pankor nome an piblik, li pu nome. Tusala, zis akoz li dan enn lager macho ar sipaki sannla dan Guvernman.
Alor, u pu fini remarke, Bhadain finn al fer kiksoz pli grav ankor. Li finn larg lisyin lasas lor tu fam. Kont nu tu.
Bhadain pa dir dan so Program Politik, antan ki nu kone, kuma nu dan MLF anfet dir, ki Minis pa ti bizin viv enn parti so lavi net an-prive (ena enn “lavi prive”). Prayvesi li enn drwa, sa nu dakor, me pa “lavi” net ki “prive”, non. Nu pa dakor ki zom pwisan kapav “gard” lavi antye sertin fam “prive”. Zom pwisan pa kapav kondann sertin fam zot lavi net dan lonbraz sekre. Dan MLF, nu ti denons sa pratik la kan Prezidan Mitterrand ti “gard” enn fam, e osi zot tifi, dan sa kalite lavi-dan-lonbraz an “sekre” la. Bhadain pa dir, kuma nu, nu dir, ki lapres ena enn devwar – e sa, dan enn fason serye – pu expoz sa kalite ipokrizi dan zom pwisan. Non, li pena sa revandikasyon la. Li zis denons “metres” kan li itil dan so venndeta, dan so lager macho. Li dekret “sezon lasas uver” pu tu zom kont tu fam. MLF, par kont, finn fer reynion formel ar fam zurnalist pu diskit sa silans Moris lor kestyon ipokrizi “lavi prive”, apar dan moman kot lapres pran enn kote dan enn venndeta ki large par enn zom kont enn zom. Nu finn fer apel uver pu zurnalist Moris kas sa tradisyon pu kuver zom pwisan kan zot abiz fam, sirtu zenn fam, e nu finn atir zot latansyon lor zoli travay zurnalis Ronan Farrow, Jodi Kantor, Megan Twohey – otur #MeToo. Sinon, sa konspirasyon silans permet ki fam vinn viktim invizib, e lerla enn-ku, silans sispann pandan enn sezon “lasas fam” dan lager macho ant de zom. Nu pa krwar sosyete bizin kasyet konportman zom pwisan kumsa. Sa, ki bizin arete.
Bhadain li finn plito uver sezon lasas kont fam. Ala get ki li finn provoke.
Peblisher pli san-skripil ki ena zordi-zur, li san-dut rezo sosyal – kuma Facebook ek lezot. E ki zot fer kan Bhadain uver sezon lasas? Zot pibliye foto e CV nerport ki fam ki nerport kisannla ki abone Facebook panse ki Bhadain pe fer referans kan li atak sa 4-5 fam la. Kumsa ki sezon “lasas fam” large. Nerport ki kad, ki enn fam ki finn fek nome dan travay, asterla kapav lasas li an-piblik. Bhadain viz pa telman Minis, me sirtu sa bann zenn fam la, anmemtan ki li pretann zot zis domaz kolateral. Enn fam, ki petet pa ti mem pe vize (ki kone?) tir enn Kominike, met dan lapres, kumkwa tusala kont li pa vre. Li pa mem konn sa zom la. Lerla, enn seri lezot atak kumanse kont li lor Facebook, kumkwa li metres, pa sa zom la, me enn lot zom pwisan. Li grav net. Bhadain finn deklans sezon lasas kont fam. Nerport ki zom ki santi li “viktim” dan kit lager nominasyon pu mont lesel sosyal ena zis pu lasas sa fam la lor rezo sosyal, lasas nerport ki fam ki finn nome, kan li krwar li ki “merite”. Alor, kan byin gete, M. Bhadain, u alye, li pe fer exakteman mem zafer ki li dir li pe sibir. Parey kuma li dir bann sef FSC, ubyin enn Minis, (ki kone?) pe “detrir mo fami”, asterla li viz pu “detrir fami” bann Minis, CEO, e tu sa zenn fam ki domaz kolateral dan lager macho.
Li pu kumsa, omwin ki nu pran enn pozisyon kont sa kalite program anti-fam ki M. Bhadain, par so aksyon, pe adopte.
Muvman fam deza pran enn pozisyon lor baz prinsip kont sa kalite deriv la. Nu dimann u, osi, sakenn, fer parey.
Roshi Bhadain, li vre, finn dan lespas enn semenn, sufer troma vyolans domestik dan so fami pros, ki finn terminn dan blesir e swisid, e li finn osi sibir enn arestasyon pu enn ofans kot li dir li inosan. Me, sa pa kapav vinn enn rezon pu nu res trankil kan li fer enn seri bases, enn seri atak osi grav kont fam, kuma li finn lanse lor medya. Nu oblize lev lavwa. Fam pa kapav res trankil kan nu redwir a domaz kolateral ant zom ki pe viz imilye zot rival dan bann venndeta medyeval. Samem nu ekrir u – akoz u so alye – sa Let Uver lor M. Bhadain so konportman la.
Alye Politik Bhadain?
Nu fer enn apel formel ar u, antan ki alye M. Bhadain, u Paul Bérenger, u Xavier Duval, u Nando Bodha dan Alliance de L’Espoir, e ar u, Dr. Ramgoolam, lider pli gran parti dan Lopozisyon, pu pran pozisyon an piblik kont sa atak ideolozik ki M. Bhadain finn fer kont fam, an partikilye kan:
1. Li lav blam depi perpetrater pu vyolans domestik.
2. Li kareman innyor validite konplint arselman sexyel dan travay, avan-mem enn hearing.
3. Li deklar enn espes “sezon lasas fam” kont tu fam fek nomine dan travay, e alor kont tu fam.
So alye bizin omwin pran pozisyon kont zom ki pwaynard zot fam, kont arselman sexyel dan plas travay, e kont atak sexyalize kont fam ki nomine dan enn post travay. Nu pe dimann telman tigit.
E silvuple, si u ti kapav inform M. Bhadain ki pa li, antan ki Sef Klan, ki viktim. Dan evennman ki M. Bhadain dekrir, ala veritab viktim:
1. So ser.
2. So nyes.
3. Trwa fam ki travay FSC, e ki finn fer konplint arselman sexyel.
4. Tu fam resaman nome dan FSC, Bank of Mauritius, EDB, FIU.
5. Tu fam dan pei, ki li pe dekrir kuma sinp “dibyin” ubyin “propriete” enn sef klan, ki sinp “domaz kolateral” kan zom sef klan lager antre-zot. Ondire enn zom sef klan kapav vanze kont enn lot zom sef klan par pik nu, fam, kut-kuto? Ondire enn zom sef klan gayn drwa innyor sarz arselman sexyel dan travay? Ubyin koz mal lor nu an-piblik kan nu gayn nominasyon dan travay, e tann zom apel fam “t...t.. nn”?
.................................................
Ragini Kistnasamy, Rajni Lallah, Lindsey Collen
Pu Muvman Liberasyon Fam
6 Zanvye 2022.
* Linnk: https://www.youtube.com/watch?v=tzJKIycaoEM
** Linnk: https://www.youtube.com/watch?v=i2qcMuJiS2E
