Galleries more

Videos more

Dictionary more

MLF Lans Lapel pu Fam Ansint al fer Vaksin

09.12.2021

Yer Muvman Liberasyon Fam ti emet enn Kominike pu Lapres kot li ankuraz tu fam ansint pu al fer vaksin pu protez zot kont Kovid. Dan LALIT, nu azut nu lavwa ar lavwa MLF.  Fam ansint ena zis pu prezante kot enn sa 5 gran lopital la ubyin lopital Rodrig, dimann kot pe fer vaksin Kovid pu fam ansint, e laba zot kapav koz ar bann dokter prezan. Asterla-mem dan Langleter (kot statistik NHS lor kestyon lasante zot bon), 20% tu pasyan Kovid ki dan ICU se fam ansint. Alor, sa vedir risk ki Kovid prezante pu fam ansint li vreman gran, tandi ki, avek letan, finn truve ki vaksin la li san danze.


Ala seki MLF finn dir:


“Fas-a danze spesifik Kovid reprezante pu fam ansint li inportan pu zot vaksine pu protez zotmem ek zot ti-baba. Li inportan pu tu fam ansint elizib al fer vaksin. Me nu pu rapel, dan kumansman kanpayn vaksinasyon, avek rezon baze lor “prinsip prekosyon”, lotorite lasante dan lemond antye, inklir dan Moris, ti konsey fam ansint pu pa vaksine ziska bann syantist kapav cheke ki pena okenn lefe negatif lor groses. Lor letan, li finn pruve syantifikman ki vaksin li absoliman esansyel pu fam ansint. Savedir li inportan nu met lanfaz lor sa konsey syantifik: li vital pu al fer vaksin, akoz li san-danze e li protez fam ek ti-baba fek ne kont danze spesifik Kovid. Pu sa rezon la nu, dan muvman fam, pe pran linisyativ pu rasir fam ansint ki vaksinasyon li dan zot lintere. Nu ankuraz fam ansint al fer vaksin. 


“Nu finn truv kuma zenn fam non-vaksine inn byin malad ar Kovid, e ena parmi finn perdi lavi dan Moris, parey kuma nu pe truve partu dan lemond, otur lakusman. Sa klerman montre nu ki ena danze adisyonel pu fam ansint si zot gayn Kovid. 


“Nu pe inklir enn video klip 4-minit pibliye par Health Service dan Langleter ki inklir temwaynaz depi plizyer fam ki finn resi sirviv depi ase move Kovid otur peryod zot groses - https://vimeo.com/652051805/e1d8993ac8


“Anfet, 98% fam ansint admet dan lopital Langleter avek sinptom Kovid-19 zot pa vaksine. 


“Azute lor la, ena sa kanpayn anti-vax, ki gayn buku sutyin dan Lapres lokal, ki fann tu kalite fos rimer, “feyk-nyuz” ek tu kalite mansonz grotesk kont vaksin, an zeneral ek pu fam ansint an partikilye. Nu dan Muvman Liberasyon Fam nu ule azut nu lavwa avek lezot lavwa lasyans ek lamedsinn, e fer apel a tu fam dan Repiblik Moris, inklir Rodrigues ek Agalega, si zot ansint, pu al fer zot vaksin osi vit ki posib.


“Pu et presi, nu fer apel a tu fam ek zenn tifi, indistinketeman, pu al fer vaksin kont Kovid. Nu konpran ki lopital rezyonal pe ofer vaksin Pfizer pu fam ansint. E nu fer enn apel irzan a tu fam ansint pu al vaksine parski zot expoze a danze adisyonel si zot gayn Kovid. E Kovid pe fane byin vit dan Moris pu le moman. Bann fam ansint bizin konsyan ki modord depi bann syantist inn evolye avek letan, ek asterla zot kategorik: al fer vaksin ek buster doz. Tu fam ansint usi bizin rasire fas a propagann iresponsab fane par lobi anti-vax.”


Rajni Lallah                                                          


Pu Muvman Liberasyon Fam


7 Desam 2021