Silans Lezar – Blog Zenosid 86
30.08.2026
Dan Ragoo Lane enn dram diskre. Rapel sa de tutu ki enn fami ti kite kan zot inn al res dan enn flat dan lavil kot pa kapav ena lisyin, e lerla Ragoo Lane antye inn okip sa tulede tutu pu preske 5-an? Enn mama tutu ek so garson avek kitfwa enn vag tras ras Alzasyin kotone? Tutfason, enn inn tom malad, mama la. Alor, enn vwazin finn aste “serom” e finn nuri tutu la avek enn kuyer depi plizyer zur, seki finn gard li vivan. Enn lot vwazin yer inn apel enn veteriner pu vinn get li, e nu finn kontribiye. Alor veteriner inn fer enn pikir, e donn trwa medsinn, aster tutu su tretman profesyonel par sa vwazin ki ti pe donn li serom. Pa paret ena buku lespwar dapre mo lizye amater. Me avek tu sa swin ar lafeksyon ek konpasyon, ki kone? E so gran tutu mal, detanzantan fer bann ti son plore, depi enn distans.
E lor enn not plis menasan, enn move siyn dan debalansman lor lesel planeter, enn per gro lezar ver finn rant andan lakaz buku dimunn. E zot manz tu nu ti lezar indizenn. Nu finn truv enn gro lezar, avek nu lizye, manz enn ti lezar. Alor, nu kone. Avek sertitid. E nu bann lezar zot ena aster ekse nervozite. Zot ti abitye dosil e kalm, adopte nu lakaz kuma kot zot. Aster zot res kasyet, e sote kuma ena ninport ki ti muvman pre ar zot. Zot luke, e sove al kasyet. E zot finn aprann pu napa fer okenn son ki zot ti abitye fer kan ena enn konfrontasyon enn kont lot, tulede dan mem spiyshiz. Silans lezar. Vites sa bann dragon ver la pe ogmante, e vites ki nu ti lezar pe disparet vedir ena menas extinksyon. Presede par silans.
E ena enn mesaz ankor plis inkyetan lor lesel mama bul later.
Manyak zenosider Israelyin inn vinn ankor plis fuka. Divan lizye tu dimunn, zot komet zot barbari, zot masak. Israelyin inn vinn andeor kontrol. Zot pe aster fors popilasyon Gaza lor deplizanpli mwins later, zot pe buz sa laliyn zonn malfame. Antretan zot pe kontinye tuye, kontinye inpoz enn blokaz ankor pli sever lor tu livrezon led imaniter ver Gaza, provok lafaminn e lamor depi maladi gerisab ek evitab. E asterla zot finn anbark dan enn destriksyon total parey kuma Nakba 1948. Zot ena lintansyon pu pus tu, uswa gran mazorite Palestinyin Gaza dan dezer Ezipsyin.
Li pa zis depi inpe mwa me inpe lane desela ki mo nepli ena mo dan langaz pu dekrir kuraz, sufrans, perseverans, landirans lepep Palestinn. Kan mo ti sit “Pena so plis pir” li finn kontinye res vre. Leta Israel li enn danpi sadism sanfon.
Zot guvernman kriminel, zot Premye Minis wannted pu krim deger, “kriminel-an-sef” finn fek deklare piblikman ki li pa pu retir li depi Gaza. Zot zame pa finn respekte sa sese-lefe la, ubyin ninport ki lezot sese-lefe, uswa pa mem sa “diyl” lamantab Trump me zot selman pretann zot dakor. E, dan WesBenk, kolon Israelyin zis rantre e bat Palestinyin, literalman aras zot depi zot later, bril zot lakaz, pli pir pogrom lepok modern inn temwin. Met dife, bril pye zoliv plizyer santenn banane. Par expre. Antretan “Loksidan sivilize” pe kontinye arm Israel amezir li pe kontinye anfonse mem avek so seri masak, e samem “Loksidan sivilize” pe kontinye reprim zot prop popilasyon dan sakenn so pei ki avek kuraz pe leve kont tu sa krim Israel e kont konplisite zot guvernman. Guvernman Moris, usi, konplis. Li finn krwaz lebra e finn esey gayn enn lamone lor Diego Garcia depi kriminel UK-USA, olye anpes zot pu napa servi baz ditu. Li ule tant so sans dan atir kapital finansye kriminel malfame depi Leta Golf.
