Finance Bill ek Pansyon Vyeyes Iniversel 60-an

27.07.2026

Apre gro mobilizasyon sindika, Guvernman finn bizin rekile lor 2 pwin:

1 Introdwir miyns test, targeting lor pansyoner ek

2 Ranvway so desizyon lor fon pansyon. 

Guvernman so Finance Bill ek Economic-and-Financial-Measures-Miscellaneous-Provisions-Bill ena pre 85 lalwa pe propoze pu amande pe vinn divan Parlman avek enn sertifika dirzans kot depite eli pa pu ena letan pu etidye tu amandman e partisip dan enn deba demokratik lor sanzman ki tus lavi dimunn dan so lavi tulezur.

Guvernman Lalyans pe persiste dan so atak kont pansyon iniversel. Sa atak Guvernman PTr Ramgoolam-MMM- ReA Ashok Subron-Nouveaux Democrates Richard Duval, li reprezant enn atak frontal a Pakt Istorik depi Lindepandans pu asir enn pansyon vyeyes iniversel kan enn dimunn ariv laz 60-an. Pansyon vyeyes iniversel 60-an li form parti dan kondisyon travay tu travayer, li kone kan li pe travay ariv laz 60-an li garanti enn pansyon pu so vye zur. 

Zordi kan Finance Bill Guvernman Lalyans pe fer laz referans pansyon sorti 60-an vinn 65-an e li usi kontenir enn menas pu pus li ziska 70-an, sa Guvernman la pe sey maske veritab atak kont klas travayer. Li pe apel sa laz pansyon enn laz referans akoz swadizan dimunn pu ena swa pran so pansyon 60-an me li pa dir so pansyon pu diminye par 30% kan li ariv laz 65-an. Seki li pe dir nu pansyon pu varye depann si u swazir pran pansyon 60-an uswa 70-an. Sa li maske enn lot realite, buku travayer ki fer travay dir, ena problem lasante uswa lezot konsiderasyon pa pu ena swa. Zot pu oblize aksepte ki zot pansyon kupe par 30% kan zot ariv sa laz referans 65-an.

Sa napa pakt istorik Ptr ti fer avek klas travayer dan lalit pu lindepandans pu garanti enn welfersteyt kot ena drwa iniversel. Si guvernman siksesif pa finn devlop prodiksyon pu asir mintenir welfersteyt, zordi Guvernman Lalyans pa kapav vinn pled pansyon vyeyes iniversel 60-an pa sutenab. Guvernman siksesif ansam ar Tabisman finn bangol larzan disik, konpansasyon Lerop Leta Moris ti gayne kan aboli kota disik, inn permet tabisman konverti later agrikol an later komersyal pu fer smartsitiz pu milyarder, detrir lanplwa dan lagrikiltir olye servi sa fon pu fors tabisman pu diversifye dan prodiksyon manze, prezervasyon ek konservasyon lor enn gran lesel pu asir suverennte alimanter, kree travay masif, raport deviz dan lekonomi. Sa kalite devlopman pu amenn reveni dan fon Leta. Zordi Guvernman Lalyans pe swazir pu target, sible dimunn mizer e kontinye bangol larzan piblik, later, teritwar pu enn stil devlopman kot pena prodiksyon e ki pa pu kree larises pu pei me kree larises pu rant dan pos enn-de kapitalist zugader. Guvernman Lalyans pe betonn lavenir klas travayer, tu dimunn ki travay pu viv dan enn stil devlopman ki pena okenn lavenir. 

So bidze mem mansyonn Rs 10 milyar lamone disan pu lwe Baz Diego a Larme USA ki ansam avek Israel Leta Zenosider responsab agresyon milter kont Liran e Israel-USA pe kontinye zenosid sirtu dan Gaza e pe expann dan Palestinn antye, dan Liban.

Menas Kapitalist Zugader lor kontrol Fon Pansyon

Guvernman Lalyans pe fer lekontrer kan li pe menas tir pansyon depi Consolidated Fund e met li dan enn fon separe. Sa pu ankor met an peril lekonomi pei. Guvernman pe sey kasyet deryer exper sipa lorea pu dir kimanyer pu zer sa fon pansyon la pu swadizan asir pansyon veyes pu pli divan. Ofet laverite deryer tusala se pu sutir sa bann zugader labank, lasirans, spekilater pu met zot grif lor fon pansyon ek investi, fer larzan avek larzan. 

Mobilizasyon bizin aksantye ek vinn lor ofansiv pu fer Guvernman rekile.