Cite EDC Pamplemousses selebre viktwar
19.11.2022
Abitan Site EDC Pamplemousses finn akey avek lemosyon sa nuvel ki Parti Lalit finn sirkile atraver dernye reynion Komite Konzwin Lakaz Lamyant ek LALIT Rezyon Lenor, konsern laviktwar lor demand pu kase-ranze, setadir pa zis demantel lakaz lamyant, me osi ranplas li ar enn nuvo lakaz an beton 49 met kare. Kumadir enn long lalit finn port so frwi.
Dimans 16 Oktob li ti ete. Kan nu ti zwenn ti ena enn latmosfer enn sikse, enn lazwa dan laviktwar, e osi enn lazwa pu nu tu retruv nu kamarad an-fors, pu ansam konpran explikasion ki ti fer par kamarad dan LALIT lor natir sa viktwar la. Ansam nu finn konpran ki exakteman nu finn gayne, kimanyer lor tu nu demand, nu finn pa zis buz par divan, me gayn enn viktwar. Prezan pu LALIT ti ena Ragini Kistnasamy ek Anne-marie Joly. Pu abitan ti ena enn 30-enn dimunn.
Apre 20 lane aksyon, 20 lane pasyans, atraver reynion, petision, gran gran manifestasion, ti-lamars, vizit CAB, aksyon dan e par sa 50-enn Site EDC la, prezans dan lasanble delege, tusala, asterla, azordi abitan lakaz lamyant finn konn linportans travay ki finn fer lor letan.
Azordi ki guvernman, atraver so Minis Lozman, inn fer prevision Rs 800 milyon dan Bidze 2022-23 pu kase-ranze, e finn fini met dibut enn Yunit dan NHDC pu kordinn travay kase-ranze dan tu sa 50-enn site konserne..
Afors persevere, avek persistans, Guvernnman inn finalman sede.
Dimunn prezan dan nu reynion Pamplemousses finn osi rann enn omaz a 3 gran-dimunn ki ti ansam dan sa long lalit la, finn desede. Sa trwa madam la ti bien aktif malgre zot laz. Zot pa ti ezite pou donn zot kudme, pu marse dan lari dan PorLwi, pu dibute atann dan Zardin Konpanie pu kone ki repons depi Biro Premye Minis. Azordi zot zanfan, ki ti prezan, pe kontinye avans lalit la pli divan.
Tu dimunn inn kontan pu kone ki ena enn Yunit Spesyal dan NHDC dedye pu kordinn tu sa travo kase-ranze tu sa lakaz lamyant. Propozisyon delege LALIT a M. Vijay Naraidoo ki ansarz sa Yunit la pu ki bann biro CAB informe lor progre travo kase-ranze pu ki abitan lakaz dan sak site pu okuran kot finn arive. Kumsa abitan pa pu bizin al Biro Ebene pu kone.
Tu dimunn inn kontan pu kone kot bizen ale, ki bann papye inportan bizin kumans rode, met ansam an preparasyonpu demars ki pu bizin fer, kuma kontra later ek lakaz, lak dese kot bizin, prev ladres, papye dilo, CWA, CEB …
Sa travay militan la ti kordine par 2 militan LALIT Kisna ek Anne-Marie ek 2 madam dan landrwa ML ek BL. Amsam, zot ti organiz reynion dan bann Dimans gramatin 11-er ziska midi lor 3-4 dernye lane dan Site EDC Pamplemousses. Zot finn organize pu dimunn res an kontak malgre Covid 19, mem kan ena 2 lokdawn.
Apre explikasyon an koze, nu finn donn sak manb prezan enn kopi an-papye kot explik an detay tu seki M. Naraidoo, ofisye ansarz sa dosye la pu Minis Lozman, finn kominik a reprezantan Komite Konzwin, Rada Kistnasamy ek Rajni Lallah. Kumsa sak fami ena lor papye ki detay langazman Guvernman. Lor papye ena usi bann nuvo propozisyon LALIT dan sa faz kase-ranze ki konsern lakaz zeritye ek biro CAB dan rezyon pu reley linformasyon lor progre dan taymtebl kase-ranze. Manb prezan finn pran papye-explikasyon pu zot-mem, me osi pu seki malad ubyin tro vye pu prezan dan renyon. Li byin zoli pu temwayn sa zenerosite parmi abitan ki finn korpere ek amenn enn lalit e lerla partaz sa viktwar la a tu rezidan lakaz lamyant mem seki pa finn marse ansam dan lalit la.
Aster dan faz kot inn arive, sak fami pu bizin okipe, pu fami kot tu papye anord e osi pu fami kot ena pu adres problem spesifik, sirtu kote lakaz zeritye.
Manb LALIT prezan finn koz lor linportans ena enn parti kuma Parti LALIT. Abitan Pamplemousses finn osi dir kimanyer LALIT finn dibut ansam avek abitan lakaz lamyant pu ki zordi inn gayn sa viktwar la. Delege Site finn fer enn lapel pu seki ankor zenn pu zwenn avek militan LALIT dan bann konba pli divan.
Kumsa ki ena dimunn prezan dan sa dernye reynion la ki finn deside pu donn zot nom pou donn kudme parti LALIT dan so program politik pli zeneral. Nu finn travay ansam lor kestyon lakaz kuma enn drwa, me la, dan lavenir, ansam ar seki finn deside pu zwenn, pu vinn dan reynion LALIT, nu pu travay ansam lor tu kalite pwin, kuma kreasion lanplwa, lor drwa manze, drwa lasante e kont lalwa represif danzere kuma Immigration Act 2022. Lor sa kestyon Immigration Act, Kisna ek Anne-Marie ti explike kimanyer li enn chalennj konstitisyonel ki enn nu manb pe mete. Ena 2-3 manb prezan ki finn dimann enn kopi Plint Konstitisyonel Lindsey Collen dan Lakur Siprem kont seksyon arbitrer dan sa nuvo lalwa. Bann manb LALIT finn donn zot.
Tu dimunn inn dakor pu pran so responsabilite, kote lakaz, pu so prop demars pandan sa lepok kle kan finalman nu pe reysi fer kase-ranze, site par site. Nu pu res vizilan, cheke ki tu nu vwazin osi kone ki bizin fer, cheke ki personn pa al donn larzan kit eskro ki pretann li enn ofisye.
Kuma nu ti dir an konklizyon, nu destin li dan nou lame, ansam nu pu ganye.
