Zenosid Blog 49 – Viv dan lepok kot USA-Israel persiste par expre tuy sivil
07.07.2024
Kan ena enn zenosid pe derule divan u lizye, li difisil pu viv kumsi ryinete.
Kan miter-rider pas dan Ragoo Lane kit so papye lalimyer lor komye u dwa pu kuran pu lemwa, kan fakter sonn so bisiklet pu kit enn let akot u labank pe dimann u vinn amenn enn nuvo prev ladres dan kit biro santral dan sipaki Morl, kan u vwazin pase pu kit enn zoli lame banann zinzli mir pu u, kan enn imans sovsuri kotone sape tonbe mor akoz so lezel inn maye dan enn lalyann, dan u lakur par divan e u ena pu anter li kot u bann tutu pa pu al deter li, kan u pe al travay tulezur, e apre travay pas enn moman ar kamarad, u kanmem rapel, tultan, kuma USA ek Israel pe kontinye avek zot zenosid zur-ale-zur-vini. Li pu kontinye ale mem ziska nu batir sa chalennj an konstriksyon progresivman kont USA ek Israel – lor lari, lor sayt travay, lor kempes Liniversite, dan ICJ ek Lakur Kriminel Internasyonal, dan Parlman partu dan lemond, dan Lasanble Zeneral Nasyon Zini, onnlayn ek dan media, parmi artist ek ekrivin, alor ki anmemtan ena kat uswa sink diferan grup konbatan rezistans Palestinyin pe riposte kont larme lokipasyon Israel dan Gaza, anmemtan ena Hezbollah pe chalennj Israel so syez kriyel atraver atak larme Israel depi Liban, anmemtan ena Houthi pe atak navir zot konsidere sutenir zenosid perpetre par Israel, e pandan tu sa letan la Israel, kuma enn leta, pe vinn pli izole, mem USA pe izol limem dan Konsey Sekirite Nasyon Zini kan li finans, arm ek fer kover-ep Israel so zenosid.
E, anmemtan, lavi pe kontinye. E li dir pu kontrol u lemosyon. U get faminn provoke par US-Israel dan Gaza, kot zanfan Palestinyin pli mizer uswa zanfan ena enn maladi, pe vinn skeletik, mosad e lerla desede. U pe get sa anserkleman popilasyon, zot forse pu sove kuma zanimo, oblize sove mem depi zot lili lopital e u ekut temwanyaz emuvan dokter ansarz Lopital Al Shifa kan li finn large apre plizyer mwa anprizonnman san pas par zidisyer ek tortir. U get anpitasyon lame lipye tipti zanfan. U truv lor figir zot tipti frer sa tromatism terifyan ek leta sok. U truv enn mama avek enn zanfan otism pe sey fer fas avek burdonnman kontinyel dronn ek son pers-zorey kan pe ena enn bonbardman, e deplasman sanses, buze depi enn lakaz a lot. U truv enn madam pe sey ed so papa avek maladi Alzheimer pu konpran seki pe arive.
E nu dimann numem, ki pe arive?
Zom kostime, kostim Oksidantal ek ar zot kravat, pe kontinye zot barbari. Amezir zot kares zot kravat, zot pe vann zot zarm, eklat zot bom pu ena nuvo komann rantre, servi zot bal ek grenad pu ena ankor nuvo komann rantre. Zot kares zot kravat kan zot pe asize laba lor nu lekran televizyon akote zurnalist aprivwaze, zurnalist inimin ek anbitye, sorti depi zot prop serk sosyal, anmemtan zot pe kokin gaz natirel lor lakot Gaza, gaz ki apartenir a Palestinn, anmemtan zot pe kontrol furnitir petrol depi Mwayin Oryan servi Israel kuma zot baz militer, e anmemtan zot larme pe kontrol larut navigasyon – tusala, kutkekut. Mem ziska pri lemond pe truv zot pe komet zenosid, lemond pe temwin zot pe literalman anserkle popilasyon Gaza kumadir “trupo bef” uswa “trupo muton”, pe tir par lafors fami tromatize popilasyon depi zot lakaz, lerla depi zot shelter tanporer, lerla depi zot latant – pa zis par vyolans direk bom ek lezot zarm explozif, me usi atraver enn faminn provoke, atraver kree lepidemi, e lerla anbrigad zot zurnalist aprivwaze pu marye pike ar zot pu gaslayt [an Angle gaslight] lemond antye, abazurdi lemond antye avek fos realite.