Liran, par kont, finn nomeman spesifye lape dan Palestinn asterla mem, kuma enn parmi kondisyon explisit pu re-uver Detrwa Dormuz pu permet kargezon petrol traverse. Sa li bon. E Liran, avek kuraz, inn anonse, li pu al lor lofansiv pu ki inplemant tu lezot kondisyon “Memorandum of Understanding” (MOU). Sa MOU kot Trump finn personelman apoz so siynatir ridikil, siynatir pwint-pwint divan kamera TV. Li spesifye sirtu ki lager pu arete lor tu fron, li pa selman siynatir USA ek Liran, me li usi angaz tu zot alye. Etan done li enn lager dagresyon, agreser ena pu bat retret. E sa li deza inklir dan MOU ki finn siyne, retre depi Liban (mansyone trwa fwa) e “lor tu fron”. Liran asterla pe klerman dimann USA pu retir li e evakye tu so baz deza paralize uswa detrir dan Mwayin Oryan. Pei Lazi asterla, pe ena pu prepar terin pu zot pran responsabilite zot defans zot mem. Larabi Saudit, Pakistann ek Latirki finn siyn enn kik kalite Pakt ki anmemtan ena buku sinifikasyon. Remarke Pakt Lamek pa finn siyne dan kapital Larabi Saudit me dan Lamek, li usi anmemtan potansyelman pena sans, akoz li telman vag ek opak. So linportans se USA ‘PA’ ladan. USA kapav et finn kur-sirkwite par so pli pros alye, Larabi Saudit, Pakistann ek Latirki. Li paret li enn Pakt kont Israel. Me sa, mo pe devine. E rapel, Pakistann li ena bom atomik. Rapel Latirki enn manb dan NATO, li ena dezyem larme pli pwisan dan NATO apre USA. Alor, ninport kimanyer, Pakt la li inportan.
E Liran inn anons kondisyon pu re-uver Detrwa Dormuz, kondisyon deza dan MOU, me formile dan enn langaz pli kler. Arete ar tu menas meskin e langaz grosye, silvuple, return tu fon ki USA inn “kokin” depi Liran – apenn si bizin met giyme otur mo “kokin”, parski sa fon la finn efektivman kokin depi Liran. Liran usi demand lafin sanksyon ekonomik e blokis dan tu kalite diferan form ki finn inflize lor li pandan preske 50 banane.
Tusala pe arive asterla an 2026, ki demontre nu, ondire bizin prev, ki kolonizasyon pe ankor kontinye. Israel ankor pe koloniz Palestinn. Iran ankor pe sufer depi sa ku-deta CIA-UK kont Guvernman eli Mosadeq an 1953. USA-UK invant sa bann Leta Golf selman apre prosesis dekolonizasyon ti finn byin avanse. Ena Leta ladan inn kree osi tar ki dan bann lane 1970, pu kontrol petrol e pu ponp petro-dolar ver USA pu li mintenir so sirvi malgre so det kolosal ki pe menas so sirvi. E Diego Garcia, dan Arsipel Chagos, ankor tuzur kolonize par UK-USA dan enn nuvo koloni kinn met dibut anplin prosesis dekolonizasyon, parey kuma Palestinn ek bann Leta Golf.
Alor, Loksidan so mask pu kuver so fas fasist orib inn tonbe. Pu kontinye kolonizasyon, Loksidan pe al detrir so prop “lalwa internasyonal”, ziska mem so prop “rule of law”, “Leta dedrwa”, so mizerab sanblan demokrasi. Kumanse kan USA re-nom “lalwa internasyonal” par nepli apel li “lalwa internasyonal”, me baptiz li “the rules-based international order”, ki vedir regleman met anplas par USA ofir amezir. Nepli Leta dedrwa. Asterla regleman andan regleman. Pa fer okenn sans. Mem gramatikalman.
Erezman Liran finn gayne dan premye de rawnd lager dagresyon USA-Israel inn inflize lor li. Lager 12-zur lane dernyer, e lager 40-zur sa lane la – enn lager ki tuzur pankor fini. E asterla Iranyin inifye kuma enn lepep kont agresyon inperyalist. USA inn maye dan seki apel enn pyez eskalad ki limem inn instale. Li ogmant lanze, e lerla Liran mat li. Sak fwa USA azir, Iran replike, rann li so parey. Exsepte Liran pa finn bonbard sivil. Kan USA atak Liran, Liran detrir baz USA dan Kuwet, Bahrain, Katar, Larabi Saudit, UAE, mem Oman, e finalman USA inn bat retret al ziska Zordani, al ziska mem park so flot avyon dan Zordani. Liran inn bonbard zot laba usi. Asterla, USA finn bat retret al dan Israel.
E byinsir, Liran finn blok Detrwa Dormuz. E finn travay lor enn plan, pandan sa 60 zur “Memorandum of Understanding”, ansam ar Oman, sa lot leta litoral lor kimanyer pu rul Detrwa Dormuz e lor ki fiz pu aplike pu “drwa pasaz inosan” dapre lalwa internasyonal.
