Galleries more

Videos more

Audio more

Dictionary more

Urgent Call for Inspections under Pelindaba Treaty for illegal Nuclear Arms on Diego Garcia (in Kreol)

10.08.2017

APEL IRZAN PU INSPEKSYON PU MATYER NIKLEER ILEGAL LOR DIEGO GARCIA


“Komite Diego”, ki regrup LALIT, MPRB, CTSP, MLF e bann individi, pe fer enn lapel Guvernman pu ki li pran linisyativ demar tutswit prosedir neseser dan kad Trete Pelindaba pu enn Lafrik Libere depi Zarm Nikleer pu fer demand pu inspeksyon par ofisye International Atomic Energy Agency (IAEA) dan Diego Garcia, kot ena baz militer UK-USA.


 Nu panse li enn bon moman pu pran sa linisyativ la apre ki le 7 Ziyet finn ena enn vot masif 122 pei dan Nasyon Zini anfaver nuvo Trete pu Interdi tu Zarm Nikleer dan lemond, premye trete baynding ki kareman viz demantelman totalite arsenal nikleer mondyal. Zis Laoland finn vot kont, zis Singapur finn abstenir. Li bon pran not ki tu pei ki posed zarm nikleer kuma Leta Zini, Langleter, Larisi, Lasinn, Lafrans, Israel, Lend, Lasinn, Pakistan, Kore Dinor, ansam ar zot bann vale, finn boykot sa prosesis la e pa finn partisip dan ni negosyasyon nuvo Trete la, ni vot lor sa Trete la.


 Sa vot masif dan Nasyon Zini pu enn Trete pu aboli tu zarm nikleer pu vinn konsolid nerport ki demand Repiblik Moris pu inspeksyon dan kad Trete Pelindaba pu enn Lafrik Libere depi Zarm Nikleer. Moris bizin servi sa lelan anfaver so revandikasyon lor Chagos, ki li finn fek gayne dan Lasanble Zeneral Nasyon Zini, pu akseler enn demars dan kad nuvo Komite AFCONE (African Commission on Nuclear Energy) su Trete Pelindaba, pu exiz inspeksyon IAEA lor Diego Garcia, ki form parti Moris, ki form parti Lafrik, pu etablir si ena stokaz kit matyer nikleer, ubyin kit prezans armaman nikleer lor Diego Garcia.


 Anfet su Trete Pelindaba, li interdi prezans, stokaz, asanblaz, akizisyon ubyin itilizasyon zarm nikleer lor kontinan Lafrik, inklir Repiblik Moris, inklir Chagos. Trete la fini rant anviger depi 2010 e finn met dibut so prop Komisyon apel AFCONE ki so syez truv dan Sid Afrik. Dayer Moris enn parmi sa 12 pei ki form parti sa Komisyon la. Guvernman Moris bizin sumet enn demand formel pu avoy inspekter UN IAEA pu examine si ena prezans matyer nikleer dan Diego. Anmemtan, etan done ki ena dimunn pu kapav argyu ki ti met “dotted lines” otur Diego Garcia dan Trete Pelindaba, Guvernman kapav anmemtan osi fer apel pu inspeksyon su Trete kont Land Mines & Cluster Bombs ki Moris finn osi siyne, ratifye, e vote an 2016 dan Lasanble Nasyonal pu ki kodifye Trete la dan lalwa nasyonal.


 Ala seki Trete Pelindaba dir dan so Lartik dir:


 Article 4: Prevention of stationing of nuclear explosive devices: (1). Each Party undertakes to prohibit, in its territory, the stationing of any nuclear explosive device.
Article 10:
Each Party undertakes to maintain the highest standards of security and effective physical protection of nuclear materials


 Ala seki Trete ki Interdir tu Zarm Nikleer dir:


Article 1. Each State Party undertakes never under any circumstances to: ... (g) Allow any stationing, installation or deployment of any nuclear weapons or other  nuclear  explosive  devices  in  its  territory  or  at  any  place  under  its jurisdiction or control.


 Atraver sa linisyativ politik pu revandik inspeksyon IAEA atraver AFCONE Moris pu konsolid sutyin ki li finn gayne depi Linyon Afrikin ek lezot pei kan zot finn sutenir Rezolisyon pu met kestyon ilegalite aksyon Grand Bretayn, kan li finn demanbre Chagos depi Moris, divan ICJ, e osi pu konsolid sutyin depi sa 122 pei ki fek vot anfaver interdiksyon tu zarm nikleer dan lemond. Anmemtan enn tel aksyon pu kontiyn gard vivan lelan ki ena dan Nasyon Zini anfaver konplet prosesis dekolonizasyon dan lemond.


 Alain Laridon, manb “Komite Diego”,


lor nom “Komite Diego” ki regrup LALIT, MPRB, CTSP, MLF ek plizir individi. “Komite Diego” pe kontiyn, depi 2010, travay ki Komite Rann Nu Diego ti fer dan bann lane 1990.