Alor, ki u fer?
U kapav ar enn kamarad met kas ansam pu pas komann enn kopi nuvo liv Ilan Pappé Lobbying for Zionism on both sides of the Atlantic. Kumsa omwin u pu plis ekipe pu konpran seki pe arive. E li enn aksyon a-de, u mem ansam ar kamarad kapav fer ki kapav sanz kur listwar.
E u ede pu liste tu zafer u mem, ansam avek u bann kamwad, kamarad, koleg, finn fer, kanmem komye tipti li ete – pa zis depi le 7 Oktob – me pu ena enn rikord“depi le 7 Oktob”, dat kan rezistans Palestinyin finn evade depi miray prizon atraver 60 plas lane dernyer, met defans Israelyin KO ek tuy plizyer santenn militer Israelyin, pran plizyer duzenn otaz, samem dat la kan, anplis de sa sikse militer, finn ena krim deger kont sivil , inklir tuy 700 sivil Israelyin, e pran inpe plis ki 200 sivil otaz. 700 lamor kote Israelyin finn fini vanze dan lespas kelke lertan. Asterla ankor 38,000 Palestinyin finn asasine, masakre. Pa finn pran 200 sivil Palestinyin prizonye parey kuma sa 200 Israelyin otaz la, me 8,000 Palestinyin.
Ki nu finn fer depi sa dat la ziska lafin Zin sa lane la? Nu note tu seki nu finn fer. Li, parey kuma tu aksyon byin reflesi, pe kontribye pu aret zenosid. Li pu kontribye pu amenn tu seki responsab pu vinn rann kont lor zot aksyon.
AKSYON SOMALP & so lorganizasyon manb ek individi manb
Aksyon Lari
Veye ar Flanbo– Rasanbleman Gran Rivyer Nord-Wes, Port Louis organize par SOMALP – 14 Oktob 2023, mwins ki enn semenn apre bonbardman Gaza kumanse.
Manifestasyon 11 Dimunn an rotasyon ar pankart – divan Lapos, sant Rose-Hill – kot ti ena osi distribisyon trak anmemtan – 13 Zanvye 2024
Lamars Fam dan Port Louis kont Zenosid Israel organize par Muvman Liberasyon Fam, MLF. Reprezantan Lel Fam preske totalite parti politik lopozisyon (Parti Travayis, MMM, PMSD, LALIT) ek osi prezan ti ena lasosyasyon ek sindika – 10 Mars 2024.
Depoz “Buke sinbolik” e resit poem divan Lanbasad USA dan Port-Louis, aksyon par manb Tania Haberland ek so kamarad Karen – 11 Me 2024.
Manifestasyon Lari Rose-Hill– Rasanbleman ek lamars SOMALP, kordine par manb CTSP – 13 Avril 2024.
Delegasyon manb Muvman Liberasyon Fam kot Biro Premye Minis pu depoz enn “Steytmennt An-Komin” siyne par totalite parti politik Lopozisyon Parlmanter pu Moris sutenir ka Sid Afrik kont zenosid par Israel– 13 Zin 2024.
Atas bandrol “Boycott Israel”bor lari, GRNW ek Vacoas ek lezot plas – Me 2024
Aksyon Legal
Manb LALIT Met Ka divan Lakur Kriminel Internasyonal (ICC) Alain Ah Vee, Lindsey Collen, Ragini Kistnasamy – 22 Novam 2023.
Deklarasyon Komin, Petisyon ek Lapel
Deklarasyon Komin pu kup tu lyin diplomatik ar Israel siyne par 16 gran lorganizasyon sindikal ek lezot lasosyasyon organize par SOMALP– 11 Novam 2023
Lapel pu Premye Minis fer Parlman pran enn rezolisyon formel pu sese-lefe imedya e permanan, lev syez, sispann tu lyin diplomatik ar Israel, lapel siyne par Muvman Liberasyon Fam, manb SOMALP– 29 Novam 2023.