Kumsidire Trump pa inn ase imilye par perdi lager ziska ler, fas a Liran enn pei avek otan imilite, aster li finn vinn piblik ki Trump finn al les li kuyone par fos ranseynman Israelyin lor enn konplo pu tuy li. Li finn met li dan enn pozisyon ridikil pu sorti an kasyet depi Air Force One, so avyon bunker kot li finn akrupi dan enn sa bann trole restorasyon mete lor avyon ordiner pu servi manze e retir manze restan, e defalke dan enn tipti avyon. Antretan, so Sekreter Deta Marco Rubio ek lezot dan lekip Trump, osi byin ki lekip lapres antye, zot tu ti delese lor avyon ki sipoze pe al exploze, uswa sipaki Israel pretann ti pu arive! Pli las parmi tu sa bann lider las ti pe sov so lavi e les so swiver ek portparol pu mor. Byinsir, lekip Iranyin ki kree sa seri LEGO video, finn pran enn malin plezir avek sa zom ki pli inportan lor planet pe kamufle dan trole manze pel-mel avek manze restan. Sey get sa video si u pankor gete.
Kan pe koz trole manze, imans port-avyon Amerikin USS Abraham Lincoln finn res lor lamer pu plis ki 8 mwa san ki so 5,000 marin anprizone, garson ek tifi dimunn mizer, inn met zot lipye ater, lor later ferm. E manze pe donn zot pa bon, manze pa ase, dilo polye e twalet ek fasilite lav linz bloke, pa pe fonksyone. Tusala asontur pe fer so militer sufer tu kalite problem lasante mantal. Ena parmi pe mem sey swiside. Tusala vinn azut ar lefet so personel militer pena okenn lide ki veritab rezon sa lager la. Pu atak Liran? Kifer? Pu demanbre Liran? Kifer? Akoz Israel finn dir sa? Pu aret Liran fabrik enn bom atomik? Li pa ti mem fabrik enn, mem USA so prop servis ranseynman inn konfirm sa. Li pa ule ena enn. Tutfason, ti ena lakor Obama ki ti anpes sa, e Trump finn detrir li. Uswa eski zot ti atak Liran avek lide pu ena enn sanzman rezim dan kat zur? Avek de-trwa santenn azan Mossad ki provok terer otur bann tipti vre manifestasyon. Efektivman USA finn tuy de lekip totalite “kabine” Iranyin e Guvernman Liran finn sorti pli for. Lepep ankor pli ankoler. Kuma bann las, zot finn asasinn lider spirityel? E asterla, zot finn bizin defalke zot imans port-avyon enn-de santenn mil distans lwin depi lakot Liran akoz misil Liran pu eklat zot si zot sey koste pli pre. Abe, kifer zot mem laba? Aster, zot laba, li paret pu zot uver Detrwa Dormuz. Me detrwa ti uver avan agresyon USA-Israel kont Liran mem kumanse. E asterla sa mem Detrwa su enn blokis USA! Inkrwayab?
E antretan Grand Bretayn, pli pir ki USA lor sa kestyon la, finn vinn enn pei kot nepli ena liberte dexpresyon ditu, kan trwa mil dimunn – sirtu vye gramer – inn arete lor sarz zot finn dir “Mo opoz zenosid. Mo sutenir Palestine action” uswa akoz zot finn ekrir sa lor enn but bristol. E asterla pwisan “Grand” Bretayn, li usi finn imilye par so prop zidisyer lor kestyon liberte dexpresyon. Gran Bretayn so prop Lakur Dapel Indistriyel, finn truv Dr. David Miller, lisansye depi so post travay Liniversite akoz li finn analiz Leta Israel kuma enn Leta Zionist, kolonyal ek Aparteid. E akoz li sutenir Palestinyin ki pe trake par lasas, asterla bizin regayn so travay e ranburs li aryeraz so lapey e tu seki dwa li. Ofet, Lakur Indistriyel ti fini donn enn zizman kot statye so lisansiman ilegal. Me DPP, su presyon abityel lobi feros Israelyin, ti fer apel kont sa zizman la, e asterla David Miller finn gayn so lapel divan tribinal dapel Lakur Siprem. Li inportan mansyone kan Liniversite Bristol lisansye li an 2021, sa li tom avan zenosid renuvle e akselere mem kumanse apre le 7 Oktob 2023, finn fer Dr. Miller siyn enn but papye pu obliz li gard silans pandan tu sa lane la, pandan ki so ka ti pe trene dan lakur. Sa kalite NDA (non-disclosure agreements – kloz konfidansyalite uswa lakor pu pa divilge informasyon) bizin aboli dan tu demokrasi asterla! Zot enn atak mortel kont liberte dexpresyon. Asterla kan ena enn tel presedan etablir par enn Tribinal Lapel, sa pu provok enn avalans ka kont tu lisansiman par institisyon akademik, lekol, lagazet ek lezot media, mem lopital! Viv lalit ki pe kontinye pu liberte dexpresyon ek liberte akademik artikile avek lalit LIBER PALESTINN!
