19.05.2004
Ledikasyon pu Travayer (LPT) finn gayn Pri Internasyonal Literesi UNESCO 2004 (UNESCO 2004 International Literacy Prize). Sa pri-la apel Pri Lasosyasyon Internasyonal Lektir pu Literesi (The International Reading Association Literacy Award). LPT finn gayn sa pri-la pu so travay montre adilt lir-ekrir, kot li finn met lanfaz lor ledikasyon fam, lor respe kontex kiltirel e lor itilizasyon langaz maternel. UNESCO finn osi mansyone ki Ledikasyon pu Travayer finn pibliye, inprime e distribiye liv, inkli enn diksyoner Kreol ek materyo pu lektir ki kuver tu laspe lavi dimunn ki anprann.
Sa pri-la pu remet a Ledikasyon pu Travayer dan kad Zurne Internasyonal Literesi le 8 Septam 2004.
Ledikasyon pu Travayer pe fer sa travay montre lir-ekrir depi 28 an. Anmemtan LPT enn parmi bann pilye ki finn e pe kontiyn promuvwar langaz maternel dimunn. LPT pe dedye sa pri-la a tu zelev, profeser, mamb, sinpatizan e tu lasosyasyon e individi dan Repiblik Moris e ayer ki finn asosye zot ar sa lalit pu rekonesans langaz maternel.