Kot Prodiksyon Alimanter gran lesel dan Finance Bill?
27.07.2026
Dan Finance Bill ek Bill ki introdwir enn seri lezot mezir, pena nanye ki pe viz pu ogmant sekirite alimanter pu ki ena suvrennte alimanter. Sa li sirtu inportan dan enn lepok kot lager agresyon USA-Israel kont Iran pe trene. Deza, sa lager-la ti afekte prodiksyon fertilizan, e sa pu aksantye, ki vedir prodiksyon agrikol mondyal pu afekte. Pei ki export manze ki li plante, si so kantite vinn limite, pu prefer met anbargo, diminye ubyin mem aret exporte. Isi, nu inport 80% nu manze. Savedir pri manze pu vinn pli ser e riske peniri. Sa mank mezir riske met an-peril sekirite alimanter. Anplis, li pu diminye deviz. Anplis, li pa kree anplwa stab ki permanan.
Guvernman pe kontinye les kapitalis imobilye bayant later agrikol. Mem si dan Finance Bill, Land Transfer Tax ek Registration Duty pe ogmante, tulede sorti 5% vinn 10% pu non-sitwayin ki aste imobilye delix su proze EDB kuma PDS, Smart City, li pe ankuraz sekter kapitalis dan imobilye delix e milyarder ki investi Rs1 milyon dolar par ofer zot enn “Golden Visa” e dan ka seki aste imobilye delix, permi rezidans permanan.
Tusala riske ogmant depandans Moris lor inportasyon manze. Li grav.
Pena prodiksyon ditu kan ankuraz proze imobilye delix kumsa. Tuseki li finn vedir se tablisman pran so later agrikol ki pena bel pri lor marse nasyonal, konverti li an-later rezidansyel ki gonfle so valer enn sel kut, plank Smart City, IRS, PDS, IHS lor-la, lerla vann li ar milyarder lor marse internasyonal. Sa osi gonfle so pri ankor. Later agrikol detrir enn sel kut. E tablisman finn fer sa avek kudme tu guvernman depi 2002 ki finn donn kapitalist par milyar konsesyon tax. An repons a enn kestyon parlmanter an Mars 2025, zis Smart City finn benefisye Rs6.61 milyar an-form konsesyon tax depi 2015. E sa, san kont konsesyon tax pu konverti later agrikol, fer li vinn rezidansyel (Land Conversion Tax). Zis Smart City, san kont IRS, PDS, ERS, IHS finn detrir 6,332 arpan later. Li grav.
Finance Bill dan enn kontext mondyal kuma nu ete, ti devet pe introdwir mezir pu stop destriksyon later agrikol, introdwir nuvo mezir pu fors tablisman plant manze lor 1/3 so later. E met lizinn pu prezerv e transform sa manze-la partu kot ti ena mulin. Se sa kalite mezir-la ki pu amenn prodiksyon alimanter lor gran lesel dan pei. Se sirtu manze-de-baz ki bizin prodir: diri, may, pomdeter, zariko, ek pu dilwil, pistas ubyin fler soley. Se sa kalite prodiksyon-la ki pu kree anplwa stab ek permanan pa zis dan plantasyon, me dan lizinn transformasyon manze, dan so transportasyon, stokaz, marketing, resers. Me pa sa ki Ramgoolam-MMM-Subron-Duval pe fer. Zot prefer swiv kot kapitalis truv gro profi san li bizin fer okenn prodiksyon.
