Parti Politik pa Kritik Trump so Menas Zenosid kont Liran
21.05.2026
Pandan lager-dagresyon USA-Israel kont Liran, Prezidan Donald Trump finn fer tu kalite menas zenosider kont Liran – formelman divan lapres e an ekri lor so rezo sosyal Truth Social.
Ni okenn parti dan Guvernman, antan ki nu kone, ni okenn parti dan Lopozisyon apar LALIT, antan ki nu kone, napa finn pip enn mo pu kritik sa. Menas la, li-mem, li form parti dan krim zenosid. Li enn krim deger. Li enn krim kont limanite. Silans tu parti apar LALIT, li grav.
Ala enn-de menas Trump zenosid, ansam ar Israel. Rapel, dapre tradisyon e mem lalwa internasyonal, lintansyon li inportan kan evalye si enn agresyon li anfet form parti enn zenosid.
Trump exprim so lintansyon lor so paz Truth Social:
* Enn sivilizasyon an antye pu mor zordi swar. Zame li pa pu returne.
* Sak pon dan Liran pu desime ... sak zenerater elektrisite pu ferm labutik, li pu brile dan insandi, li pu eklate, e zame pa pu kapav servi li ankor.
*Trump dir: Uver sa Detrwa Dormuz g........ la, batar fuka. Sinon zot va truv zot lavi vinn Lanfer.
*Si Liran atak nu, dan nerport ki fason, ful pwisans ek lafors Militer Amerikin pu desann lor zot kuma zame finn truve avan.
*Trump dir: Si Liran pa “UVER DETRWA NET, SAN AZUT MENAS, dan dele 48 ertan ... Leta Zini Lamerik pu atak e aneantir zot istasyon kot fer lenerzi, AKUMANSE PAR SEKI PLI GRAN.
*Trump fek dir: Liran pu “be blown off the face of the earth” e “Pu Liran, dedlayn pe koste, zot bizin buze e buz VIT, si pa pu res okenn tras de zot lor later.
Li tro fasil pu lider Travayis sipa lezot parti pu vinn dir “Abe Trump koz nerport”. Li vre, Trump dir tu ek so lekontrer. Me, seki li finn dir li exprim lintansyon fer zenosid.
Pa zis sa. Nu bizin rapel, kan Trump menas atrosite, menas masak, menas zenosid, ki so prop militer USA finn deza larg bom atomik a 2 repriz: lor Nagasaki ek Hiroshima. So prop militer finn insandye dimunn vivan ar “bom-dife” lor Tokyo ek lor Dresden.
Silans tu sa lider politik ki asiz lor sofa dan Parlman li grav pu 2 lezot rezon:
1. USA-Israel deza fini komet krim-deger dan Liran. Tu sa krim-deger, zot dokimante an detay. Sa vedir so menas pa dan vid. USA-Israel finn deza masakre 168 zanfan lekol primer. Zot finn torpiy enn navir Iranyin prekot Sri Lanka kan li ti invite par Delhi pu enn dril ansam ar buku pei. Zot finn intansyonelman nway 104 marin Iranyin ki ti abor navir. Zot finn asasinn lider Liran, Ayatollah Komeini e osi tu so leta mazor. Zot finn tuy par milye sivil, dimunn ordiner, Iranyin inklir tu sa ti-zanfan la, apar bombard infrastriktir sivil kuma lopital, lezot lekol ankor, kuma istasyon lapolis dan landrwa, infrastriktir pu lenerzi ek dilo.
2. Israel, avek konplisite ek baking USA, finn ansam perpetre enn “zenosid” kont lepep Palestinyin. Lakur Lazistis Internasyonal (ICJ) finn rann zizman interimer kont Israel pu “zenosid plozib” pu zenosid kont Israel pu sa. Netanyahu, Premye Minis Israel, deza WANNTED pu krim deger e pu krim kont limanite par Lakur Internasyonal Kriminel (ICC).
E tu parti politik apar LALIT res trankil? Kumsa, zot pena ni moralite politik, ni kolonn vertebral? Kumsa zot finn trayir non-aliynman Moris?
Par kont, dan LALIT nu finn denons sa, lor nu sayt, dan nu reynion, dan nu rasanbleman Fet Travay, lor radyo, dan Deklarasyon Komin 28 lorganizasyon, dan reynion Olive Resistance dan Minisipalite Port Louis. E nu pu kontiyne.
