LALIT sutenir petisyon RGEA kont bayant later agrikol dan Rodrigues

18.07.2026

LALIT pe pibliye Petisyon inisye par Rodrigues Government Employees Association (RGEA) kont bayant gran siperfisi later agrikol lor bor lamer dan Rodrigues pu konpayni prive mont proze lotel. Atraver sa petition la RGEA pe revandik ki bizin itiliz sa tigit terin agrikol ki Rodrig ena pu sutenir planter ek elver, pu garanti sekirite alimanter e pu protez lanvironnman. 

LALIT sutenir aksyon RGEA.

“PETISION PIBLIK – NON A AKAPĀRMAN NOU BÃNN TERIN AGRIKOL POU DEVLOPMAN TOURISTIK

Nou, sitwayin Rodrige singater sa petision-la, nou pe exprim nou dezakor kont desizion Lasanble Rezional pou dõnn bãnn promoter prive ( Sumeru Ltd ek Var Investment Ltd an partikilye ) bãnn gran siperfisi terin agrikol lor bor lamer pou fer proze lotel

Rodrig enn ti zil kot enan bien tigit terin agrikol. Sa bãnn terin-la bizin servi pou :

. soutenir nou bãnn fermie ek planter

. garanti nou sekirite alimanter

. protez nou lanvirõnnman

. prezerv lavenir nou bãnn zanfan

Nou pa dakor ki bãnn dimounn ki pe okip later-la pou lagrikiltir ek lelvaz depi plizir bananin perdi zot terin pou dõnn bãnn investiser etranze pou fer bãnn proze touristik. 

Nou pe demãnn :

. Sispansion imediat sa bãnn proze-la

. Proteksion bãnn terin agrikol ek kotie

. Transparans letour tou bãnn desizion ek dokiman ki lie avek sa bãnn proze-la 

. Enn vre konsiltasion avek popilasion 

. Respekte bãnn lalwa lor lanvirõnnman

Nou dakor ki Rodrig bizin devlopman me pa lor detriman nou later, nou lanvirõnnman ek nou Pep .”

Linnk a petisyon: Serch RGEA + “Petision Piblik – Non A Akapārman Nou Bãnn Terin Agrikol Pou Devlopman Touristik”