Alor, leson se lemond dan enn fason elokan opoz zenosid Israel. Me Guvernman Leta inperyalist Oksidantal mem dan zot leral ankor sutenir sa zenosid la – parey zot “apandis” ki sertin Leta finn devini, parey kuma Leta Moris pe devini divan nu lizye. Kumsa zot tu perdi zot lotorite moral. Kumsa zot tu diriz zot pli vit dan ekrulman totalite sa lanpir an dekonpozisyon, ronze depi linteryer kuma li ete par so prop lekonomi “finansyalize” kanibal. Wi, kapital finansye ek rantye ki reprezant “kapital data”, pe tuy kapitalism so prop stad devlopman inperyalist. Lepep dan sa bann pei inperyalist an deklin pe zot usi kumans revolte, zwenn lezot pei ki pe sey kas lasenn zug kolonyal ki pe oprim nu tu.
Alor, anmemtan USA finn perdi premye de rawnd lager agresyon ki li finn deklanse kont Liran. USA pe usi kumans truve li finn perdi sa lot lager ki li ti deklanse atraver enn kudeta pa tro diferan depi seki li ti fer kont Liran an 1953. Mo pe fer referans ar sa kudeta organize par lekip Obama-Biden-Victoria Nuland an Fevriye 2014 kont lider eli demokratikman Prezidan Viktor Yanukovych. Lager Ikrenn li enn lager NATO kont Larisi. Aster veritab vize pe vinn kler. Ikrenn enn malere buk emiser. Lepep Ikrenyin zot viktim sa masinasyon Oksidantal pu anserkle avek bi pu kas-kas Larisi but-but. Perdan dan tusala se Ikrenyin ek zot pei. Zot ti fer konfyans USA ek Lerop. Zot finn redwir zotmem kuma manze kanon Loksidan.
Enn nuvo lemond pe sey pran nesans. Guvernman partu dan lemond pe sey liber zot depi 500 banane inperyalism Oksidantal. Ekonomikman, Lasinn pe kumans demerd li depi dolar USA. Lepep alinteryer pei inperyalist zot usi pe sey liber zotmem. Liran pe mat ar USA militerman. Hezbollah, Huthi Ansar Allah rezistans dan Lirak, zot usi. E Larisi pe oblize, malgre puvwar so klas oligark, fas a anpyetman ek belizerans, konbine avek retre Trump depi trete lor zarm nikleer. Lalyans kuma BRICS pe sey pran nesans. Korperasyon kuma Shanghai Cooperation Organization usi pe seye. Dan Lafrik, kolonizater Franse inn gayn fu deor. Me Israel kontinye karyate – li finn mem fragmant Somali, separ Somaliland, ki zis Israel rekonet. Israel ek USA finn konplis dan fragmantasyon Lalibi ki asontur deklans enn imans vag imigrasyon depi Sant Lafrik al dan Lerop. Par milyon dimunn ti pe travay dan Lalibi avan B. Obama ek Hilary Clinton rwinn pei la, ek fragmant Sudan. Israel pa toler okenn gran pei otur. Li ule USA ek so bann vale detrir tu gran pei otur.
Par kont Lider Eropein swiv zot prop klas kapitalist dan sa turbiyon ver bafon dan lekel USA ete, parey kuma Zapon. Lalmayn finn permet USA exploz so milyar-dolar payplaynn gaz depi Larisi, e vinn depandan lor inport gaz depi USA a enn pri de fwa pli ser. E, Moris dan so exsed-zel, li komsidire sa bann Guvernman extrem-drwat kuma Arzantinn, asterla Kolonbi, Giyann, Chili, kot zot burzwazi, usi, parey kuma oligark isi dan Moris amare ar lanpir USA – zot antrenn zot laparey Deta ladan. Sa kapav pe mem arive dan Venezwela apre kinn kidnap Prezidan ek so madam, lor fos sarz ladrog invante, ki asterla pe aparaman abandone san li vinn kler ki veritab sarz la ete. Sa nuvo Prezidan finn al mem ziska rekonet Israel. Me li pankor vinn kler si revolisyon Bolivaryenn inn al ase profon pu fer li difisil ranverse kuma dan Kiba – akoz li ti eliminn sa klas oligark pandan so revolisyon.
Antretan, ena nu traka tulezur, pri manze ek lesans pe monte akoz agresyon USA-Israel. Enn tutu finn tom byin malad, e tu dimunn finn vinn ansam pu sey sov li. Gro lezar ver pe aval nu lezar vivan.
Tuzur pankor resi aret sa Zenosid la. Okontrer, li finn fane al ziska Sid Liban. E si nu pa aret li, li pu fane ankor plis.
Lindsey Collen pu LALIT
Versyon Angle pibliye 16 Ut 2026
Tradiksyon BK ar kudme CC
