Omaz a Daniele Le Merle, osi koni kuma Dani
05.10.2026
Daniele Le Merle finn desede le 21 Septam apre plizyer semenn sufrans ek tretman lopital.
Dani finn enn militan LALIT devwe e aktiv dan brans Port-Louis ek answit Moka-St Pierre. Li koni pu travay alabaz pu mobiliz abitan lakaz lamyant, pu dimann ki guvernman ranplas sa lakaz danzere ki menas lasante abitan.
Dani finn ne e res dan lakaz lamyant, site Telfair, Moka pandan plizyer lane. Li finn donn buku kudme pu mobiliz abitan Site Telfair ki anserkle avek miray proze Smart City, grup ENL. An avril 2017 Dani ti form parti komite LALIT-abitan lakaz lamyant e finn donn kudme pu organiz petisyon abitan Site Telfair pu dimann ranplas lakaz lamyant. Li ti dan delegasyon ki al depoz petisyon kot Minis Lozman, Showkatally Soodun.
Dani finn prezan dan travay mobilizasyon antye Moris e finn koz lor linportans aksyon pu fors guvernman azir. Li finn donn kudme an 2018 dan de gran manifestasyon dan Port-Louis kot finn mobiliz abitan lakaz lamyant depi plis ki enn sinkantenn Site dan Moris pu al depoz petisyon biro Premye Minis.
An 2019, Dani ti aksepte pu poz kandida pu parti LALIT, sirkonskripsyon No. 6. Ansam avek lezot militan LALIT, li finn donn kudme dan kapayn elektoral lor baz program LALIT, axe lor kreasyon anplwa, pu devlop lindistri agro-alimanter, pu devlop sekter lapes e sirtu pu drwa a lozman ek ranplasman lakaz lamyant.
Dani finn kontiyn partisip dan tu aksyon e reflexion LALIT kont zenosid leta Israel kont Palestinyin dan Gaza, dan kanpayn kont baz militer USA Diego Garcia e kont okipasyon ilegal UK-USA lor Chagos.
Dani ti tultan ranpli avek lenerzi, marse avek gro sak e tultan pe al okip enn demars pu en dimunn an difikilite. Suvan u truv li pe al okip enn dimunn malad parmi konesans ek famiy. Zame li ti mank so Revi LALIT pu li ek so kamarad. Mem dan so sufrans lor lili lopital kan kamarad LALIT finn al rann li vizit, li dimande sipa finn amenn so Revi.
Onivo LALIT nu pu byin mank Dani ki tultan ti prezan dan renyon brans ubyin onivo nasyonal. Suvan li ti vini avek ti gato pu kamarad ki limem finn prepare avek buku lafeksyon.
Nu exprim nu sinpati a a lafamiy Dani e ar tu so kamarad ki afekte par so labsans.
RK ek SJ
5.10.26
