Viktwar dan lalit pu amand Mauritius Citizenship Act
27.07.2026
Kasyet dan sa gran lalwa ki mars ansam ar Finance Bill, e ki pu travers Lasanble Nasyonal dan enn fason zekler dime, ena enn viktwar konsernan enn lalwa represiv. Kuma lekter LALIT kone finn ena enn lalit pandan dernye 3-4 an ki muvman fam ek parti Lalit finn amene kont enn lalwa an 2022 ki permet Premye Minis ras sitwayennte enn Morisyin “dan so diskresyon absoli e san furni okenn rezon” (in his absolute discretion and without giving any reasons). Lindsey Collen, manb LALIT ti met enn ka konstitisyonel kont sa lalwa otoriter la an 2022. Ramgoolam ek buku so Minis ti pran pozisyon, zot osi, kont sa lalwa Jugnauth la. Langazman la ti osi pran formelman an 2025 divan Lakur Siprem dan ka Lindsey, kan Guvernman Ramgoolam ti fek vinn opuvwar. Kumsa ki Lindsey ti retir so “plint konstitisyonel” kont Guvernman.
Asterla, kan nu lir sa lalwa ki al de-per ar Finance Bill, Economic and Financial Measures (Miscellaneous Provisions) Bill, nu kapav dir ki sa lalit la finn gayn enn viktwar. Enn Premye Minis pa pu ena ni puvwar absoli, ni puvwar pu azir san furni rezon.
Nuvo Amandman Mauritius Citizens Act, li tir fraz “dan so diskresyon absoli e san furni okenn rezon” mansyone lao. Alor Premye Minis pu nepli ena puvwar pu azir ni tusel, ni san furni enn rezon an seki konsern ras sitwayennte enn Morisyin.
Me, nu finn remarke ki, mem si Mauritius Citizenship Act finn amande, posib ena enn mankman ki kapav enn pwin teknik, kapav kree konfizyon dan lavenir. Alor, Lindsey Collen finn dir nu ki li finn ekrir Attorney General, Me Gavin Glover dirzans zordi pu dimann li verifye sa avan Lasanble Nasyonal zwenn dime. Dime Guvernman ena lintansyon travers sa 2 gran lalwa la dan enn sel zur.
Nu site depi Lindsey so let a Attorney General. Li finn ekrir:
“I wonder, however, if there is not perhaps still a technical lacuna, in that the list of the amendments to the Immigration Act 2026, does not include the deletion of Section 39 (4) (f) from the Immigration Act, itself? Am I reading the two parts of the 2026 Bill correctly? It seems to me, as a lay person that it is, prima facie, necessary to repeal that section of the new Immigration Act Amendment Bill, too, just so that the new Immigration Act is in harmony with the new Mauritius Citizens Act on this point? If this is so, an amendment to the amendment would be necessary for tomorrow, Tuesday.
“The change in the law will tally with the stand your office took in my Supreme Court Case on 23 May 2024. It will also honour the election pledge made by the now Prime Minister during his electoral campaign. Importantly, the change will put the minds to rest of many families, who have a member that is a citizen through marriage.”
Alor, nu gete ki Attorney General pu dir, e ki pu arive dime, anmemtan ki nu pe remarke ki lalwa pansyon tuzur la-mem. Sa vedir laz pansyon li efektivman 70 an, ki mem laz mwayin ki zom Moris truv lamor, avek enn pansyon ki desann dusman dusman depi 70an ziska 60 an.
Konsernan drwa sitwayin pu proteksyon kont abi par brans exekitif, li enn viktwar inportan pu diminye puvwar exsesiv dan lame nerport ki Premye Minis.
Nu rapel lekter ki, pu so ka konstitisyonel, Lindsey Collen ti reprezante par Me. Antoine Domingue SC, ki pa byin pur lemoman. Nu swet li enn bon retablisman so lasante. Dan sa ka la, ti osi ena de lezot lezist, Me. Jean Claude Bibi ek Atorne Ayesha Jeewa SC. Tuletrwa ti fer sa ka la pro bono.