Ekrivin Morisyin siyn enn deklarasyon komin kont zenosid ki Palestinyin pe sibir, 31 ekrivin siyne, organize par Ananda Devi, Shenaz Patel ek manb SOMALP Lindsey Collen – 10 Zanvye 2024.
Lapel pu Premye Minis rant dan ka Sid Afrik ICJ kont Israel so zenosid, siyne SOMALP – 4 Zanvye 2024.
Lapel Muvman Liberasyon Fam pu Moris pran pozisyon dan ICJ kont Israel so zenosid, pu Minis Zafer Etranzer ek Premye Minis sutenir ka Sid Afrik kont Israel pu stop zenosid – 8 Zanvye 2024.
Renuvel Lapel pu Premye Minis sutenir ka Sid Afrik divan ICJ kont Israel lor sarz zenosid– sinye LALIT – 21 Fevriye 2024.
Lapel pu kup relasyon diplomatik ar Israel– dan text par LALIT– 9 Novam 2023.
Lapel pu Lapres ek Medya dan Moris Sutenir Zurnalis Gaza organize par World Association of News Publishers e sirkile par LALIT– Redakter Le Mauricien, Patrick Michel finn siyne. 3 Mars 2024
Lapel LALIT pu guvernman Moris inplemant Rekomandasyon Raporter Spesyal Nasyon Zini Francesca Albanese inn sumet a UN Human Rights Council.
Lapel piblik LALIT pu ki yerarsi Legliz Katolik, napa ofer enn platform larme USA (atraver USA Navy Band), dan zot Kolez ek Sant, osi lontan larme USA okip ilegalman Chagos, inklir Diego Garcia ek arm Israel so zenosid dan Palestinn – 14 Mars 2024.
LALIT avoy let protestasyon kont patron Caudan Waterfront ki ofer so Esplanad pu USA Navy Band, ki form parti larme USA ki arm Israel, dan enn moman kot Israel pe komet zenosid – 15 Mars 2024.
LALIT avoy let kritik Direkter MGI akoz zot finn donn USA Navy Band zot loditoryom pu fer enn konser. Sa mem Larme USA konplis dan zenosid kont Palestinyin – 17 Mars 2024.
Aksyon Edikatif, Forom ek Lar kuma Protestation
Gran Sesyon “Ledikasyon lor Palestinn” GRNW– lor listwar deryer Israel so zenosid dan Palestinn – organize par LALIT, avek temwayaz par Alain Ah Vee ek Ragini Kistnasamy, manb LALIT ki ti al dan Palestinn kuma volonter– 16 Mars 2024.
Diskur Lindsey Collen an sutyin ar lepep Palestinyin dan forum solidarite organize par “Together for Palestine”, Bell Village – 26 Novam 2023.
LALIT lans so seri depi ennkempmennt dan LSE, Lond. Kat rapor inn pibliye ziska Lotorite finn gayn enn Lord Lakur pu expilse etidyan depi zot lokipasyon Liniversite – 10 Me 2024.
Lektir an solidarite ar lepep Palestinyin atraver Gaza Monologues par Tania Haberland, manb SOMALP. Lektir partu dan lemond, ansam ar 2 video – depi 23 Novam 2023.
Lektir Gaza Monologues ariv so 14yem edisyon– enn seri lektir onnlaynn par Tania Haberland, manb SOMALP – 29 Novam 2023.
LALIT prodir e sirkil video lor temwanyaz Alain Ah Vee lor lamars kont Miray Aparteid dan Palestinn an 2004 – 14 Avril 2024.
Prodiksyon ek sirkilasyon enn video (baze lor sesyon edikatif LALIT le 16 Mars) – 18 Mars 2024.
Manb Lindsey Collen siyn antan ki ekrivin let protestasyon adrese a organizater Hay Festival dan UK akoz zot sponnsor prinsipal enn gran investiser dan zarm Israel – plitar Hay Festival pu kennsel sa sponnsor la – Me 2024
Kreasyon enn video artistik lor 15 aksyon internasyonal pu blokis ekonomik Israel e Liber Palestinn “Global Economy is Implicit in Genocide” par Tania Haberland – 15 Avril 2024.
LALIT sirkil onivo internasyonal enn “bakgrawn” lor Pramila Patten swit-a so Rapor Nasyon Zini lor vyolans sexyel dan konfli Israel-Palestinn – 1 Avril 2024.
