Seki Ram Seegobin ti dir lor Prinsip ki Guvern tu Lagrev
27.08.2026
Dan kad deba lor posibilite lagrev pu protez pansyon e welfer steyt
Kan klas travayer finn re-kumans mobilize kont atak kapitalis ek FMI kont sistem pansyon atraver guvernman Ramgoolam-MMM-Subron-Duval, pe ena buku deba lor posibilite lagrev zeneral. Me enn lagrev zeneral li pa vini par limem. Bizin prepare pu li. Parti LALIT, nu finn ne dan sa lepok kot sindika ek militan pe prepare ver lagrev zeneral. Li ti deklanse par laburer ek artizan lindistri sikriyer, e lerla preske tu sekter finn zwenn ladan. Avan lagrev, ti ena par santenn miting, partu dan sak vilaz. Ti ena par milye reynon dan diferan vilaz kot laburer ek artizan reste. Ti ena solidarite depi sindika dan sekter kle kot travayer ti deza mobilize, sirtu lepor ek transpor. Finalman li vinn gran e pli long lagrev dan listwar pei lor 3 semenn. Amezir lagrev-la devlope, li vinn enn muvman lagrev.
Kamarad Ram Seegobin, militan LALIT ki finn desede an Zanvye 2026 ti dan lidership sa lagrev-la. Depi so kumansman mem li, ansam avek buku militan Lalit de Klas, ti anim brans sindika laburer ek sindika dan enn striktir sindikal desantralize ki zwenn regilyerman an-permanans dan plizyer vilaz kot travayer reste. Li ansam avek lezot militan LALIT finn dan sa gran travay preparasyon ver lagrev, pu tini muvman lagrev, e pu konsolid gin lagrev kan li fini, e gard mobilizasyon ziska lot flanbe dan muvman-la an Septam 1980. Ti ena buku manb Lalit de Klas ki ti dan lavangard lor sayt. Sa vedir zot ti travayer plis avanse, ki finn devlop kapasite pu konpran lafors potansyel travayer antan ki klas, e kimanyer organiz travayer pu exprim sa lafors inifye-la. Zot ti lider alabaz.
Ram Seegobin ti parmi dimunn ki ti fer lagrev lafin an Ut 79 osi byin ki an Septam 1980. Plizir militan LALIT ki tuzur dan LALIT zordi ti aktif dan lagrev: Lalit de Klas, ki vinn LALIT kan nu vinn enn parti, ti lidership politik sa muvman lagrev-la. E sa lexperyans-la finn transmet a tu nu manb konstaman depi 1979 ziska zordi. Sirtu atraver kamarad Ram Seegobin. Dan so liv Lagrev Ut 79, li finn explik pa zis sa lexperyans enn muvman lagrev kuma li devlope, me li osi finn explik kitsoz ki byin-byin itil pu zordi: Prinsip ki guvern tu lagrev. Nu pibliye enn extre so liv pibliye an 2017 baze lor enn diskur ki li ti fer lor Lagrev Ut 79 an Ut 2009, 30 an apre parski li ed nu e tu delege dan sindika, travayer pli avanse lor sak sayt travay zordi pu konpran kimanyer prepar mobilizasyon ver lagrev. U kapav lir transkripsyon so diskur orizinal 2009 lor websayt lalitmauritius.org.
Ala extre depi analiz Ram Seegobin.
Prinsip ki Guvern Tu Lagrev
“Premyerman dan enn lagrev, nerport ki lagrev, me sirtu enn muvman degrev, li inportan ki revandikasyon zot byin, byin presi. Setadir li inportan travayer kone exakteman ki bann revandikasyon ete. U pa kapav ena revandikasyon vag, ondire pu “plis lazistis”, pu “meyer distribisyon”,non. U bizin ena bann revandikasyon absoliman presi. E pu bizin osi poz lakestyon, eski travayer pare pu fer lagrev pu sa bann demand la? U pa kapav ena sertin demand, lerla dir travayer fer lagrev, kan travayer pa tro pare pu fer lagrev lor demand ki sipoze pe met divan.
“Dezyem prinsip fondamantal, se kimanyer mobiliz lamas travayer pu sa aksyon initer-la. Li enn aksyon demas, me li enn aksyon initer. Savedir tu travayer pe mobilize, pe buze, pe fer lagrev, pu bann mem demand, bann demand initer.
“Trwazyem se, kan lagrev fini deklanse, kan pu kontinye, kan pu arete. Sa li enn pwin fondamantal dan nerport ki lagrev.
“Katriyem prinsip, sa muvman ki pe deklans lagrev-la, so bann dirizan, bann delege, zot bizin ena enn preparasyon pu fer fas a tu konsekans lagrev. Pandan lagrev, ek apre lagrev, u bizin pare pu fer fas a konsekans. An Ut 79, ti ena sertin dimunn pa ti vreman prepare pu fer fas a sertin konsekans kuma lisansiman, kuma represyon. Me, kan u deklans enn lagrev kumsa, u bizin fini prepar umem, sikolozikman, prepar umem moralman, dan u-mem u bizin fini pare pu fer fas a nerport ki konsekans ki kapav ena dan lagrev.
“Sirtu, sinkyeman e dernyerman, pli inportan se kimanyer asire ki travayer partisipe dan tu desizyon, e partisipe demokratikman. Se pa enn ti-poyne dimunn ki desid pu fer lagrev. Se pa enn ti-poyne dimunn ki desid pu kontinye lagrev. Se pa enn ti-poyne dimunn ki desid pu aret lagrev. Savedir, e se la ki sa bann striktir ki forme pandan lagrev-la, inportan, parski sa donn enn mwayen pu bann travayer ki pe fer lagrev, zot-mem zot deside lor derulman lagrev.
“Sa bann prinsip fondamantal, ki nu kapav konsidere kan nu get nerport ki lagrev....”
Konklizyon
Zordi sa tuzur enn gid kan klas travayer pe bizin mazinn rekur a lagrev.
Extre depi Lagrev Ut 79 par Ram Seegobin
