Let a tu Travayer Zonn Frans
Form enn Komite Travayer dan ou lizinn,
Batir enn muvman ansam avek Lalit
Napa atann lisansiman vini!
Azordi 2,700 travayer dan Leisure
Garments, ek 1,100 travayer dan Summit Textiles perdi travay, dime kapav lezot
Lizinn Zonn Frans!
Kamarad travayer Zonn Frans dan rezyon
Curepipe/Phoenix, Vacaos ek Le Sud,
2,700 travayer Leisure Garments ek 1,100
Summit Textiles finn perdi travay sa mwa-la. Zonn Frans net an kriz. Ena ankor
buku lisansiman pe vini dan Zonn Frans. Me guvernman pe rod fer travayer tusel
sarye fardo sa kriz-la.
Travayer Zonn Frans finn kontribiye
buku pu lekonomi pei dan dernye 20-an. San kontribisyon travayer Zonn Frans,
kuma nu, pei zame ti pu kot li ete zordi. Patron finn fer bel bel profi lor nu
latet pandan plizyer lane. Purtan se nu travayer Zonn Frans ki finn pli mal
peye, ki pli explwate. Azordi avek globalizasyon ki pe derule dan lemond,
lizinn pe ferme enn deryer lot. Guvernman finn pran enn seri mezir pu sutenir
bann patron dan kad sa restriktirasyon dan sekter Zonn Frans. Me pu travayer
Zonn Frans pena nanye. Eski se travayer Zonn Frans tusel ki bizin sarye fardo
sa bann sanzman ki pe derule dan lemond? Sa li inzist ek inakseptab. Anplis,
kan ena sanzman dan lekonomi internasyonal, nu truve ki guvernman met dibut enn
plan sutyin pu travayer lezot sekter kuma Lepor ek Lindistri Sikriyer. Kifer
pena mem zar plan pu travayer Zonn
Frans? Se pu tu sa rezon-la ki Travayer Lesisure Garments, travayer lezot
lizinn Kirpip/Lesid, avek kudme Lalit
ti manifeste Samdi le 2 Ut. Aster nu pe agrandi sa muvman ek fer bann demand
swivan:
1.
Nu pe reklam ki guvernman donn
tu lisansye Zonn Frans, enn alokasyon lisansiman de Rs 2,000 pu enn preyod de
2-an ziska ki enn lisansye gayn enn nuvo travay.
2.
Nu reklam ki met enn vre sistem
alokasyon somaz. Somaz ek lisansiman pe monte.
3.
Nu reklam ki guvernman limem
kre travay e non pa les sa fonksyon-la inikman dan lame sekter prive.
Apre gran Manifestasyon kot plis ki 1,000 travayer
finn desann lor lari le 2 Ut aster Komite Travayer Lisansye Leisure Garments
ansam avek Lalit, pe organiz enn renyon travayer-delege de tu bann
lizinn zonn frans ki truv dan rezyon Curepipe, Phoenix, Vacoas ek Le Sud. Sa
renyon-la pe fer Samdi le 30 Ut dan Curepipe. Si u lizinn anvi anvoy
enn-de delege, u kapav telefonn lor nimero swivan: 674-4656, 675-1056 ubyin
biro Lalit lor nimero 208-2132, 208-5551.
Mukesh
Saulick pu Komite Travayer Leisure Garments & Rajni Lallah pu Lalit
C/o 153 Main Rd, GRNW, Port Louis - Tel 208-2132, 208-5551