Kominike ek Konferans Depres
Tutswit apre bombardman Gaza kumanse, LALIT tir kominike pu aksyon irzan an solidarite ar lepep Palestinyin – 9 Oktob 2023.
Konferans depres SOMALP dan syez Mauritius Labour Congress, Port Louis pu anons manifestasyon Rose Hill e explik linportans Guvernman Moris e tu parti lopozisyon pu sutenir lapel boykot Israel – 11 Avril.
Kominike LALIT lor “zenosid anonse” – 1 Novam 2023
Kominike SOMALP dan kad Zurne Mondyal Dilo, lor Israel so lager lor dilo kont Palestinn – 20 Mars 2024.
Kominike SOMALP kont Nestle akoz so investisman dan Israel, e guvernman Moris pe donn zanfan lekol enn prodwi Nestle – 14 Zin2024
Lartik, intervyu, radio
LALIT pibliye “Blog Zenosid” plis ki enn fwa par semenn, an de langaz – Angle enn zur avek tradiksyon Kreol swiv enn-de zur apre. Fini ariv BLOG 49. Sa vedir 98 lartik – apartir 9 Novam 2023.
Seri lartik par manb SOMALP, Jean Mee Desveaux, Aanas Ruhomaully, Mosadeq Sahebdin.
LALIT pibliye tu aksyon Leta Moris anfaver Palestinn, dan kad repons Premye Minis enn PNQ dan moman kot lapres ti pe tuf aksyon Leta anfaver Palestinn – 9 Desam 2023.
LALIT denons propagann pro-Israel par redaksyon L’Express ek so zurnalist Anju Ramgulam – 15 Zanvye 2024.
Intervyu Alain AhVee dan Le Defi
Intervyu Lindsey Collen dan Star.
Program Radio Plus– “Decryptage du conflit Israelo-Palestinien” avek Lindsey Collen, Milan Meetarbhan, Jean Claude de L’Estrac, Bashir Khodabux, Rama Valayden. – 11 Oktob 2023
SOMALP fer lapel pu si ena lezot aksyon u rapel e pa finn inklir dan sa lalis lao, fer nu kone [tel ubyin Whatsapp Alain lor 5 932 9002 ]
*Lorganizasyon manb SOMALP:
Confederation of General Trade unions (Vinod Seegum)
Confederation des Travailleurs des Secteurs Publique et Privé (Reeaz Chuttoo)
Mauritius Labour Congress (Haniff Peerun)
All Workers’ Federation (Haniff Peerun)
Federation of Parastatal Bodies and Other union (Deepak Benydin)
Dr.Idrice Goomany Treatment Centre (Samad Abdus Dulloo)
Chagos Refugees Group (Olivier Bancoult)
Muvman Liberasyon Fam (Ragini Kistnasamy)
LALIT (Alain Ah Vee)
ACIM (JayenChellum)
Federation of Civil Service and Other unions (Naraindranath Gopee)
+ ek enn 50-enn individi manb
Kan pe ena enn zenosid pe arive divan u lizye, li difisil pu kontinye viv kumsi pena naryin pe arive. Me kan sakenn dant nu fer nu but kumsa, li pli fasil. Li pli fasil dan lesans kan nu kone sak sa gut dilo nu ete, samem batir ansam avek lezot gut dilo deryer miray enn ladig, pu enn zur kan li ranpli ziska rebor pu deborde kuma enn kaskad deborde e pu ena laviktwar. Enn deferlman, uswa enn turnan, enn pwin kot tu baskile. Kuma yer. Yer Lespayn inn azut so pwa, kuma enn pei, avek pwa tu lezot pei pe sutenir ka Sid Afrik kont Israel pu krim zenosid divan ICJ. E si nu ede pu fer Moris azut so pwa semenn prosenn, dizon? E si nu azir tu pei ansam kumsa? Kifer nu pa pu gayne, enn fwa nu ena leker ek lespri tu dimunn dan lemond kont zenosid sovaz perpetre par leta Israel ek par leta USA. Perpetrater pu izole. Tusel, zot pu nepli kapav kontinye zenosid. Li inposib.
Lindsey Collen pu LALIT. Zedi 4 Ziyet 2024
Tradiksyon: BK avek kudme AA
