10 Atak Ramgoolam-Subron kont Pansyon Vyeyes Iniversel
10.07.2026
NON A LOPERASYON DEMOLISYON PANSYON!
Ramgoolam finn deklans prosesis demolisyon welfer-steyt an antye.
1. Ramgoolam pe viz pu bes minimem ki peye pu pansyon vyeyes iniversel.
2. Li pe rod tir tax CSG lor patron ek gran salarye – mank-a-gayne Rs 24 milyar par an – enn tyer seki neseser pu gard pansyon vyeyes iniversel. Normal pu mank kas!
3. Kas CSG ti pe al dan fon Guvernman, setadir “Consolidated Fund” kot ena kontrol demokratik. Kan Ramgoolam anons so nuvo NPPF avek kontribisyon individyel dan enn “bursak vertyel individyel", sa imans fon, li al direk su kontrol MCB e lezot labank prive. Sak Rs1 ki labank gayne depi piblik, li gayn drwa investi plis Rs 11 dan rulman kapital finansye, enn kapital kareman “zugader”. Ramgoolam finn sispann nuvo plan NPPF akoz li per sulevman.
4. Ramgoolam atak iniversalite par met miyns test. (Sa osi li sispann pu mem rezon.)
5. Pansyon nepli enn drwa 60 an. Zot pe viz mont li ziska laz 70 an!
6. Ramgoolam pe rod pini pansyoner pu leres so lavi, si li oblize pran pansyon laz 60-an.
7. Si kikenn pa futi viv lor so pansyon, al rod travay, Ramgoolam viz pu kup so pansyon.
8. Ramgoolam ule aret negosye som pansyon ansam ar dirizan sindika dan reynion konpansasyon saler anyel.
9. Pe viz pu fer enn “double-cut”, kup pansyon mari-fam.
10. Pli pir Ramgoolam so konseye dir li sanz Konstitisyon Moris pu ki ZAME refer pansyon vinn su kontrol demokratik. Inkrwayab me vre!
ANPLAS ATAK PANSYON
3 Fason pu Guvernman lev larzan pu gard pansyon iniversel 60 an
Premye: Deswit taxe seki ena! Dan sa Bidze la-mem!
- Taxe larises, sirtu gran fortinn.
- Tax lor larzan dan labank, kuma Bheenick ti mete (withholding tax, kot pran tax la depi labank direk).
- Taxe profi konpayni prive
Dayer, dan repons enn kestyon Parlmanter Ram Etwareea, nu finn al kone ki patron dwa Rs 19 milyar tax, sirtu 15 Rs milyar tax konpayni! Sa vedir pre 2-fwa plis ki sa “lamone disan” Guvernman inn al mandye ar UK pu Diego.
Dezyem: Prodir! Pu sulaz deviz! Pu kree anplwa! A mwayin term sa ede pu peye pu welfer-steyt!
Guvernman bizin kree prodiksyon lor gran lesel dan pei, sirtu dan sekter alimantasyon debaz (diri, may, pomdeter, zariko, ek pu dilwil, pistas ubyin fler soley). Nu pa pe koz ti-planter, sipa idroponik, me lor later, dizon 1/3 tu later tablisman pu manze debaz (staples).
Trwazyem: Reklam reparasyon pu klas travayer Moris pu sistem esklavaz, premye lalwa travay dan Moris
Guvernman bizin met ka internasyonal pu purswiv Guvernman Olande, Franse ek Britanik pu domaz ki esklavaz finn kite lor klas travayer Repiblik Moris, kot laba zordi zot Guvernman reklam enn peyman imans depi konpayni prive ki finn profite depi esklavaz, e depi labank ki finn profite akoz li finn donn lonn Guvernman Britanik, par exanp, pu pey konpansasyon ar patron isi pu lafin esklavaz, lonn ki Guvernman Britanik finn finalman terminn so repeyman anver labank prive an 2015. Alor pandan 182 lane, sa konsortyom labank prive finn kareman fer larzan rantye lor ledo travayer esklav.
Samem manifestasyon muvman sindikal dime 11 Ziyet inportan.
