Kandida LALIT dan eleksyon zeneral 10 Novam
11.10.2024
LALIT finn deside pu aliyn trwa kandida dan de diferan sirkonskripsyon, enn Lavil, No. 1 Port Louis (Gran Rivyer), enn Lakanpayn, No 13 (Souillac ek Riviere des Anguilles). Sa, li enn “swa” ki LALIT finn fer dan kad eleksyon zeneral 2024. Desizyon ti pran dan enn lasanble manb dan Curepipe Dimans dernye.
LALIT pe aliyn lamwatye kandida fam, lamwatye zom. Ena enn kordinater sirkonskripsyon (sef-defil, lezot parti apel li) fam, enn zom. Komite “komite kempeyn-manejer” – li, osi, li pu lamwatye zom, lamwatye fam.
Bi LALIT dan sa kanpayn la: pu nu parti vinn veritab lopozisyon atraver eleksyon, limem, e sirtu eleksyon zeneral. Tu nu kandida aktif dan LALIT. Tu dedye pu nu Program ek Platform, ki ansam nu finn devlope dan aksyon e dan refleksyon, sirtu dan preparasyon pu nu Kongre 6-zur, Kongre 60 zur limem, e apre Kongre la, kan nu finn tom dakor lor 2 dokiman debaz ki subasman nu Platform 12 Pwin dan kad eleksyon, setadir nu liv “Filozofi LALIT” ek nu panfle “Stratezi LALIT”.
Ala nu kandida:
Kandida LALIT dan No. I (Gran Rivyer)
1. Laval Yves – Deza kandida LALIT avan. Travayer konstriksyon. Li finn ekrir lartik lor size, ant-ot, efondreman veritab “anplwa” dan so sekter. Angaze alabaz lor lozman (kuma kanpayn LALIT dan Komite Konzwin pu ranplas lakaz ki pena veritab kolonn, e lezot Komite Konzwin pu ranplas lakaz lamyant), angaze dan lalit pu mobilize atraver petisyon ek travay ar Konsey Vilaz pu “lale bisiklet” – sirtu liye ar Stasyon Metro Coromandel. Laval so fami ena manb ki sorti Lil Moris ek manb ki sorti Lil Rodrig, alor li kontribiye lor kestyon Rodrig.
2. Rada Kistnasamy – Travay teknisyin IT. Li redakter (dan Komite Redaksyon) nu piblikasyon – Revi LALIT, sayt www.lalitmauritius.org – enn-de meyer websayt dan pei – ek nu paz Facebook Lalit Mauritius. Li aktif dan Komite Konzwin kote lozman.
3. (a) [..........................................]. Sa kandida la, nu pa kapav devwal so nom ziska Nomination Day. Nu oblize gard so idantite konfidansyel. Kifer? Pu so prop sekirite. Akoz li dan pei pli danzere dan lemond asterla mem, setadir li dan Palestinn. Premye pwin dan nu Platform 12 Pwin se “Aret zenosid ki Israel ek USA pe perpetre kont Palestinyin”. Nu kandida finn volonter pu al fer fas larme Israel (Israeli Occupying Forces) ansam ar fami Palestinyin. Kumsa LALIT pe travay akote ti-lorganizasyon dan landrwa dan Palestinn. Sa fer 5yem fwa enn manb pe al swa Wes-Bennk swa Gaza. Sa kandidatir montre lyin ant nu aksyon ek program.
Alor, nu introdir nu “ranplasan” pu nu kandida ki dan Palestinn, pangar li pa reysi returne a-tan pu Nomination Day, ni reysi mem avoy papye siyne pu kikenn inskrir so nominasyon. Eski Lapos ubyin DHL pe fonksyone kot li ete? Poz u-mem lakestyon.
3. (b) Sara Naraina – Li travay kontroler bis. Li ekrir lor sa size la, e diferan size, sirtu pu denons sa pratik gard nuvo rekri kuma “rilif”, san drwa pandan 5-an ubyin plis, kot travayer pa gayn so drwa. Ankor enn fwa, so kandidatir reprezant kalite lalit nu amene. So fami sorti Lil Moris, Lil Diego Garcia dan Chagos, Lil Agalega. Lefet nu ena manb kuma li, ankor enn fwa, montre natir nu parti ki inklir dimunn “Repiblik Moris” an antye, alor kan nu amenn lalit lor kestyon Diego ek Chagos, ubyin lor Agalega, li integre dan nu parti – mem anterm nu manb.
Nu pena tutafe enn “sef-defil” – me plito “kordinater” pu sirkonskripsyon. Li Rada Kistnasamy. Kapav kontakte li pu donn kudme. (5 782 0094)
Note: Nu finn swazir Nimero 1 pu nu sirkonskripsyon lavil, akoz li kot nu kartye zeneral ete – e anfet li finn ete pandan 40 an. De kandida lor trwa res dan landrwa. E lezot manb dan ladireksyon osi res isi – kuma Anne-Marie Joly, Georges Herchenroder, pu mansyonn enn-de.
Kandida LALIT dan No. 13 – Souillac ek Riviere des Anguilles
1. Rajni Lallah – Mizisyin klasik, tradisyon sega ek lezot lamizik lokal, tradisyon jazz. Li konpoz lamizik, e li profeser pyano. Militan dan muvman fam, militan kont vyolans par ofisye leta. Li aktivist lor Diego Garcia – dan Moris ek deor. Li ena enn lyin spesyal ar Diego Garcia – enn manb so fami ti dernye ofisye zidisyer leta Moris laba avan UK-USA detas Chagos. Pu konferans-depres, Rajni ti ansarz video-fimble, alor ti kumsidire enn zurnalist.
2. Alain Ah Vee – Grafik dizayner, artis vizyel, tradikter an Kreol. Li finn fer dizayn sa Platform 12 Pwin ki nu ti lanse dan Konferans-depres. Li enn militan langaz Kreol, militan literesi adilt e ledikasyon adilt. Li parmi nu bann manb ki finn deza rant dan aksyon rezistans pasifik dan Palestinn – seki li ti fer ti byin “hard”. Ti bizin fer fas larme Israel otur “miray apartheid” dan Wesbennk, kan dimunn ti gayn problem represyon. Li enn panser ek aktivist lor fermtir baz lor Diego.
3. Cindy Clelie – Profeser sosyolozi dan kolez. Deza kandida LALIT. Li aktif dan tu travay muvman fam. Li tradikter text politik an Kreol.
Kordinater pu Sirkonskripsyon: Rajni Lallah, kapav kontakte li pu donn kudme. (5 253 4378)
Not: Nu finn swazir sirkonskripsyon No. 13 anparti akoz nu travay mobilizasyon kont lakaz lamyant dan sirkonskripsyon – dan 5-6 Site EDC diferan. Ena enn nu kandida ki res dan landrwa. Nu a-lez dan No. 13 apre buku banane travay militan.
