Politik Tax dan Finance Bill
27.07.2026
Olye ogmant tax lor gro konpayni ki pe fer milyar Rupi profi, guvernman Ramgoolam pe mintenir tax konpayni 15%. Anfet tax lor konpayni dan Moris li to pli ba dan Lafrik: Sudan li 35%, Kamerunn 33%, Nizerya 30%, Sid Afrik 27%, Lezip 22%, Madagascar 20%, dan Komor li mem 50%.
Mem si ena enn ogmantasyon innkom tax pu siper gro reveni li pa ditu nivo ki finn deza ena Moris e mem Leta Zini.
Guvernman pe osi donn ankor plis lavantaz tax, sirtu pu konpayni dan sekter finans, dan lasirans ek ofshor. Savedir pe favoriz sekter ki pa dan prodiksyon o-detriman sekter ki prodir larises kuma lagrikiltir ubyin lindistri manifaktir. Parmi sa bann mezir la ena:
- Finn etann exanpsyon innkom tax lor konpayni lasirans (‘captive’) sibsidyer miltinasyonal pu ankor 5an, sorti 10 an vinn 15 an.
- Finn exanpte depi tax konpayni investisman ki travay pu gro miltinasyonal (MNE) dan ‘real estate’. Finn mem redwir zot lamann pu non-peyman tax par lamwatye, sorti 5% vinn 2.5%.
- Finn exanpte pu 10-an tax tu konpayni ‘start-up’. Anplis aster zot nepli pu kumans elizib pey tax dimoman zot anrezistre kuma konpayni me apartir dat ki zot konpayni kumans opere.
- Konpayni depi deor ki ofer servis dizital dan Moris nepli pu bizin anrezistre pu VAT.
Tu sa lamone exanpsyon tax la ti kapav servi plito pu sutenir sistem pansyon ek konsolid Welfer Steyt anzeneral.
