Mazistra finn emet Warant kont 3 ofisye ADSU dan kes militan LALIT Roland Fozoo Zordi
24.09.2026
Zordi gramatin dan Lakur Mahebourg, Mazistra finn emet “warant of arrest” kont trwa zom ADSU: ex-Konstab Thannoo, Konstab Elliah ek Serzan Tapsee dan kes militan LALIT Roland Fozoo. Zot ti sipoze temwin dan ka ki ADSU Rose-Belle finn mete kont Roland Fozoo komkwa li ti fer “obstriksyon” a zot travay antan ki ofisye piblik le 2 Zanvye 2022. Prosekiter finn dir dan Lakur ki li pa kone kifer zot pa prezan. Dernye fwa osi, sa trwa temwin-la pa ti prezan e zot finn gayn lamann pu zot labsans. Me Jean Claude Bibi ti prezan Lakur Mahebourg antan ki avoka kamarad Roland. Le 2 Zanvye 2022, Roland Fozoo ti arete par ofisye ADSU apre ki enn grup zom ADSU finn debark kot li dan kad enn loperasyon ki inplik enn pros Roland, e ti aret li akoz zot dir kumkwa li pe filme zot kan zot ti dan lakur kot so lakaz. Zot finn aret li e amenn li biro ADSU Rose Belle. Premye kut zot finn dir zot pe larg li e pa pu met sarz, lerla zot finn dir ki zot pu met sarz su “lalwa IBA” akoz li ti pe filme zot, lerla le 4 Zanvye, 2022, zot finn vinn avek sarz obstriksyon. Mem zur, le 2 Zanvye 2022, zom ADSU Rose Belle ti osi aret militan LALIT Rajni Lallah kot biro ADSU Rose Belle kan li ti al laba pu al gete kifer finn aret kamarad Roland. Premye, ADSU Rose Belle ti met sarz “Obstriksyon lapolis” kont li, lerla zot desid pu sanz sarz, met sarz “Rogue and Vagabond” kont li, e finalman, le 4 Zanvye 2022, finn retir tu sarz kont li. Lakur finn fixe prosenn dat pu kes Roland le 27 Zanvye, 2027.
