Lagrev lafin prizonie 'Palestine Action'
08.01.2026
Enn tradision politik lagos dan Grand Bretagn, le 31 Desam, se al devan prizon ek fer tapaz. Sante, zwe lamizik, kriye slogan. Pou ki tu sa prizonie, ki res tousel pou lane, zot gagn sa tipti konfor kone ki nou pe pans zot e nou pe kontign milite pou zot liberasion. Monn pas enn moman devan enn prizon dan Brixton, kot prizonie Palestine Action pe kontign enn lagrev lafin.
Ena plis 60 zour desela, 8 zenn finn koumans enn lagrev lafin pou demande ki Leta Angle donn zot kosion (zot dan prizon depi plis ki 1 an, san ki zonn mem pas lakour).Zot nom: Heba Muraisi Kamran Ahmed Lewie Chiaramello Teuta 'T' hoxha Qesser Zuhrah Amu Gib Jon Cink Umer KhalidSa bann prizonie la fer parti group Filton 24: 24 aktivis depi lorganizasion Palestine Action ki finn inkarsere par Leta Britanik depi plis ki 1 an. Finn nom zot teroris (sou lalwa 'Terrorism Act') akoz pe akiz zot 'krim' destriksion zarm deger dan lizinn Elbit. Elbit fourni zarm Israel, ki li servi pou kontign so zenosid Palestinien.Sa 24 prizonie la dan prizon depi Ut 2024, san mem ki zot finn pas lakour. Normalman, dapre lalwa, enn detansion san prose napa sipoze depas 6 mwa - limit pou kikenn res inkarsere avan li al lakour. Dan prizon, finn sansir zot e finn refiz donn zot kosion. Alor, sa 8 zenn la finn koumans enn lagrev lafin, avek sa 5 demann la: 1. Donn zot kosion, imediatman. 2. Donn zot enn prose zis 3. Aret sansir tou zot kominikasion 4. De-proskrir Palestine Action 5. Ferm tu lizinn zarm Elbit Systems' UKGard prizon ek lapolis finn refiz zot swin medikal kan zonn demande. 5 dan bann prizonie la finn aret zot lagrev, akoz danze pou zot lasante, me 3 pe kontinie. Heba, Kamran, ek Lewie. Pandan ki mo pe ekrir sa, Heba ek Kamran an danze demor. Fer 65 ek 58 zour ki not napa finn manze. Zot pe soufer konstaman, pe gagn difikilte dormi, koze, respire.Touzour, Leta Britanik refiz zwenn ar zot.Bann lorganizasion, asosiasion, groupman, parti atraver Langleter finn organiz diferan aksion, kouma mobilizasion devan prizon. Leta angle finn reazir avek plis represion, finn 'pepper-spray' manifestan, finn aret zot. Malgre violans Leta, bann group kontign organize. Nou fer fas enn laparey ki finn pare, klerman, pou les zot mor. Bann zour ki pe vini pou kritik.
ST
2 Zanvye 2026
